Ẹbụ-ọma 30 - Ika

Isi Nke Iri Kwasị Ọgụn Osolobuẹ, Darụ-o!

Ẹbụ-ọma Defidi; Ẹbụ wẹ gi kpupụ Ụnọ-nsọ.

¹ M k'a ja ị mma, Osolobuẹ, makẹni i dọpụha m imẹ mgbugbu, y'a nịnị ndị-iṅẹnrẹn m mụ m ẹmụ.

² Euu Osolobuẹ, Chuku m, m kpọ ị d'e yeni m ẹka, ị nọ zụọ m emu.

³ Euu Osolobuẹ, ị nọ wepụha m imẹ ili, y'a nịnị m la imẹ mgbugbu hụ.

⁴ Bụnị nị Osolobuẹ ẹbụ, ụnụ ndị nsọ a; ja nị ẹfan nsọ a mma.

⁵ Makẹni ẹkẹrẹ ogẹn sụọ kẹ olulu ẹ e bie, kanị ndụn kẹ ọhụnma a e ye ịhịan; ẹkwan nwọn ikẹn rịchanrịn uhinhin, kanị eki fọn ụtụntụn, ịghọghọ a bịa.

⁶ Kẹ ẹhụ fu m, m sị enwẹn m, “Onwọnni ogẹn m'e gi mẹhunmẹ.”

⁷ Euu Osolobuẹ, k'i mẹni m ọhụnma, m turu kẹ ugu; kanị y'e bupụ ihun, ndụn a gụ m.

⁸ A kpọku m'i, Osolobuẹ; a kwanghọsị m Onyẹ-nwọnni m n'o mẹni m omikẹn:

⁹ “Elee erere kẹ ọnwụn m k'a ban? M shi imẹ mgbugbu hụ, elee erere k'o k'a ban? Nị ẹjan ja ị mma? Nị ẹjan ku ẹ nwan n'i furu wẹ gi e dọn ẹnya?

¹⁰ Osolobuẹ, dodo gọn ntịn n'i mẹni m omikẹn; Osolobuẹ dodo yeni m ẹka.”

¹¹ Y'e gigụọ itẹn-egu nọkin ẹnya ẹkwan m rị a kwan; y'a gbụpụgụọ m ẹkwa-achọ, yimẹ m ịghọghọ,

¹² kẹni obi m bụn'ị ẹbụ, hụn nkẹ o gi gba nkịtịn. Euu Osolobuẹ hụn wụ Chuku m, m k'a kpanmịn ị jẹnrin ejẹn.