Ẹbụ-ọma 39 - Ika

Isi Nke Mmitenẹi Kwasị Ọgụn Dodo Mẹ Omikẹn M

Ẹbụ-ọma Defidi. Ye Onyẹ-ndu ẹbụ ẹbụnị — ye Jedutunu ya.

¹ M te sị, “M k'a kpachanpụkwọ ẹnya, kwọndọn ire m amamgbe m'e gi ẹ mẹ njọ; m k'a kwakin ọnụ m, ogẹn ọwụlẹ onyẹ-njọ rị m nsue.”

² Kanị e kpumẹ m nwan ọnụ, gbachanrịn nkịtịn — ekudẹni m ihiẹn rị mma — ihiẹn rị a fụnị m nọ waye.

³ Obi hụ e nwun m ọkụn; m gha e ro ya wụ ihiẹn, obi hụkwọ e nwun m ọkụn; ya m nọ kumẹ:

⁴ “Osolobuẹ dodo, mẹ m marịn kẹ m k'a tọhan, ebe m k'e biru; nị m marịn nị ogẹn m rị a gha ozigbo-ozigbo.

⁵ Y'e mẹgụọ ogẹn m mẹ ntịn kẹ ọb'ẹka mmaka; ogẹn m enwọn k'ọ han ị ẹnya, ndụn ịhịan wụhụ uzun. Sẹla

⁶ Ịhịan wụhụ onyinyọn mmaka; ọlụkpọ a ile wụ ihiẹn mmaka; ọ kpatọ akụ-lẹ-ụba bụ ọ marịn onyẹ k'e nwọnrinn'ẹ.

⁷ Kị m'e gi nwan dọn ẹnya, Osolobuẹ? Ịyụ kẹ m gi dọn ẹnya.

⁸ Zụọpụha m imẹ njọ m ile; emẹkwọlẹ m wụrụ ihiẹn ndị-ẹwobi gi a mụ ẹmụ.

⁹ M te gba nkịtịn, n'a shịapụkọ m ọnụ, makẹni ịyụ mẹ ihiẹnni.

¹⁰ Dodo, fịanbehi m mkpịnsịn; ẹka-ịkpa ị e d'e gbu m.

¹¹ Y'e gi ufiri njọ ịhịan a jụgbọ wẹ, e ye wẹ afụnfụn; y'e ripụ ihiẹn wẹ kpatọ lekẹ ẹkịka — onyẹ-onyẹ wụhụ uzun mmaka. Sẹla

¹² Osolobuẹ dodo nụ ekpere m, gọn ntịn ẹkwan m gi a rịọ ị eyemẹka; agbakwọlẹ m nkịtịn ẹkwan m rị a kwan. Makẹni abịamabịa rị nke i kẹ m wụhụ, otumunyẹ kẹ m wụ — nọkẹ ndị nẹdi m ile.

¹³ Dodo bupụ m ẹnya, nị m mụzị ẹmụ, m gini d'a la, a hụnbehi wẹ m.”