Ẹbụ-ọma 52 - Ika

Isi Nke Mmẹbụọ Kwasị Ọgụnnaị Onwọnni Ihiẹn I K'e Mẹ M, Chuku Hụ A

Wẹ ye Onyẹ-ndu ẹbụ ẹbụnị. Defidi bụ ẹbụ Maskiluni ogẹn Duẹgị, onyẹ alị Ẹdọm gi bịa d'a gwa Sọlụ hụn chụkọ Defidi nị Defidi bịa iwe Ahimẹlẹkị.

¹ K'ị rị e gini eje-ihiẹn a nyan isi, odogun-agha? Onwọnni ogẹn Osolobuẹ e gi latọ ndị nke ẹ.

² Ị hụ e gi ire i a tụ iroro ntikpọ, ire i hụ a tụ nkọ kẹ ẹbeke; ịyụ, onyẹ ntụ!

³ Eje-ihiẹn ka ị a sụọ karị ezigbo-ihiẹn, ntụ ka ị a sụọ karị ezioku. Sẹla

⁴ Oku e wiwi ihiẹn ka ị a sụọ, onyẹ-ntụ!!

⁵ Kanị, Osolobuẹ k'a kụtu i, y'e lihikọzị jẹnrin ejẹn! O k'a gha iwe i jụrụ ị wepụ, huepụ ị imẹ ndị rị ndụn. Sẹla

⁶ Ndị ezi-omumẹ k'a hụn ihiẹn mẹn'i, egun a tụ wẹ; a mụma wẹ i ẹmụ, a sị,

⁷ “Lee dikẹn nwẹn jụ n'o gbọnkọnị Chuku, kama, o gi akụ-lẹ-ụba a dọn ẹnya, gi ẹ zekẹnmẹ e tikpọ ndị ọzọ!”

⁸ Mmẹ nwẹn k'a rị Ụlọ Chuku, e du kẹ osisi-olivu; ihiẹn-ọsụsụọ Chuku nwọnni ndị nke ẹ kẹ m'e gi dọn ẹnya jẹnrin ejẹn.

⁹ M k'a gha a kpanmịn ị jẹnrin ejẹn, Osolobuẹ, makẹ ihiẹnni i mẹ; m k'a ja Ẹfan ị mma, idẹnya ndị nke i.