Ẹbụ-ọma 51 - Ika

Isi Nke Mmanaị Kwasị Ọgụnnaị Ekpere Mgbagharị

Ye onyẹ-ndu ẹbụ ẹbụnị. Defidi bụ ẹbụnị ogẹn Natanị onyẹ-amụma gi bịa d'e kunrun ẹ kẹ Defidi sọngụ Bat'shẹba nwunyẹ Yuria ranhịn.

¹ Dodo mẹ omikẹn m, Osolobuẹ, makẹ ufiri ihiẹn-ọsụsụọ ị; gi ufiri okẹn ẹfọma ị finchanpụ njọ ile m mẹ i!

² Chanchanpụchanrịn ihiẹn ile m mẹ ikpe gi ma m, y'e fepụ m ẹhụ njọ m mẹ!

³ A marịnghọ m n'e mẹọlẹ m njọ: ogẹn ile kẹ njọ m gi a ma m ikpe.

⁴ Ịyụ kẹ m mẹ njọ — ịyụ sụọ; e mẹọlẹ m ihiẹn rịlẹni mma ẹnya ị. Ya wụ, y'e mẹghọ ọhụnma ebe i nọ ma m ikpe; y'e mẹni eje-ihiẹn ebe i nọ hangbu m eṅẹn.

⁵ Onyẹ-njọ kẹ m wụ kete w'a mụlẹ m — kete nnẹ m a tụlẹ imẹ m!

⁶ Ẹghẹẹ, ezioku gha akpak'alị obi pụha kẹ ị chọ; y'e mẹ m amarịn ihiẹn rị mma imẹ obi m.

⁷ Gi ẹrurushin-hisopu i fe m ẹhụ kẹni m rịzị ọchan; sụ m ọhụnma-ọhụnma lekẹ ẹkwa, kẹni m nwunnahịn ẹkwa-ọchan.

⁸ Dodo, mẹ m ghọghọ, mẹ ẹfọ sụọ m ụsụọ; yezi m ịghọghọ ru m ọkpụkpụ k'i dọn gweriẹn m ru ọkpụkpụ.

⁹ Elezilẹ njọ m mẹ, ka finchanpụ ihiẹn ile m mẹ ikpe gi ma m.

¹⁰ Dodo Osolobuẹ, ke obi rị ọchan ye imẹ m, y'e yezi m obi m gi a s'ẹka e turu.

¹¹ Achụpụlẹ m ebe ị rị; ewepụlẹ Mmọn-nsọ ị imẹ m.

¹² Yezi m ịghọghọ onyẹ hụn ị zụọpụha, y'e ye m obi m'e gi turusọnmẹ.

¹³ Ogẹn ahụn, a kuzimẹ m ndị e nupụ isi ụzọ ị, ndị-njọ e gbehutọ buruhẹ i.

¹⁴ Chuku, dodo anịlẹ isi m tọ ọchụ m gbu, dodo, Chuku hụn a zụọpụhanị m! Ọnụ m sikọ d'e yi oro ịghọghọ, ku ẹ nị y'a rịka mma.

¹⁵ Di-nwọnni-ẹnyi, dodo shịapụ ụgb'ọnụ m, kẹni ọnụ m ja ị mma.

¹⁶ Makẹni ẹlẹ ẹjan kẹ ị chọkọ, nkẹ m'a chụnyeni i ẹjan; ẹjan wẹ dụn ọkụn ara sụọ ị.

¹⁷ Ẹjan Osolobuẹ chọ wụ obi njọ a rị a fụ; Osolobuẹ, y'a jụkọ obi welụa enwẹn ẹ alị njọ a rị a fụ!

¹⁸ Dodo, mẹ ọhụnma n'ọ rịnị Zayọnụ mma; tụndọnzi mgbọn Jerusalẹm.

¹⁹ Ogẹn ahụn ezigbo ẹjan wẹ k'a chụnyeni i a sụọma ị, ẹjan wẹ dụn ọkụn, ẹjan wẹ dụchanrịn ọkụn; e gizi wẹ okẹn-efin chụnyen'i ẹjan elu ukpo nchụn-ẹjan ị.