Ẹbụ-ọma 48 - Ika

Isi Nke Ẹsatọ Kwasị Ọgụnnaị Zayọnụ, Obodo Osolobuẹ

Ẹbụ; Ẹbụ ọjịja-mma hụn Itu ụmụ Kora bụ

¹ Osolobuẹ e hikẹ ogbe, o furu hụn w'a ja mma ọda-ọda imẹ obodo Chuku ẹnyi, elu Ugu ẹ rị nsọ wụ Zayọnụ.

² Ugu ẹ rị nsọ jẹn elu hụn ma mma; ịya wụ ịghọghọ ụwa ile! Ugu Zayọnụ rọ — hụn rị njẹndemẹ ẹbamịn ugu obodo Eze-uku ahụn rọ.

³ Ebe ile wẹ nọ e che ẹhụ rị imẹ ẹ, Osolobuẹ a ghọsịgụọ n'ọ hụ ebẹhụ e che wẹ nche.

⁴ Eziẹ, ndị-nze ahụn a kịgbamaghọ, bịa d'a maye obodo Osolobuẹ.

⁵ Kanị, a hụn w'a, ọ tụ wẹ ẹnya, tụma wẹ egun, wẹ nọ gbama ọsọ!

⁶ Ẹhụ a mama wẹ nni, tụrụma wẹ, rịkẹ okpoho imẹ rị e mẹ.

⁷ Y'e gi okẹn ẹbi ẹbamịn ọwụwa-ẹnyanwụn e gungwọnpụdẹ okẹn ụgbọ-mirin Tashishi!

⁸ Kẹ ẹnyi dọn nụ otiti Osolobuẹ ẹrịra kẹ ẹnyi dọn rị a hụn ẹka a imẹ obodo Osolobuẹ, Onyẹ Ihiẹn ile rị okpuru ẹ, imẹ obodo Chuku ẹnyi; Chuku k'e dọnmẹ obodo ahụn jẹnrin ejẹn. Sẹla

⁹ Euu Chuku, ẹnyi e rogụọ ihiẹn-ọsụsụọ ị, ẹnyi e ro ẹ imẹ Ụlọ-NSỌ ị.

¹⁰ Kẹ i nwọnhan Ẹfan, Osolobuẹ — ẹrịra kẹ wẹ dọn a ja ị mma elu-ụwa ile! Ẹka ị a rụnka ihiẹn furuni!

¹¹ Ẹfọ hụ a sụọ ndị Zayọnụ ụsụọ! Ndị bi obodo ile rị Juda wẹ ghọghọma, makẹni y'a hanka ezigbo eṅẹn.

¹² Ghahunmẹ ni obodo Zayọnụ, gụnkwama nị ụlọ-nche ndị rịn'a;

¹³ lekpọ nị mgbọn ẹ ile, gụnkwama nị okẹn ụlọ a ile kẹni ụnụ hụn ụzọ gwa agbọ ndị lalanị ya.

¹⁴ Makẹni, Chukuni wụ Chuku ẹnyi jẹnrin ejẹn; ịya k'e duzikwọ ẹnyi jẹnrin ejẹn.