Ẹbụ-ọma 42 - Ika

Isi Nke Ẹbụọ Kwasị Ọgụnnaị Nkebe Nke Ẹbụọ Ekpere Onyẹ Wẹ Chụpụ

Ye onyẹ-ndu ẹbụ ẹbụnị. Ẹbụ Maskilu Itu ụmụ Kora rọ.

¹ Kẹ mirin iyi rị e huni dọn a gụn ele, ẹrịra kẹ y'a gụn m, Chuku!

² Ẹgụn Chuku rị a gụn m kẹ mirin, ẹgụn Chuku hụn rị ndụn rị a gụn m! Elee mgbe m'e gi jẹn ihun ẹ d'e fe ẹ?

³ M hụ a kwangbu enwẹn m, ụtụntụn lẹ ẹnyasị; wẹ hụ a jụ m ogẹn ile, “Elebe kẹ Chuku i rị?”

⁴ M'a kwan ntan, a kwan imọn, m gha a nyanhan kẹ mmẹ lẹ igunrun ahụn te dọn a wị e jẹn Ụlọ Chuku; lẹzi kẹ m dọn e buruni wẹ ụzọ, ẹnyi hụ e yi oro ịghọghọ, bụkọ ẹbụ ẹnyi gi a kpanmịn Chuku — okẹn igunrun rị e mẹ mmẹmmẹ!

⁵ Obi m, kẹ ndụn rị a gụn'ị? K'ị rị e sọngbuni m? Lemẹkwọ Chuku, nị m sikọ d'a jazị a mma; ịya wụ onyẹ e yeni m ẹka; ịya wụ Chuku m.

⁶ Ẹfọ arị a sụọ m ụsụọ! O mẹ m a nyanhan ị ebeni m rị, Chuku, alịnị ugu Hẹmọnụ lẹ ugu Miza rị, alịnị isi-iyi Jọdanị rị.

⁷ Okẹn mirin hụ a zụn ụzụn a zụnkwasị, okẹn mirin i hụn rị e hutu elu ugu ndịnị; wẹ hụ a kpọshi elu, a kpọlụa, e rukpumẹ m!

⁸ Efinnaị, Osolobuẹ hụ e mẹni m ihiẹn o gi wụ Chuku m; uhinhin, m hụ a bụn'a ẹbụ, ẹbụ m gi e mẹ ekpere e jẹnni Chuku m.

⁹ M sị Chuku hụn wụ ọmụma e che m nche, “Kị haịn i gi zọ m? Kẹ m k'a tọnị a kwan makẹ ndị-iṅẹnrẹn rị a bịangbuni m?”

¹⁰ Ẹmụ ndị iṅẹnrẹn m rị a mụ m hụ a fụru m ọkpụkpụ; wẹ hụ a jụ m, “Elebe kẹ Chuku i rị?”

¹¹ Obi m, kẹ ndụn rị a gụn'ị? K'ị rị e sọngbu ni m? Lemẹkwọ Chuku, nị m k'a jazị a mma; ịya wụ onyẹ e yeni m ẹka lẹ Chuku m.