Ẹbụ-ọma 60 - Ika

Isi Nke Ọgụn Ẹtọ Chuku Dodo Mẹrini Ẹnyi Nwan K'i Dọn Ku

Ye onyẹ-ndu ẹbụ ẹbụnị. Wẹ gi olu “Obobo Hụn Wụ Ọshẹri” bụ a. W'e gi ẹ a kuzi nkuzi. Ẹbụ Miktam Defidi rọ. Ọ bụ ẹbụnị ogẹn hụ ya lẹ ndị alị Aram-Naharaịm lẹ ndị Aram Zoba gi lụ agha, ogẹn ahụn Jụabụ gi kin azụụn, gbu ndị alị Ẹdọm nnụ-uku mmẹbụọ (12,000) imẹ Ọdanmgbugbu-nnu.

¹ Chuku, y'a jụtọgụọ ẹnyi; y'e tikpọgụọ ihiẹn ile ẹnyi gi e che enwẹn ẹnyi nche; ị rị e buni ẹnyi olulu; dodo, mẹ nwan n'ọ rịzịnị ẹnyi mma.

² Y'e zinzingụọ alị ẹnyi; y'e tiwagụọ a; dodo, dọnzi nwan ebe gbawasọnmẹni, n'ọ rị nwan e mẹhunmẹ!

³ Y'e mẹgụọ ndị nke i hụnjun ẹnya; y'e yegụọ ẹnyi ọnụma ị ra kẹ manya, ọ hụ e mẹ ẹnyi a dan ẹgẹlẹgẹ.

⁴ Kanị y'a ghọsịgụọ ndị a tụ egun i ahịma w'e gi dọn ẹnya. Sẹla

⁵ Kẹni ndị i bu obi s'ẹka wanahịn; dodo, gi ẹka-ihiẹn i zụọpụha ẹnyi, za ẹnyi.

⁶ Chuku e kugụọ a imẹ Ụlọ-nsọ a, sị, “M k'e mẹri wẹ weri: e keni m ụnụ Shẹkẹm lẹ Ọdanmgbugbu Sukọtụ;

⁷ ẹgbẹrẹ Gilẹdị wụzị nke m; alị ebọn Manasẹ wụzịkwọ nke m; alị ndị Ifrem wụdẹ okpu-agha m; ndị Juda wụ ọkpọ-ọkịkị rị m ẹka!

⁸ Mụabụ wụhụ afẹrẹ m gi a kwọ ẹka; Ẹdọm wụ ebe m'a gbụtọ akpụkụ m; m k'e mẹrizikwọ alị ndị Filistia, yi oro mmẹri ẹ!”

⁹ Onyẹ k'e weban m imẹ obodo hụ wẹ tụnhunmẹ mgbọn? Onyẹ wejẹnkọ m d'e mẹri Ẹdọm?

¹⁰ Chuku, y'a jụtọgụọnị ẹnyi? Y'a ra sọnzi ndị-agha ẹnyi jẹn agha!

¹¹ Dodo, yeni ẹnyi ẹka lụsọn ndị-iṅẹnrẹn, makẹni ịhịan asakọ ẹka zụọpụha ẹnyi!

¹² Ebe Osolobuẹ nọyeni ẹnyi, ẹnyi k'e mẹ okẹn ihiẹn, makẹni ịya k'a zọgbu ndị-iṅẹnrẹn ẹnyi.