Ẹbụ-ọma 27 - Ika

Isi Nke Ẹsa Kwasị Ọgụn Osolobuẹ Hụ A, Kẹ M K'a Tụnị Egun?

Ẹbụ Defidi

¹ Osolobuẹ wụ ukpẹ m lẹ onyẹ hụn a zụọpụhanị m — onyẹ kẹ m k'a tụ egun ẹ? Imẹ Osolobuẹ kẹ wẹ nọ e che ndụn m nche — onyẹ kẹ m k'a tụ egun ẹ?

² Omẹni ndị-ejẹ a maye m nị wẹ bu m ri, omẹni ndị-iṅẹnrẹn m lẹ ndị iwe m a maye m — wẹ sikọ d'a kpọgburu, dan.

³ Ọsụọn'a nị igunrun ndị-agha kehunmẹ m, obi eferikọ m; ọsụọdẹn'a nị agha bịanị m, obi k'e ruzikwọ m alị!

⁴ Ihiẹn ohu kẹ m'a rịọ Osolobuẹ, ịya kẹ m'a chọkẹnmẹ: ibiri imẹ Ụlọ Osolobuẹ ndụn m ile: e lee kẹ Osolobuẹ mahan mma, a nọ Ụlọ-NSỌ a e ro ẹ, e fe ẹ.

⁵ Makẹni, nsọngbu bịa, n'o chemẹghọ m imẹ Ụlọ a; n'o zuemẹghọ m imẹ Ụlọ-nsọ a, bu m che elu ọmụma jẹn elu.

⁶ O weshi m elu karị ndị-iṅẹnrẹn m fihunmẹni m, a nọ m Ụlọ-nsọ a gi oro ịghọghọ chụnyen'ẹ ẹjan; a bụnị m Osolobuẹ ẹbụ, kpọn'a egu.

⁷ Dodo Osolobuẹ, m kpọku i y'a nụ olu m, y'e mẹ omikẹn m, za m!

⁸ Obi m sị m, “Chọ ihun ẹ!” M rị nwan a chọ ihun i, Osolobuẹ;

⁹ dodo, ezuemẹlẹ ni m ihun i! Egikwọlẹ olulu chụpụ odibo i, nị ịyụ e yeni m ẹka. Dodo, ajụlẹ m mọbụ la m tọ, Chuku hụn a zụọpụhanị m.

¹⁰ Ọsụọn'a nị nẹdi m lẹ nnẹ m la m tọ, Osolobuẹ k'e weri m.

¹¹ Osolobuẹ, dodo kuzi m kẹ w'a gha ụzọ ị, y'e we m a gha ụzọ riẹnni, makẹ ndị-iṅẹnrẹn m.

¹² Ewekwọlẹ m ye ndị-iṅẹnrẹn m gi mẹ ihiẹn sụọnị wẹ: wẹ rị e buokin m ọnụ, a nyannị m isi.

¹³ Omẹni ete gini m dọn nị m k'a hụn ngọzi Osolobuẹ imẹ ndụnnị, nkẹ nke m'a gụ.

¹⁴ Gi Osolobuẹ dọn ẹnya. Turu, y'e kwọndọn obi i, y'e gi Osolobuẹ dọn ẹnya.