Ẹbụ-ọma 53 - Ika

Isi Nke Mmẹtọ Kwasị Ọgụnnaị Onyẹ Ẹwobi Sị Osolobuẹ Arị

Ye onyẹ-ndu ẹbụ ẹbụnị. Wẹ gi Olu Mahalatị bụ a. Ẹbụ Maskilu Defidi rọ.

¹ Onyẹ ẹwobi sị enwẹn ẹ, “Chuku arị.” E wiwigụọ wẹ; wẹ hụ e mẹ arụ lẹ eje-ihiẹn. Onwọnni onyẹ e mẹ ihiẹn rị mma.

² Chuku gha elu-igwee e lee ịhịan, n'ọ hụn kẹ o nwọnghọ ndị nwọn ezigbo uche, ndị rị a chọ nke Chuku.

³ Kanị, wẹ ile a kpahugụọ; wẹ ile a rụgụọ; onwọnni onyẹ e mẹ ihiẹn rị mma, onwọndẹni kaka akpụ onyẹ ohu.

⁴ Ndị e mẹ eje-ihiẹn e nwọndẹ uche ra? Ndị hụn e ri ndị nke m kẹ brẹdi, ndị ghalẹni a kpọku Chuku.

⁵ Okẹn egun a tụmagụọ wẹ nwan ebẹhụ — bụ ihiẹn egun arịa, makẹni Chuku e mẹgụọ ndụn gụ ndị kehunmẹ ụnụ, gụ wẹ ru ọkpụkpụ; ụnụ e mẹri wẹ, ifẹnrẹn e mẹgbu wẹ, makẹni Chuku a jụgụọ wẹ.

⁶ Dodo, nzụọpụha ya gha Zayọnụ bịan'ị Izrẹlụ!! Ogẹn Chuku e gi dọnzini ndị nke ẹ ihiẹn, ndị Izrẹlụ, ebọn Jekọpụ k'a ghọghọ; ẹfọ k'a sụọgbu ndị Izrẹlụ ụsụọ!