Ẹbụ-ọma 5 - Ika

Isi Nke Isẹn Ekpere Nchedọn

Ẹbụ Defidi Wẹ ye onyẹ-ndu ẹbụ ya. Wẹ gbu ẹkpịrị ye ẹ.

¹ Dodo Osolobuẹ, gọn ntịn ihiẹn m rị e ku; ledẹ udẹn m rị a sụn.

² Dodo, gọn ntịn ẹkwan eyemẹka m rị a kwan, Eze m lẹ Chuku m — ni ịyụ kẹ m rị a rịọ.

³ Euu Osolobuẹ, y'a nụ olu m ụtụntụn; ụtụntụn, m'a gwaghọsị ị mkpa m, e cheri i.

⁴ Makẹni, y'ẹlẹ Chuku hụn njọ a sụọ ụsụọ, onyẹ-njọ asakọ ẹka sọn i nọdị.

⁵ Y'a nịkọ ndị a pacheni turu ihun i; ize ndị ile e mẹ eje-ihiẹn e ze i.

⁶ Y'e tikpọ ndị ile a tụ ntụ. Ndị egbu-lẹ-egbu lẹ ndị-ndufie wụ arụ ẹnya Osolobuẹ.

⁷ Kanị mmẹ nwẹn, makẹni y'e mẹyeni onyẹ nke i, m k'a s'ẹka banhan imẹ Ụlọ ị; m k'e bu ihun zinmẹ Ụlọ-NSỌ ị, kụn'ị isi-alị.

⁸ Dodo Osolobuẹ, gi ezi-omumẹ i du m makẹ ndị-iṅẹnrẹn m; mẹ ụzọ ị riẹnni m.

⁹ Ezioku arị wẹ ọnụ; ntikpọ-ntikpọ rị wẹ obi; ili rị oghe kẹ ẹkpịrị wẹ wụ — ire wẹ wụ ndufie-ndufie!

¹⁰ Euu Osolobuẹ, dodo ma wẹ ikpe; mẹ wẹ gi isi wẹ buru ihiẹn wẹ romẹ! Gi ufiri njọ bu ọda wẹ mẹ chụpụ wẹ — nị e nupụgụọ wẹ isi okpuru i.

¹¹ Kanị, ẹfọ ya sụọma ndị gbaburun'i ụsụọ — ẹbụ ịghọghọ ya rịsọnmẹ wẹ ọnụ. Dodo, kpumẹ wẹ kẹni ndị ihiẹn i a sụọ gi ufiri i ghọghọ.

¹² Makẹni yụ wụ Osolobuẹ a gọzi ndị ezi-omumẹ a gọzi; y'e gi ọhụnma e gbọnhunmẹ wẹ rịkẹ akpaịn.