Ẹbụ-ọma 72 - Ika

Isi Nke Mmẹbụọ Kwasị Ọgụn Ẹtọ Osolobuẹ Dodo Yeni Eze Ẹka

Nke Solomọnụ

¹ Chuku, dodo kuzi eze ịhan-eṅẹn i; dodo kuzi onyẹ rị e rikin eze ihiẹn rị mma ẹnya ị!

² Ya gi ẹka rị mma kị ndị nke i, e ye ndị nke i ụya rị e ri ihiẹn runi wẹ.

³ Ugu alịnị, wẹ wẹhẹ aghamihun, elu òke ndị rịn'a, wẹ wẹhẹzi ihiẹn rị mma.

⁴ Eze ya kinni ndị ụya rị e ri ọnụ wẹ; ya gbapụha ụmụ ndị ẹka wẹ rulẹni, gweriẹn onyẹ rị a bịangbuni.

⁵ Wẹ fe i d'e ru nị anwụn a wabehi d'e ru ni ifọn a pụhabehi, wẹ fe i jẹnrin ejẹn!

⁶ Ya rị kẹ mirin rị e zueye ihiẹn-ugbo; ya rị kẹ mbụmbụ mirin rị a bụye alị.

⁷ Ezi-omumẹ ya ghachanrịn ihun ogẹn nke ẹ; ihiẹn ya rị mma ọhụnma-ọhụnma, d'e ru mgbe ifọn tibehi.

⁸ Eze ya kịma ụwa ile, gha Ohimin d'e ru Ohimin, gha Iyi Yufretisi d'e ru ebe ụwa ru.

⁹ Ndị bi imẹ atụ wẹ gbuzịkwọn'a osekpu; ndị-iṅẹnrẹn ẹ wẹ kụn'a isi alị.

¹⁰ Ndị-nze alị Tashishi lẹ alị ndị rị mkpẹnrẹn ohimin wẹ tụhan'a ụtụ; ndị-nze alị Shẹba lẹ Sẹba wẹ wẹhẹzikwọn'a oyiye.

¹¹ Ndị-nze ile wẹ kpọn'a isi alị; alị ile wẹ fe ẹ.

¹² Makẹni eze a za ndị mkpa gi oku, ọ gbapụha wẹ, ọ zazịkwọ ndị ụya rị e ri nwọnlẹni onyẹ e yeni wẹ ẹka.

¹³ O mẹ omikẹn ndị ndụn rịlẹni lẹ ndị ụya rị e ri, ọ zụọpụha ndụn ndị ụya rị e ri.

¹⁴ Ọ gbapụha ndụn wẹ ẹka ndị rị a bịangbuni wẹ lẹ ndị ẹka-ikẹn; ndụn wẹ rị a mkpa ọda-ọda.

¹⁵ Eze ya tọ. Wẹ ye ẹ goru alị Shẹba; wẹ mẹmẹn'ẹ ekpere ogẹn ile; wẹ gọzimẹ ẹ uhinhin lẹ efinaị.

¹⁶ Ọka ya jun alịnị, ya jun elu ugu ndị rịn'a e finfin, ya mẹ ihiẹn kẹ alị Lẹbanọnụ. Ịhịan wẹ jun imẹ obodo ichẹn-ichẹn rị alịnị kẹ irurue jun imẹ ogige.

¹⁷ Ẹfan eze ya agụlẹ kaka jẹnrin ejẹn; ẹfan a ya rịsọnmẹ, ẹnyanwụn e we gụ. Alị ile wẹ gi ẹ e nwọnrin ngọzi; alị ile wẹ kpọma a onyẹ wẹ gọzi.

¹⁸ Ọjịja-mma ya rịnị Osolobuẹ wụ Chuku, Chuku ndị Izrẹlụ — hụn ịya sụọ a rụn ọrụn atụmẹnya.

¹⁹ Ọjịja-mma ya rịnị ẹfan a jẹnrin ejẹn. Ọghọ a ya pụha ifọn elu-ụwa ile. Isẹẹ! Isẹẹ!!

²⁰ Ebeni kẹ ekpere Defidi nwa Jese ru.