Ẹbụ-ọma 73 - Ika

Isi Nke Mmẹtọ Kwasị Ọgụn-ẹtọ Nkebe Nke Ẹtọ Nke Chuku Ka

Ẹbụ-ọma Asafụ

¹ Chuku a rịkakwọ ndị Izrẹlụ mma ẹhụ, ndị obi wẹ rị ọchan.

² Kanị, mmẹ nwẹn, o te họdụ ẹkẹrẹ nị m kpọgburu; ụkụ m e te kpori,

³ ebe ẹnya rị fụ m nị ihiẹn rị a ghanị ndị rị e mẹkarị enwẹn wẹ, ebe m rị a hụn ndị njọ kẹ wẹ rị a gha ihun.

⁴ W'a ra hụn afụnfụn e we wẹ nwụn; ẹhụ rị wẹ mma ọhụnma-ọhụnma.

⁵ W'a ra hụn nsọngbu kẹ ndị ọzọ; w'a ra ta afụnfụn kẹ ndị ọzọ.

⁶ Ya haịn wẹ gi e yi mpache lekẹ ihiẹn-olu, e yi ẹka-ikẹn kẹ ẹwuru.

⁷ Kẹ ẹnya wẹ dọn sụnpụha yeni akpa, ẹrịra kẹ wẹ e ro ihiẹn rịlẹni mma.

⁸ W'a mụ ndị ọzọ ẹmụ, e gi iwe e ku, a nyan isi ihiẹn wẹ k'e mẹ ịhịan;

⁹ W'a bandẹni elu-igwee mba, e ku nọkẹ sị elu-ụwa ile wụ nke wẹ,

¹⁰ Ndị nke wẹ hụ e buruhẹ wẹ — e lura ihiẹn ile wẹ ku rịkẹ mirin!

¹¹ Wẹ hụ a sị enwẹn wẹ, “Nanị Chuku e dọn marịn? Elebe kẹ Onyẹ Kachanrịnnị a nọ marịn?”

¹² Ẹrịra kẹ ndị-njọ nọ: ogẹn ile kẹ ẹhụ gi e fu wẹ; wẹ e hi ọdanfịn, e hiwaye!

¹³ Ya wụ nị m rị e dọnmẹ obi m ọchan mmaka, e dọnmẹ ẹka m ọchan mmaka;

¹⁴ nsọngbu-nsọngbu kẹ mmẹ nwẹn a hụn uhinhin lẹ efinaị; afụnfụn-afụnfụn kẹ m'a narịn ẹka ị ụtụntụn ile!

¹⁵ Omẹni m te sị nị m ku k'ọ rị m obi, ya wụ nị m rị e re ndị nke i.

¹⁶ Kanị, kẹ m'e rohanlẹ ihiẹnni, ọ nịnị m ghọta

¹⁷ d'e ru n'a banye m Ụlọ-nsọ Chuku, m nọ ghọta ihiẹn rị e che ndị-njọ!

¹⁸ Ezioku-ezioku, y'e bugụọ wẹ che ebe e kponi; y'e mẹ wẹ a dan, a dangungwọn!

¹⁹ Idẹnmizi, e tikpọ wẹ wẹ; idẹnmizi, ihiẹn egun e kpọnchanpụ wẹ, nke wẹ a gụ!

²⁰ Di-nwọnni-ẹnyi, wẹ nọhụ kẹ nrọ mmakalaka, hụn o mẹni ịhịan tẹnhin, ọ la — makẹni, i pụha, y'e mẹ wẹ kẹ ihiẹn mmakalaka.

²¹ Eziẹ, o te fụru m akpobi, fụrudẹ m ọkpụkpụ.

²² Nzuzu kẹ m te rị e zuzu nwan, aghọtanị m! M te nọ kẹ anụ nwọnlẹni uche ebe ị rị.

²³ K'osilẹrị, m rịkwọ ebe ị rị ogẹn ile; y'e kwọndọn m ẹka-nni m,

²⁴ a gwa m uche i, e gi ẹ e du m, omẹgụ, i k'e wẹhẹ m ebe ọghọ ị rị.

²⁵ Onyẹ kẹ m nwọnzi nwan elu-igwee wezụka ị? Onwọnzikwọnị ihiẹn a sụọ m elu-ụwa wezụka ịyụ!

²⁶ Ndụn nwọn ikẹn gụ m ẹhụ gụ m imẹ obi; kanị Chuku wụ ọmụma hụn e kwọndọn obi m, ịya sụọ kẹ m nwọn jẹnrin ejẹn!

²⁷ Chuku, ndị nọkunmẹlẹni i k'a la iwi; i k'e tikpọ ndị la ị tọ sọnmẹ ihiẹn ichẹn.

²⁸ O mẹ nke m, ọ rịka mma nị m nọkunmẹ Chuku; e gbọnni m'i, Osolobuẹ wụ Chuku; m k'e kusọnmẹ ihiẹn ile ị rụn!