Ẹbụ-ọma 68 - Ika

Isi Nke Ẹsatọ Kwasị Ọgụn-ẹtọ Chuku Pụha, Ndị-iṅẹnrẹn Ẹ A Gbayịya!

Ye onyẹ-ndu ẹbụ ẹbụnị. Ẹbụ-ọma Defidi rọ. W'a bụ a abụ.

¹ Chuku lihi ọtọ, ndị-iṅẹnrẹn ẹ a gbayịya, ndị iwe ẹ a gbapụ!

² Y'a chụ wẹ kẹ ufere dọn e bu ẹnwụnrụn; kẹ ọkụn dọn a rịnranpụ ofigbọn, ẹrịra kẹ Chuku e tikpọ ndị-ejẹ a la iwi.

³ Kanị, ndị ezi-omumẹ k'a ghọghọ, wẹ k'a ghọghọ ihun Chuku; wẹ k'a ghọghọ, ẹfọ a sụọ wẹ ụsụọ.

⁴ Bụ nị nị Chuku ẹbụ; gi ni ẹbụ ja ẹfan a mma; ja nị onyẹ ahụn e nyin orukpu mma. Ẹfan a wụ Osolobuẹ — ẹfọ ya sụọma ụnụ ụsụọ ihun ẹ!

⁵ Nẹdi ndị nwọnlẹni nẹdi k'ọ wụ, onyẹ hụn e kinni ikpoho di wẹ nwụn ọnụ wẹ: ịya kẹ Chuku hụn bi ebẹhụ rị nsọ wụ!

⁶ Chuku hụn e bu ndị wẹ jụ e che ezi-lẹ-ụlọ, o wepụha ndị rị ngan, mẹ wẹ gha ihun; kanị ndị nnupụ-isi k'e bi imẹ alị ọkpọ-nkụn.

⁷ Euu Chuku, ogẹn ahụn i gi dupụha ndị nke i, ogẹn i gi gha imẹ atụ kẹ onyẹ-agha: Sẹla

⁸ alị e mẹhunmẹ, igwere e zue okẹn mirin, makẹni Chuku Saịnaị a pụha, makẹni Chuku Izrẹlụ a pụha!!

⁹ Euu Chuku, ị nọ mẹ mirin zue ọda-ọda, gi ẹ mẹ alị ị te kpọgụ nkụn mẹmẹzi ọhụnma.

¹⁰ Euu Chuku, ndị nke i nọ biri ebẹhụ, ị hụ e mẹ ọhụnma e gbọnni ogbẹnnyẹ mkpa a.

¹¹ Osolobuẹ zi ozi, ndị bu ọda nọ weri ozi ahụn ghagbarị, a sị,

¹² “Ndị-nze lẹ ndị-agha wẹ ahụn bịa d'a lụsọn ẹnyi agha a gbamagụọ ọsọ! Ẹghẹẹ, a gbama wẹ ọsọ! Ikpoho ẹnyi rị ụlọ e kemẹ ihiẹn ndị nke ẹnyi narịn ndị ahụn —

¹³ ọsụọn'a ndị dinẹ imẹ igunrun atụnrụn hụ e weri, nku nduru ẹbụbụọ wẹ kpụ gi siliva nyan wẹ, hụn wẹ gizi goru rị e gbukeni nyan ugbele wẹ.”

¹⁴ Ogẹn Onyẹ Nwọn Ikẹn ile gi mẹri ndị-nze elu ugu Zalụmọnụ chụzịza wẹ, mirin oyi ọchan wụ sno hụn a kpụkpụrụnị, e ziẹnjun elu-ugu Zalụmọnụ.

¹⁵ Okẹn-ugu, ugu Bashanị! Ugu Bashanị, ugu hụn nwọn mkpọnụnụ bu ọda!

¹⁶ Kị ẹnya rị a fụn'ị, ugu nwọn mkpọnụnụ bu ọda, i gi e gi eje-ẹnya e lee Ugu hụn Chuku họrị biri? Osolobuẹ k'e bikwọ ebẹhụ jẹnrin ejẹn!

¹⁷ Chuku gi ụgbọ-ẹshin ẹ nnụ-uku ole-lẹ-ole gha Ugu Saịnaị banhan Ụlọ-nsọ a.

