Ẹbụ-ọma 6 - Ika

Isi Nke Isin Ekpere Onyẹ Emu Rị A Kụ

Ẹbụ Defidi Ye onyẹ-ndu ẹbụ ẹbụnị. Wẹ gi olu Shẹminiti lụa alị bụ a.

¹ Euu Osolobuẹ, egikwọlẹ olulu i jụgbọ m mọbụ gi ọnụma ị fịan m mkpịnsịn!

² Mẹ omikẹn m, Osolobuẹ — nị ndụn arị m! Osolobuẹ dodo zụọ m emuni, n'o rugụọdẹ m ọkpụkpụ.

³ Obi e d'a gbawapụ m! Euu Osolobuẹ, elee mgbe kẹ y'a zụọ m?

⁴ Osolobuẹ dodo kinhẹn, n'i zụọpụha m; gi ufiri ihiẹn-ọsụsụọ ị gbapụha m.

⁵ Ndị nwụnnị ara nyanhankwọ ị; onyẹ as'ẹka a ja ị mma imẹ ili?

⁶ Ndụn m gi a sụn udẹn a gụgụọ m; ẹnya-mirin m e huru elu-ukpo m kẹ uhinhin han; ẹnya-mirin e jun ihiẹn m gi firi isi.

⁷ A kwankpọgụọ m ẹnya ẹbụbụọ, ndụn a gụ wẹ yeni ndị-iṅẹnrẹn m.

⁸ Pụ nị nị m, ụnụ ile hụn e mẹ eje-ihiẹn, nị Osolobuẹ a nụgụọ ẹkwan m!

⁹ Osolobuẹ a nụgụọ arịrịọ m; Osolobuẹ a zagụọ ekpere m!

¹⁰ Ifẹnrẹn k'e mẹgbu ndị-iṅẹnrẹn m, ezigbo egun a bịa wẹ; e gi wẹ ifẹnrẹn gbakin azụụn.