Ẹbụ-ọma 71 - Ika

Isi Nke Mmanaị Kwasị Ọgụn Ẹtọ Ekpere Ẹgẹdi

¹ Euu Osolobuẹ, ịyụ kẹ m'e gbọnni! Dodo, anịkwọlẹ ifẹnrẹn mẹ m!

² Dodo, zụọpụha m makẹni ị wụ onyẹ ezi-omumẹ; gọn m ntịn n'ị zụọpụha m!

³ Wụrụnị m ọmụma e che m nche, ebe m'a gbashi ogẹn ile; y'e kuọlẹ n'i k'a zụọpụha m, makẹni ịyụ wụ ọmụma m lẹ ebe m'a gbaban.

⁴ Chuku m, dodo gbapụha m ẹka eje-ịhịan, ẹka onyẹ-njọ, ẹfọ jọ.

⁵ Makẹni, ịyụ wụ Osolobuẹ kẹ m rị e lee ẹnya, ịyụ kẹ m gi e dọn ẹnya gha ẹhụ nwandu m lala.

⁶ Ịyụ kẹ m danbemẹ gha ẹfọ nnẹ m lala; ịyụ wepụha m ẹfọ nnẹ m. M k'a rị a ja ị mma ogẹn ile.

⁷ Ndị bu ọda hụ a gba m ilee, kanị, ịyụ wụ ebe zeni m'a gbaban.

⁸ Ọjịja-mma ị jun m ọnụ; m'e ku oku ọghọ ị kẹ ụhụọhịn han.

⁹ Dodo, ajụkwọlẹ m m kagụ ẹgẹdi; alatọkwọlẹ m ebe ndụn rịzịlẹni m.

¹⁰ Ndị-iṅẹnrẹn m hụ e ku oku m; ndị rị e ke m nke nị wẹ gbu m hụ e zuni m umẹ,

¹¹ a sị, “Chuku a lagụọ a tọ, chụ n'a, nwụndọnn'ẹ, n'o nwọnni onyẹ k'a zụọpụhan'a!”

¹² Chuku dodo nọkunmẹ m! Chuku m, bịakẹnrin d'e yeni m ẹka!

¹³ Ifẹnrẹn ya mẹgbu ndị rị e we iwe m; wẹ la iwi! Ifẹnrẹn ya mẹgbu ndị rị a chọ m njọ; wẹ fa;

¹⁴ Kanị, mmẹ nwẹn elebehikọ ẹnya eyemẹka ị; m k'a rị a ja ị mma furuni i, a jawaye.

¹⁵ M k'e ku ihiẹn ile rị mma y'e mẹ uhinhin lẹ efinaị; a gba m ọrụn nzụọpụha ị rụn, ọsụọn'a nị asakọ m ẹka gbachanrịn wẹ!

¹⁶ M k'a pụha d'e ku okẹn ihiẹn ndị Osolobuẹ wụ Chuku mẹ; m k'a nyanhannị wẹ nị y'a rịka mma, ịyụ sụọ.

¹⁷ Chuku, ị hụ a kuzi m gha ẹhụ nwa-ndu m lala; m hụkwọ e ku oku ọrụn atụmẹnya ị.

¹⁸ M kagụdẹ ẹgẹdi, pugụ ẹwọ, Chuku dodo, alakwọlẹ m tọ d'e ru mgbe m gwagụ agbọ lalanị oku ikẹn i, gwagụ ndị lalanị nị y'e hikẹ ogbe.

¹⁹ Chuku, ezi-omumẹ i jẹnkarị igwere elu! Y'e mẹ okẹn-ihiẹn! Chuku, onyẹ nọ kẹ yụ?!

²⁰ Y'e mẹgụọ ẹnyi hụn nsọngbu lẹ afụnfụn, kanị y'e mẹgụọ ndụn banzị m; i k'a gha imẹ-imẹ alị wepụhazị m.

²¹ I k'e bushiwaye m elu; ị k'a kasịzị m obi.

²² M k'a kpọ ụbọ kpanmịn ị, Chuku m, makẹni ihiẹn i ku kẹ y'e mẹ; m k'a kpọ ụbọ gi ja ị mma, Onyẹ-nsọ alị Izrẹlụ.

²³ M k'a gha e yi oro ịghọghọ ebe m rị a bụnị ị ẹbụ; umẹ-ndụn m ị zụọpụha k'a jazịkwọ ị mma.

²⁴ Ọnụ m k'e ku ihiẹn rị mma i mẹ, kẹ ụhụọhịn han, makẹni o kpuyegụọ ndị rị a chọ m isi, a fagụọ wẹ.