Ẹbụ-ọma 45 - Ika

Isi Nke Isẹn Kwasị Ọgụnnaị Ẹbụ Ihiẹn-ọsụsụọ

Ye onyẹ-ndu ẹbụ ẹbụnị. Wẹ gi olu “Obobo” bụ a. Ẹbụ Maskilu Itu ụmụ Kora rọ, Ẹbụ ihiẹn-ọsụsụọ.

¹ Obi rị a sụọ m ụsụọ, yeni ihiẹn rị mma m chọ nị m ku. Eze kẹ m rị a gwa; ire m wụ ukeke (pẹni) akanwe marịn ọrụn!

² Ịyụ kachanrịn ikẹnnyẹ ile okorọbịa e pu! Oku ọnụ ị a rịka mma — ya wụnị Chuku a gọzigụọ ị jẹnrin ejẹn!

³ Kẹnmẹ ọpịa-agha ị ye ukun, odogun-agha hụn ikpẹn lẹ ọghọ jun ẹhụ!

⁴ Gi ọghọ-nze lẹ anyịnyan ị jẹnmẹ d'e mẹrisọnmẹ; d'a kwadọn ezioku lẹ iwelụa-enwẹn alị lẹ ezi-omumẹ; ẹka-nni i ya kpasọnmẹn'i ikẹn!

⁵ Ọbara ụta ị tụ nkọ e zupusọnmẹ ndị iṅẹnrẹn i akpobi; i k'a gbatu ndị alị ichẹn-ichẹn.

⁶ Chuku, ukpo i k'a rị jẹnrin ejẹn; ọkpọ ọkịkị kụrụ ọtọ k'i gi a kị alị-eze i;

⁷ ihiẹn furuni a sụọ ị ụsụọ; eje-ihiẹn e ze i ize. Ịya haịn Chuku hụn wụ Chuku i gi tumẹ i, hu udẹn ịghọghọ ye i isi karị ibe i.

⁸ Ẹwuru i ile hụ e kun fuẹin yeni maa lẹ alo lẹ kashịa junni wẹ; ndị egu i hụ a kpọn'ị ụbọ imẹ obi-eze wẹ gi ihiẹn eze-enyichọ mma.

⁹ Ụmụ-ikpoho ndị-nze rịdẹ imẹ ikpoho ndị rị e sọnhunmẹn'i; alasị turu ẹka-nni i, o yihụ ezigbo goru alị Ofiri.

¹⁰ Okpoho wẹ rị a lụ, gọn ntịn; lee ẹnya, gọn ntịn: la ndị nke i lẹ ikpụlọ nẹdi i tọ,

¹¹ kẹni mma ị hụn ụzọ a sụọ eze; ebe omẹni ịya wụ di-nwọnn'i — humẹn'ẹ isi.

¹² Kẹ ndị alị Taya k'e gi oyiye bịa d'a chann'ị ẹnya, ndị kachanrịn ọdanfịn k'a chann'ị ẹnya.

¹³ Lee kẹ nwa eze ahụn eze rị a lụ mahan mma — ebẹhụ ọ rị imẹ ihiẹn wẹ gi bula a! Goru-goru kẹ wẹ gi kpa ẹwuru ẹ.

¹⁴ Ẹwuru wẹ kpayesọnmẹ ihiẹn k'o yi; wẹ dula a d'e kunrun eze; ịgbagba dukọ a sọnkọ a.

¹⁵ Wẹ hụ a ghọghọ, ẹfọ hụ a sụọ wẹ ụsụọ kẹ wẹ dula wẹ; a banhan wẹ obi-eze.

¹⁶ Mmụ ị k'e rikin i eze, kẹ i dọn rikin ndị nẹdi i eze; i k'e mẹ wẹ kịgbarị alị ile.

¹⁷ M k'e mẹ agbọ ile a nyanhan ị, alị ile a ja ị mma jẹnrin ejẹn.