Ẹbụ-ọma 59 - Ika

Isi Nke Mmitenẹi Kwasị Ọgụnnaị

Ye onyẹ-ndu ẹbụ ẹbụnị. Ẹbụ arịrịọ Defidi rọ. Ogẹn Sọlụ gi sị wẹ kemẹ ụlọ Defidi nke kẹni o gbu ẹ kẹ Defidi gi de ẹ. Wẹ gi olu “Etikpọlẹ” bụ a.

¹ Chuku m, dodo zụọpụha m ẹka ndị-iṅẹnrẹn m; ẹka ndị bunụmanị m! Bu m zuemẹ ebe jẹn elu.

² Zụọpụha m ẹka eje-ndị; zụọpụha m ẹka ndị-izighẹ!

³ Lee kẹ wẹ rị nwan e che nị wẹ gbu m; ndị ẹka-ikẹn rị e zuni m eje-umẹ, Euu Osolobuẹ, emẹni m wẹ njọ, emẹni m eje-ihiẹn;

⁴ onwọnni ebe ikpe nọ ma m bụ wẹ hụkwọ a chụ m, arị wẹ e ledẹ ẹnya azụụn! Dodo, lihi n'i buruhẹ m! E lee nsọngbu m rị imẹ ẹ!

⁵ Osolobuẹ, Chuku ihiẹn ile rị okpuru ẹ, Chuku ndị alị Izrẹlụ! Tẹnhin nwan, n'i ye alị ndị ghalẹni e fe i afụnfụn! Ahatukwọlẹ onyẹ ọwụlẹ imẹ ndị ẹkanaị ahụn rị e mẹ eje-ihiẹn! Sẹla

⁶ W'a pụha ẹnyasị, e yi oro kẹ nkitẹ, e jẹnhunmẹ imẹ obodo.

⁷ Lee ihiẹn rị a gha wẹ ọnụ a pụha! Ọpịa-agha tụ nkọ rị wẹ ọnụ! Wẹ hụ a sị enwẹn wẹ, “Onwọnni onyẹ k'a nụ ihiẹn ẹnyi rị e ku!”

⁸ Kanị ẹmụ kẹ y'a mụ wẹ, Osolobuẹ; ẹmụ kẹ y'a mụ alị ile ghalẹni e fe i!

⁹ Ikẹn Chuku kẹ m gi e dọn ẹnya, makẹni, Chuku kẹ m gbọnni.

¹⁰ Chuku m k'e gi ufiri ihiẹn-ọsụsụọ a tụnị m ụya; o k'e mẹ m gi ẹnya m hụn ndị iṅẹnrẹn m alị.

¹¹ Kanị, egbulẹ wẹ, amamgbe ndị nke m a zọ ikẹn i. Ka gi ikẹn i kpayịya wẹ, y'e welụa wẹ alị, dodo Osolobuẹ, Akpaịn hụn e che ẹnyi nche.

¹² Makẹ njọ wẹ rị e gi ọnụ wẹ e mẹ, makẹ ihiẹn gha wẹ ọnụ a pụha, mpache wẹ rị a pache ya nwụndọn wẹ kẹ ọnyan! Ufiri ọnụ wẹ rị a bụ lẹ ntụ wẹ rị a tụ,

¹³ gi iwe tikpọ wẹ, tikpọchanrịn wẹ d'e ru n'a gụ wẹ, kẹni ịhịan ile marịn nị Osolobuẹ rị a kị imẹ Izrẹlụ, alị Jekọpụ, lẹ ebe ile ụwa ru. Sẹla

¹⁴ Ẹnyasị a pụhazị wẹ, e yi oro kẹ nkitẹ, e jẹnhunmẹ imẹ obodo;

¹⁵ a wahunmẹ, a chọ ihiẹn-oriri, eki e we fọn, mmanị ẹfọ jun wẹ.

¹⁶ Mmẹ nwẹn, m k'e gi ẹbụ ku oku ikẹn i; ụtụntụn ile e gi m ihiẹn-ọsụsụọ ị bụ ẹbụ. Makẹni y'a wụrụgụọ ebe m'a gbaban, ebe m nọ a wanahịn nsọngbu.

¹⁷ Euu Ikẹn m, m k'e gi ẹbụ ja ị mma, makẹni Chuku kẹ m gbọnni, Chuku hụn nwọn ihiẹn-ọsụsụọ m.