Ẹbụ-ọma 80 - Ika

Isi Nke Ọgụn Ẹnọ Osolobuẹ Dodo, Dọnzini Ẹnyi Ihiẹn

Ye onyẹ-ndu ẹbụ ẹbụnị. Wẹ gi olu wẹ gi a bụ “Obobo Hụn A Shịa Ẹri” bụ a. Ẹbụ Asafụ rọ. Ẹbụ-ọma rọ.

¹ Dodo, gọn ẹnyi ntịn, Onyẹ-ndu Izrẹlụ, ịyụ hụn e du ẹnyi ndị ebọn Josẹfụ nọkẹ atụnrụn! Ịyụ hụn nọdị alị elu chẹrobu ẹbụọ ahụn nwọn nku; dodo, ghọsị ẹka ị!

² Gi ufiri Ifrem lẹ Bẹnjamini lẹ Manasẹ kpa ikẹn, n'ị zụọpụha ẹnyi!

³ Chuku, dodo dọnzini ẹnyi ihiẹn; gizi ẹnya rị mma lee ẹnyi nị ẹnyi nwọn nzụọpụha!

⁴ Osolobuẹ, Chuku ihiẹn ile rị okpuru ẹ, elee mgbe ekpere ndị nke i k'e webehi i iwe?

⁵ Y'e yegụọ wẹ ẹnya-mirin ri kẹ ihiẹn-oriri; y'e yegụọ wẹ ẹnya-mirin jun mkpu ra!

⁶ Y'e mẹgụọ alị ndị nọkunmẹni ẹnyi zụọma alị ẹnyi; ndị-iṅẹnrẹn ẹnyi rị nwan a mụ ẹmụ!

⁷ Chuku Ihiẹn Ile rị okpuru ẹ, dodo dọnzini ẹnyi ihiẹn; Gizi ẹnya rị mma lee ẹnyi nị ẹnyi nwọn nzụọpụha!!

⁸ Ẹnyi wụ vaịnị hụn ị gha Ijiptu wepụha, ị nọ chụpụ ndị alị ọzọ rị ichẹn-ichẹn gbọ ẹnyi ye.

⁹ Ị nọ rụnfọn ẹ, ọ gbọrị, shịagbarị alịnị ile.

¹⁰ O sue, du ọda-ọda, kpumẹ ugu, agalaba a nọ kpumẹdẹ okẹn osisi sida.

¹¹ Agalaba a nọ sueshi azụụnnị d'e rudẹ Ohimin Mẹditerenia, sueshizi azụụnnị d'e ru Iyi Yufretisi!

¹² K'i tikpọnị nwan mgbọn i tụnhunmẹ vaịnị hụ ị kụn, hụn ndị ile ghafekọnị gi nwan rị a ghọrị a?

¹³ Ezin-ọfịa hụ a dọgbu ẹ, anụ-ọfịa hụ a tagbu ẹ!

¹⁴ Chuku ihiẹn ile rị okpuru ẹ, dodo, kinhẹn nwan! Gha elu-igwee lee ẹnya, n'ị lebanzị vaịnịnị ẹnya:

¹⁵ vaịnịnị i gi ẹka ị gbọma, vaịnịnị nọ kẹ nwa i mẹ n'o zeni i!

¹⁶ E bigụọ wẹ ọkụn ye ẹ; e gbutugụọ w'a! Ndị nke i hụ a la iwi yeni ihiẹnni ile i gi a jụgbọ wẹ!

¹⁷ Dodo, gi nwan ẹka-nni i kwọndọn onyẹ ahụn ị họrị, onyẹ ahụn i mẹ n'ọ kanị ị ẹhụ.

¹⁸ Ogẹn ahụn, ẹnyi agbakịtọkọzị ị azụụn; mẹ ẹnyi lihizi, kẹni ẹnyi kpọku ẹfan ị.

¹⁹ Osolobuẹ, Chuku ihiẹn ile rị okpuru ẹ, dodo dọnzini ẹnyi ihiẹn; gizi ẹnya rị mma lemẹ ẹnyi kẹni ẹnyi nwọn nzụọpụha!!