Ẹbụ-ọma 49 - Ika

Isi Nke Itenẹi Kwasị Ọgụnnaị

Ẹbụ-ọma Itu ụmụ Kora. Wẹ Ye Onyẹ-ndu Ẹbụ ya.

¹ Gọn ni ntịn, ndị alị ile! Gọn ni ntịn, ndị ile bi elu-ụwa —

² kẹ ndị uku kẹ ndị nta, kẹ ọdanfịn kẹ ogbẹnnyẹ!

³ Oku-ọnụ m sikọ d'a wụ amamihiẹn, iroro-obi m sikọ d'a wụ nghọta.

⁴ M sikọ d'e leban itẹn ohu ẹnya, a kpọ m ụbọ kọwa itẹn m.

⁵ Kị egun k'a tụnị m ogẹn nsọngbu, makẹni ndị rị a chụnnị m e gigụọ eje-ihiẹn fihunmẹ m?

⁶ Wẹ rị e gi akụ-lẹ-ụba wẹ e dọn ẹnya, a nyan isi n'e nwọnkẹ wẹ ihiẹn.

⁷ Ịhịan asakọ ẹka gbarị isi nwẹnẹ ẹ; onwọnni ihiẹn w'a saẹka kụ Osolobuẹ gi gbarị isi.

⁸ Ndụn a ṅanranka; asakọ wẹ ẹka kụgụ ụgwọ a

⁹ hụn ịhịan e gi rị ndụn jẹnrin ejẹn, ya lẹ ili ahụnnị ẹnya.

¹⁰ O wegụọ ẹnya nị ndị marịn ihiẹn a nwụn anwụn, ndị marịnlẹni ihiẹn lẹ ndị-nzuzu a nwụnzịkwọ anwụn, a la ihiẹn wẹ nwọn a tọnị ndị ọzọ.

¹¹ E biri wẹ imẹ ili jẹnrin ejẹn; nọdị ebẹhụ gha agbọ pụ agbọ, ọsụọn'a nị e nwọnghọ wẹ alị hụn a za ẹfan wẹ.

¹² Kẹ ịhịan e mẹlẹ ọdanfịn ru, ọ tọkọ elu; ịhịan nọhụ kẹ anụmanụ a nwụnnị.

¹³ Lee ihiẹn e mẹ ndị “amarịnka m” lẹ ndị e sọnni wẹ lẹ ndị a kwadọn ndụnmọdụn wẹ. Sẹla

¹⁴ Wẹ k'a wụrụ atụnrụn lakọ mmọn; ọnwụn e duru wẹ kẹ onyẹ e du atụnrụn; ndị kụrụ ọtọ k'a kị wẹ eki fọn, ẹhụ wẹ e retọ imẹ ili ebẹhụ, ahụnkọzị wẹ okẹn ụlọ wẹ hụ biri.

¹⁵ Kanị Osolobuẹ k'a gbarị m ẹka ọnwụn; n'o werighọ m. Sẹla

¹⁶ Atụlẹ nwan egun makẹni ịhịan hi ọdanfịn, atụlẹ egun ni ihiẹn rị iwe ẹ a bawaye,

¹⁷ makẹni, o werikọ ihiẹn ọwụlẹ la mmọn; akụ-lẹ-ụba a esọnkọ a ban imẹ ili.

¹⁸ Ẹghẹẹ, ọsụọn'a nị o te hụ a ja enwẹn ẹ k'ọ rị ndụn kẹ w'a ja onyẹ ihiẹn rị a ghanị,

¹⁹ o k'a nwụn laburu ndị nẹdi ẹ wẹ jẹnrin ejẹn, ahụnkọzị wẹ ukpẹ.

²⁰ Ọdanfịn nwọnlẹni nghọta nọhụ kẹ anụmanụ hụn a nwụnla iwi.