Ẹbụ-ọma 74 - Ika

Isi Nke Mmẹnọ Kwasị Ọgụn-ẹtọ Chuku Dodo D'a Tụnị Ẹnyi Ụya!

Ẹbụ Maskilu Asafụ

¹ Euu Chuku k'ị jụnị ẹnyi jẹnrin ejẹn? K'ị tọnị e buni atụnrụn ị olulu?

² Nyanhankwọ ndị nke i hụn i nwọnrin ẹdẹi, ndị hụn ị gbarị nị wẹ wụrụ ebọn nke i. Nyanhan Ugu Zayọnụ rị Jerusalẹm, ebẹhụ ị bịa d'e biri.

³ Dodo d'e ledẹ mkpọkọ ụlọ ndị ahụn: ihiẹn hụ ile eṅẹnrẹn tikpọ imẹ Ụlọ-nsọ!

⁴ Ndị-iṅẹnrẹn i a nọgụọ Ụlọ-nsọ ị yi oro n'e mẹri wẹ; e bugụọdẹ wẹ ahịma wẹ che ebẹhụ!

⁵ Ọ nọ kẹ ebe ndị e gbu osisi nọ bu anyụn banye ọfịa d'e gbu osisi.

⁶ Wẹ rị nwan e gi anyụn lẹ igwe a kụkpọchanrịn ihiẹn ile wẹ gi osisi rụn ebẹhụ.

⁷ A dụngụọ wẹ Ụlọ-nsọ ị ọkụn ru alị; e mẹrụgụọ wẹ ebẹhụ rị a za ẹfan ị.

⁸ Wẹ sị enwẹn wẹ, “Nị ẹnyi bịangbuchanrịn wẹ!” E gigụọ wẹ ọkụn dụnpụchanrịn ebe ile ẹnyi nọ e fe Chuku imẹ alịnị.

⁹ Ẹnyi arịzị a hụn ọrụn-atụmẹnya ndị ẹnyi gi marịn ị; onwọnzini onyẹ-amụma họdụnị; onwọnzikwọnị onyẹ nke ẹnyi marịn kẹ ụyanị k'e biehan!

¹⁰ Euu Chuku, elee mgbe kẹ ndị-iṅẹnrẹn k'a mụbehi ẹnyi ẹmụ?! Nị wẹ kpọlịa ẹfan ị jẹnrin ejẹn?

¹¹ K'ị jụnị nị y'a tịnpụkọ ẹka-nni tikpọ wẹ? K'ị kụmanị ẹka?!

¹² Kanị Chuku wụ eze m gha alị lala, eze hụn a zụọpụhasọnmẹ ịhịan elu-ụwanị:

¹³ Ịyụ gi ikẹn i kebe ohimin ahụn, kụkpọpụchanrịn eje-anụ ahụn rị imẹ ohimin isi ẹ ile;

¹⁴ ịyụ gwerinrin eje-anụ ohimin wụ Lẹvịatanị isi ẹ ile, ị nọ tụ ẹhụ a yeni ndị bi imẹ atụ ri.

¹⁵ Ịyụ gbawa alị, mirin nọ gbapụhama, iyi e huru; ịyụ mẹzikwọ iyi hụn ghalẹni a tahị, tahị.

¹⁶ Efinaị wụ nke i, uhinhin wụzịkwọ nke i; ịyụ ke ẹnyanwụn lẹ ukpẹ ile rị igwere, bu wẹ che ebe wẹ rị;

¹⁷ ịyụ tumẹsọnmẹni ụwa ebe ile o ru; ịyụ tumẹ udu-mirin lẹ ọkọkị.

¹⁸ Euu Osolobuẹ, nyanhankwọ ẹmụ ndị-iṅẹnrẹn rị a mụ ị, lẹ ọkpọlịa ndị marịnlẹni ihiẹn rị a kpọlịa ẹfan ị.

¹⁹ Dodo, ebukwọlẹ ndụn nduru i che ẹka ndịnị, ẹka eje-anụ! Dodo azọlẹ ndị nke i jẹnrin ejẹn tọ ẹka ndị rị a bịangbuni wẹ!

²⁰ Dodo, nyanhan nkwa ị, makẹni egbu-lẹ-egbu e jungụọ ebe ile gba ishi imẹ alịnị.

²¹ Anịlẹ ụya ri ndị wẹ rị a zọ ụkụ isi, ka mẹni ndị wẹ rị a bịangbu lẹ ndị mkpa gi, ihiẹn wẹ e gi ja ị mma.

²² Chuku dodo, lihi nwan, n'i kinrin ọnụ ị! Nyanhan kẹ ndịnị marịnlẹni ihiẹn dọn rị a mụ ị ẹmụ uhinhin lẹ efinaị!

²³ Azọkwọlẹ mban ile ndị-iṅẹnrẹn i rị a ban, mkpọtụ ile ndị-iṅẹnrẹn i rị e mẹ ogẹn ile.