Ẹbụ-ọma 8 - Ika

Isi Nke Ẹsatọ Ọghọ Osolobuẹ Ye Ịhịan

Ẹbụ Defidi. Wẹ ye onyẹ-ndu ẹbụ ẹbụnị; wẹ bụ a nọkẹ nke Gititi.

¹ Euu Osolobuẹ, Onyẹ-nwọnni-ẹnyi, Ẹfan ị e nwọnkẹkwọ ikpẹn elu-ụwa ile! Y'a ghọsịzịkwọ ọghọ ị elu-igwere!

² Y'e bugụọ ẹbụ ọghọ ị che ọnụ ụmụ-ẹka lẹ ndị rị a ra ẹran — makẹ ufiri ndị-iṅẹnrẹn i, n'i gi ẹ kpukin eṅẹnrẹn lẹ onyẹ-mmẹgwarị ọnụ.

³ M gha e lee igwere i — hụn ẹka ị mẹmẹ kẹ ifọn kẹ kokisẹ rịn'a hụn i dọnmẹsọnmẹ ebe wẹ ri —

⁴ m hụ a jụ kẹ kị ịhịan wụdẹ nwan, i gi e ro ẹ? Kị ịhịan mmaka wụdẹ nwan, i gi e lepụ a ẹnya?

⁵ Bụ y'e mẹgụọ a onyẹ Osolobuẹ kahụ ẹkẹrẹ — y'e gigụọ ọghọ lẹ ikpẹn tu ẹ ugọn.

⁶ Y'e tumẹgụọ a n'ọ kị ihiẹn ile i ke — y'e bugụọ ihiẹn ile che ẹ okpuru ụkụ —

⁷ kẹ atụnrụn lẹ efin ile kẹ anụ-ọfịa;

⁸ kẹ nnụnụ e fe elu kẹ azụn rị ohimin kẹ ihiẹn ile a kpa imẹ ohimin.

⁹ Euu Osolobuẹ, Onyẹ-nwọnni-ẹnyi, Ẹfan ị e nwọnkẹkwọ ikpẹn elu-ụwa ile!