Ẹbụ-ọma 34 - Ika

Isi Nke Mmẹnọ Kwasị Ọgụn Chuku Arịka Mma

Ẹbụ-ọma Defidi, hụn ọ bụ ogẹn o gi gi egun mẹ kẹ sị ẹra rị a pụ a ihun Abimẹlẹkị (eze) Gatị wụ Akishi, hụn Abimẹlẹkị gi chụpụ a, ọ nọ pụ.

¹ M k'a kpanmịn Osolobuẹ ogẹn ile; ọnụ m ajabehikọ a mma.

² Umẹ-ndụn m k'e gi Osolobuẹ a nyan isi; ndị wẹ rị a bịangbu wẹ nụ a ghọghọma.

³ Sọn ni m ja Osolobuẹ mma; nị ẹnyi bushi ni ẹfan a elu.

⁴ M kpọku Osolobuẹ, ọ za m — ọ gbapụha m imẹ ihiẹn ile te rị a tụ m egun.

⁵ Ndị bu ẹnya zinmẹ i k'a rị e gbuke, ifẹnrẹn emẹkọ wẹ.

⁶ Ogbẹnnyẹni a hịghọ, Osolobuẹ nọ za a; ọ zụọpụha a imẹ nsọngbu ẹ ile.

⁷ Mmọn-ozi Osolobuẹ e fihunmẹ ndị hụn a tụ egun Osolobuẹ; ọ gbapụha wẹ a gbapụha.

⁸ Danmịndẹle, n'ị hụn a nị Osolobuẹ a rịka mma; onyẹ hụn gbaburun'ẹ e nwọnkẹ ngọzi.

⁹ Tụ nị egun Osolobuẹ, ụnụ ndị nsọ a, makẹni onwọnni ihiẹn a kọ ndị hụn a tụ egun ẹ.

¹⁰ Ihiẹn a kọghọdẹ ikoro-ẹwọrọ, ẹgụn a gụnghọ wẹ, kanị onwọnni ihiẹn rị mma a kọ ndị e fe Osolobuẹ.

¹¹ Bịa nị, ụmụ m, gọnni m ntịn; m k'a kuzi ụnụ kẹ w'a tụ egun Osolobuẹ.

¹² Onyẹ ọwụlẹ ndụn a sụọ imẹ ụnụ, onyẹ hụn chọ ụtọmị lẹ ihiẹn rị mma,

¹³ ya wepụ eje-oku ire ẹ, ya wepụ ntụ ụgb'ọnụ a.

¹⁴ Ya gbakịtọ eje-ihiẹn azụụn, mẹmẹ ihiẹn rị mma a chọ udọn, a chụsọn ẹ.

¹⁵ Ẹnya Osolobuẹ rị ebe ndị ezi-omumẹ rị, ntịn a rị ẹkwan wẹ;

¹⁶ kanị o bu a nụmanị ndị e mẹ eje-ihiẹn, kẹn'o fichanpụ ẹfan wẹ enu-ụwa.

¹⁷ Ndị ezi-omumẹ yi oro, Osolobuẹ a nụ ukwere wẹ, ọ gbapụha wẹ imẹ nsọngbu wẹ ile.

¹⁸ Osolobuẹ a nọkunmẹ ndị ndụn gụ, a zụọpụha ndị obi rị a gbawapụ.

¹⁹ Onyẹ ezi-omumẹ nwọn ikẹn nwọn nsọngbu bu ọda, kanị Osolobuẹ a zụọpụhachanrịn a imẹ wẹ ile;

²⁰ o chedọnchanrịn ọkpụkpụ hụnyẹ ile, onwọnni akpụ ohu a kpagini.

²¹ Eje-ihiẹn k'e gbu ndị-njọ; ikpe k'a ma ndị-iṅẹnrẹn ndị ezi-omumẹ.

²² Osolobuẹ a gbapụha idibo ẹ; onwọnni onyẹ gbaburun'ẹ ikpe k'a ma.