Ẹbụ-ọma 47 - Ika

Isi Nke Ẹsa Kwasị Ọgụnnaị Onyẹ Hụn A Kị Ụwa Ile

Ye onyẹ ndu ẹbụ ẹbụnị. Ẹbụ Itu ụmụ Kora rọ, ẹbụ ọjịja-mma.

¹ Ụnụ ndị alị ichẹn-ichẹn, kpọ nị ẹka! Gi ni ẹbụ ịghọghọ ja Osolobuẹ mma!

² Makẹni, Osolobuẹ, Onyẹ hụn kachanrịnnị, rị egun; Eze ndị-nze k'ọ wụ elu ụwa ile.

³ Ịya mẹ alị ndị ọzọ e humẹni ẹnyi isi, bu alị ndị ọzọ che okpuru ụkụ ẹnyi.

⁴ Ịya hanye ẹnyi alị ẹnyini, hụn wụ ọghọ ẹnyi ụmụ Jekọpụ, Jekọpụ hụn rị a obi. Sẹla

⁵ Chuku e weri ọnọdị a, oro a pụ! Osolobuẹ e weri ọnọdị a, opi a han!

⁶ Bụ nị nị Chuku ẹbụ ọjịja-mma; bụ nị ẹbụ ọjịja-mma! Bụ nị nị Eze ẹnyi ẹbụ ọjịja-mma; bụ nị ẹbụ ọjịja-mma!!

⁷ Makẹni Chuku wụ Eze ụwa ile, Gi ni ezigbo ẹbụ ja a mma!

⁸ Chuku wụ eze alị ile rị ichẹn-ichẹn; Chuku nọdị alị elu ukpo ẹ rị nsọ.

⁹ Ndị ọkịkị alị ichẹn-ichẹn e zugbama: wẹ wụ nke Chuku Ebraham, makẹni akpaịn ile rị elu ụwa wụ nke Chuku. Chuku e hikẹ ogbe!!