Ẹbụ-ọma 44 - Ika

Isi Nke Ẹnọ Kwasị Ọgụnnaị Osolobuẹ Dodo Zụọpụhazị Ẹnyi!!

Ye onyẹ-ndu ẹbụ ẹbụnị. Ẹbụ Maskilu itu ụmụ Kora rọ.

¹ Chuku, ẹnyi e gigụọ ntịn nụ a; ndị nẹdi ẹnyi wẹ a gwagụọ ẹnyi ihiẹn i mẹ ogẹn wẹ mbụ-mbụ:

² kẹ ị dọn gi ẹka ị chụpụ ndị alị ichẹn-ichẹn, gbọ wẹ nwẹn ye; k'i dọn mẹshi alị ndị ahụn ikẹn, mẹ n'ọ rịnị Izrẹlụ mma.

³ Ẹlẹkwọ ọpịa-agha wẹ kẹ ndị nke i gi weri alị ahụn; ẹlẹ ikẹn wẹ kẹ wẹ gi mẹri! Ikẹn i lẹ akwanran ị lẹ ẹnya rị mma i gi e lee wẹ haịn, makẹni ị chọ nị i mẹni wẹ ọhụnma.

⁴ Ịyụ wụ Eze m, Chuku hụn e ye ebọn Jekọpụ wụ Izrẹlụ mmẹri.

⁵ Ịyụ haịn ẹnyi gi e mẹri ndị-iṅẹnrẹn ẹnyi; ẹfan ị kẹ ẹnyi gi a zọgbu ndị bunụmanị ẹnyi.

⁶ M'a ra gi ụta m dọn ẹnya; ẹlẹ ọpịa-agha m a zụọpụha m.

⁷ Ịyụ a zụọpụha ẹnyi ẹka ndị-iṅẹnrẹn ẹnyi, e gbe ifẹnrẹn e ye ndị iwe ẹnyi rị e we ihun.

⁸ Chuku kẹ ẹnyi gi a nyan isi ụhụọhịn ile, ẹnyi k'a gha a ja ị mma jẹnrin ejẹn. Sẹla

⁹ Kanị, y'a jụgụọ ẹnyi nwan, y'e gbegụọ ifẹnrẹn ye ẹnyi ihun; y'e sọnjẹnzini ndị-agha ẹnyi agha.

¹⁰ Y'e mẹgụọ ẹnyi gbanị ndị-iṅẹnrẹn ẹnyi ọsọ, ndị iwe ẹnyi rị e we a kịrị ihiẹn ẹnyi.

¹¹ Y'e wegụọ ẹnyi ye wẹ e gbu kẹ atụnrụn, y'e feyịyagụọ ẹnyi ye alị ndị ọzọ.

¹² Y'e repụgụọ ndị nke i nru-ọnụ lekẹ ihiẹn afịa jụ.

¹³ Y'e mẹgụọ ẹnyi wụrụ ihiẹn ẹmụ ihun ndị nọkunmẹni ẹnyi; y'e mẹgụọ ẹnyi wụrụ ihiẹn w'a mụ ẹmụ ẹnya ndị nọhunmẹni ẹnyi.

¹⁴ Y'e mẹgụọ ẹnyi wụrụ ihiẹn wẹ gi a kpọ iyi ẹnya alị ndị ọzọ — wẹ hụ a mụ ẹnyi, e finfin isi.

¹⁵ Ifẹnrẹn hụ e mẹ m ụhụọhịn ile; ifẹnrẹn e kpumẹgụọ m ihun,

¹⁶ makẹ ọnụ ndị rị a mụ ẹnyi ẹmụ lẹ ndị rị a kparini ẹnyi; makẹ eṅẹnrẹn, hụn rị a chọ n'o mẹgwarị.

¹⁷ Ihiẹn ndịnị ile rị e mẹ ẹnyi — ọsụọn'a nị ẹnyi e febehini i, ẹnyi egini ntụ sọn Iwu i.

¹⁸ Obi ẹnyi apụnị ebe ị rị, ẹnyi aghanị ụzọ ị pụ.

¹⁹ Y'e titugụọ ẹnyi, la ẹnyi tọ ebe eje-anụ wụ jakalụ jun; y'e gigụọ ẹkpa-ishi lẹ ụya kpumẹ ẹnyi.

²⁰ Omẹni ẹnyi te latọ Chuku ẹnyi, shịapụ ẹka ẹnyi zinmẹni mmọn —

²¹ Chuku amarịnkọ? O k'a marịn nụ, makẹni ọ marịnghọ obi ẹnyi, ọsụọn'a nị obi ẹnyi zueri ezueri!

²² Ufiri i kẹ wẹ gi nwan e gbu ẹnyi kẹ ụhụọhịn han, e mẹ ẹnyi kẹ atụnrụn wẹ k'e gbu.

²³ Tẹnhin nwan, Osolobuẹ! K'ị rị nwan a ranhịnnị?! Dodo, tẹnhin! Ajụlẹ ẹnyi jụchanrịn!

²⁴ K'ị rị e bupụnị ẹnyi ihun? Kị haịn i gi zọ afụnfụn ẹnyi rị a ta lẹ nsọngbu ẹnyi rị imẹ ẹ?!

²⁵ Ẹnyi a danrugụọ alị, fiẹnrin mọmọmọ.

²⁶ Lihi nwan d'e yeni ẹnyi ẹka! Gi ufiri ihiẹn-ọsụsụọ ị gbapụha ẹnyi!