¹⁸ Ị nọ shi ebẹhụ jẹn elu, dukọ ndị ị nwụnlụa agha — ịhịan hụ e wẹhẹni i ihiẹn wẹ gi a chann'ị ẹnya, kẹ ndị te jụ nị arịkọ wẹ okpuru i — ị nọ shi ebẹhụ kẹni i biri ebẹhụ, Osolobuẹ wụ Chuku.

¹⁹ Osolobuẹ a rịka mma: o bu ibu ẹnyi ụhụọhịn-ụhụọhịn; ịya wụ Chuku hụn a zụọpụhanị ẹnyi.

²⁰ Chuku ẹnyi wụ Chuku hụn a zụọpụhanị; Osolobuẹ-nwọnni-ẹnyi e mẹ ịhịan a wanahịn ọnwụn.

²¹ Chuku k'e tikpọrịrị ndị-iṅẹnrẹn ẹ isi — isi ndị isi-ikẹn lẹ ntutu ahụn rujunn'ẹ.

²² Osolobuẹ sị, “M k'a gha Bashanị ahụn wetu ndị iṅẹnrẹn m; m k'a ghadẹ imẹ-imẹ ohimin wepụha wẹ —

²³ kẹni ụnụ gi ụkụ zọ ẹdeke wẹ lekẹ ẹjan, nkitẹ ụnụ e gi ire rarịzịkwọ ẹdeke ndị-iṅẹnrẹn ahụn!”

²⁴ E lee ịyụ lẹ ndị yụ lẹ wẹ wị, Chuku; e lee Chuku m wụ Eze m lẹ ndị ya lẹ wẹ wị kẹ wẹ banla Ụlọ-nsọ a:

²⁵ ndị ẹbụ bu ụzọ; ndị-egu rị azụụn; ịgbagba rị etintinnaị wẹ, a kụ ẹgede-chakachaka.

²⁶ Ja nị Chuku mma imẹ ozuzu ndị nke ẹ, Osolobuẹ hụn e ye Izrẹlụ ndụn!

²⁷ Lee ebọn Bẹnjamini hụn rị wẹ ibe alị kẹ wẹ bu ụzọ; ndị-isi ebọn Juda, ebọn rị a kịnị, rị wẹ azụụn, o ru igunrun ndị-isi ebọn Zẹbulọnụ; ndị-isi ebọn Naf'tali e sọn wẹ.

²⁸ Chuku i e yegụọ ị ikẹn! Chuku dodo, ghọsịzị nwan ẹnyi ikẹn i!

²⁹ Ndị-nze k'e buhẹn'i oyiye wẹ gi a gbaye i imẹ Ụnọ-NSỌ ị rị Jerusalẹm,

³⁰ Jụgbọ alị Ijiptu, eje-anụ ẹfịfịa-mirin ahụn; igunrun okẹn-efin ọfịa ahụn hụn rị imẹ igunrun ụmụ-efin ndị alị ichẹn-ichẹn, mẹkọ oku ịtụn'a egho siliva! Chụzịza ndịnị agha a sụọ ụsụọ!

³¹ Alị Ijiptu k'e zi ndị ụkọ wẹhẹni i igwee-bronzu nwẹnẹ goru; alị Ẹtiopịa k'a hụhụ wẹhẹzikwọ oyiye wẹ d'a gbaye Chuku.

³² Alị-eze ile rị elu-ụwa, bụ nị nị Chuku ẹbụ, bụ nị nị Osolobuẹ ẹbụ. Sẹla

³³ Euu Chuku, onyẹ hụn e nyin igwere kẹ anyịnyan, igwere hụn rị ẹdẹi! Gọn ni ntịn, n'o kuọlẹ oku, gọn ni ntịn okẹn olu ẹ.

³⁴ Ku n'ẹ nị ikẹn wụ nke Chuku, Chuku hụn ọghọ a kpumẹ Izrẹlụ, onyẹ hụn ikẹn ẹ pụha ifọn imẹ igwere!

³⁵ Chuku a rịka egun! Chuku, hụn rị ụlọ-nsọ a! Chuku Izrẹlụ! O ye ndị nke ẹ ikẹn lẹ ọkịkị. Ịja-mma ya rịnị Chuku!