Ẹbụ-ọma 7 - Ika

Isi Nke Ẹsa Osolobuẹ, Dodo Kinni M Ọnụ M

Ẹbụ Shigayọnụ hụn Defidi gi rịọ Osolobuẹ gbapụha a ẹka Kushi, onyẹ ebọn Bẹnjamini

¹ Euu Osolobuẹ, Chuku m, ịyụ kẹ m gbaburu! Zụọpụha m ẹka ndị rị a chụnị m, gbapụha m —

² amamgbe w'a dọkịka m kẹ ẹwọrọ, dọrinrin m, onwọnni onyẹ k'a zụọpụha m ẹka wẹ!

³ Dodo Osolobuẹ, Chuku m — omẹni ezioku rọ ni m mẹ ihiẹnni, omẹni eje-ihiẹn rị m ẹka;

⁴ omẹni e gighọ m eje-ihiẹn kụ ọwụ m ụgwọ mọbụ napụ eṅẹnrẹn m ihiẹn ẹ mmaka —

⁵ ndị-iṅẹnrẹn wẹ chụ m, nwụndọn m; wẹ zọkpụkpọ m tọ alị, la ozun m tọ alị ebẹhụ! Sẹla

⁶ Euu! Osolobuẹ, gi olulu lihi ọtọ! Wuzo n'i bunụmanị ndị-iṅẹnrẹn m gi olulu e sọn m! Tẹnhin, Chuku m — n'ị han ezigbo eṅẹn hụ ị chọ!

⁷ Alị ile wẹ gbakikomẹ ebe ị rị, wẹ fihunmẹ i; gha elu-igwee kị wẹ.

⁸ Osolobuẹ a hannị alị ile eṅẹn. Kinni m nwan ọnụ m, Osolobuẹ, makẹni ẹka m rị ọchan; makẹni m kụrụ ọtọ.

⁹ Euu Chuku hụn rị ọchan, ịyụ, hụn e lele obi lẹ iroro ịhịan; dodo kụsị eje-ihiẹn ndị-njọ rị e mẹ, y'e dọnmẹ ndị ezi-omumẹ ọhụnma.

¹⁰ Chuku hụn Kachanrịnnị wụ onyẹ nche m, onyẹ hụn a zụọpụha ndị obi wẹ zin.

¹¹ Chuku wụ ezigbo ọka-ikpe, Chuku hụn njọ e bu olulu ogẹn ile:

¹² omẹni ịhịan erogharịnị, Osolobuẹ e sụọnchanpụ ọpịa-agha a tọn'a. Ọ kwọntọgụọ ụta a —

¹³ ọ kwademẹgụọ ihiẹn-ọgụn a ile e gbukẹnrinni, mụ ọkụn ye ọbara ụta a.

¹⁴ Onyẹ hụn a tụ eje-iroro a tụrụgụọ nsọngbu rịkẹ imẹ mụ ntụ kẹ nwa.

¹⁵ O gutọ mgbugbu mini, kanị ịya danye imẹ mgbugbu nwẹn o gu.

¹⁶ Eje-ihiẹn o romẹ e kunrun ẹ, o gi isi ẹ buru ihiẹn-ikẹn ọ mama.

¹⁷ M k'a kpanmịn Osolobuẹ makẹ ezigbo eṅẹn ọ han, m k'a bụ ẹbụ gi ja ẹfan Osolobuẹ mma, Onyẹ ahụn kachanrịnnị.