Ẹbụ-ọma 40 - Ika

Isi Nke Ọgụnnaị

Ye Onyẹ-ndu Ẹbụ Ẹbụnị. Ẹbụ-ọma Defidi rọ.

¹ E din m ndidin cheri Osolobuẹ, ọ nọ gọn m ntịn, nụ ẹkwan m.

² Ọ dọpụha m imẹ eje-mgbumgbu hụ rị e kponi, imẹ okẹn ịkpọtọ ahụn; o bu ụkụ m che elu ọmụma, ye m ebe rị mma wuzo.

³ O bu ẹbụ ọhụn che m ọnụ, ẹbụ wẹ gi a ja Chuku ẹnyi mma. Ndị bu ọda k'a hụn ihiẹn o mẹ, tụma egun, e we wẹ enwẹn wẹ kwanị Osolobuẹ, gi ẹ dọn ẹnya.

⁴ Onyẹ hụn gi Osolobuẹ dọn ẹnya enwọnkẹ ngọzi, onyẹ ghalẹni e gi ndị mpache e dọn ẹnya ghalẹni e gi ndị ihunnaị.

⁵ Osolobuẹ wụ Chuku m — y'a rụnọlẹ ihiẹn a tụ ẹnya bu ọda i rotọnị ẹnyi; onwọnni onyẹ nọ kẹ ịyụ; m sị nị m gbama wẹ, wẹ k'a karị ẹka.

⁶ Kẹ ẹjan kẹ oyiye onwọnni hụn ị chọ, kama y'a shịapụgụọ m ntịn nị m ghọta; kẹ ẹjan w'a dụn ọkụn kẹ ẹjan-njọ onwọnni hụn ị chọ.

⁷ Ya m nọ sị, “Lee m ebeni, a bịagụọ m — kẹ wẹ dọn de ẹ banyeni m imẹ Ẹkụkwọ-nsọ.

⁸ M chọ nị m mẹ uche i, Chuku m; iwu i rị imẹ obi m.”

⁹ A gwaọlẹ m wẹ k'i dọn zụọpụha m imẹ ozuzu uku ndị nke i; m'a ra kpumẹ ọnụ m — ịyụ wụ Osolobuẹ a marịnghọ.

¹⁰ Ezuemẹni m ezi-ihiẹn i mẹ imẹ obi m; m'e ku ẹ n'i furu wẹ gi e dọn ẹnya lẹni y'a zụọpụha ịhịan. Ezuemẹni ni m ozuzu ndị nke i ihiẹn-ọsụsụọ ị lẹ nkwa ị hụn i mẹzu.

¹¹ Osolobuẹ, dodo e mẹbehilẹ omikẹn m; ihiẹn-ọsụsụọ ị lẹ ni y'e mẹ ihiẹn i ku uwẹ k'e chemẹ m ogẹn ile.

¹² Makẹni nsọngbu karị hụn w'a gụn fihunmẹ m; njọ ndị m mẹ a nwụndọngụọ m, arịzị m e legha ụzọ. Uwẹ ka ntutu rị m isi ọda, ndụn arịzị m.

¹³ Osolobuẹ, dodo zụọpụha m; Osolobuẹ dodo bịakẹnrin d'e yeni m ẹka.

¹⁴ Ndị ile chọkọ nị wẹ gbu m, ifẹnrẹn ya mẹ wẹ, w'a marịnzịlẹ hụn w'e mẹ; ndị ọ rị a sụọ nị wẹ tikpọ m wẹ gi ifẹnrẹn kin azụụn.

¹⁵ Ndị hụn a sị m, “Ẹhẹn! Ẹhẹn!” wẹ fa hụn k'a tụgbu wẹ ẹnya.

¹⁶ Kanị, ndị ile hụn e fen'i wẹ gi ufiri i ghọghọma, ẹfọ ya sụọma wẹ ụsụọ; ndị hụn nzụọpụha ị a sụọ wẹ kumẹ ogẹn ile sị, “Ọghọ ya rịnị Osolobuẹ!”

¹⁷ Mmẹ nwẹn, m nwọn mkpa; Osolobuẹ ya dodo e ro m. Ịyụ e yeni m ẹka, a gbapụhazịkwọ m; Dodo Chuku m, ebielẹ d'e yeni m ẹka.