Ẹbụ-ọma 25 - Ika

Isi Nke Isẹn Kwasị Ọgụn Osolobuẹ Dodo Gbagharị m, Du M

Ẹbụ Defidi rọ.

¹ Euu Osolobuẹ, ịyụ kẹ m we enwẹn m ye;

² ịyụ wụ Chuku m kẹ m gi dọn ẹnya. Anịlẹ ifẹnrẹn mẹ m, anịlẹ ndị-iṅẹnrẹn m mẹri m.

³ Onwọnni onyẹ gi i dọn ẹnya ifẹnrẹn k'e mẹ, kanị ifẹnrẹn k'e mẹ ndị ihunnaị nwọnlẹni isi.

⁴ Dodo Osolobuẹ, ghọsị m ụzọ ị; zin m kẹ m'a dọn gha ụzọ ị;

⁵ gi ezioku i du m, kuzi m, makẹni ịyụ wụ Chuku m lẹ Onyẹ-nzụọpụha m, ịyụ sụọ kẹ m gi e dọn ẹnya kẹ ụhụọhịn han.

⁶ Osolobuẹ dodo, nyanhan okẹn omikẹn i lẹ ihiẹn-ọsụsụọ ị, makẹni uwẹ kẹ wẹ gi marịn ị ẹdẹi.

⁷ Dodo anyanhanlẹ njọ m mẹ kẹ m rị okoro lẹ ebe m nọsọnmẹ fe isi; gi ufiri ihiẹn-ọsụsụọ ị nyanhan m, makẹni yụ wụ Osolobuẹ a rịka mma.

⁸ Onyẹ rị mma lẹ onyẹ zinrinni kẹ Osolobuẹ wụ; ya haịn o gi a kuzi ndị-njọ ụzọ a.

⁹ O zin ndị welụa enwẹn wẹ alị kẹ wẹ dọn e mẹ ihiẹn rị mma, a kuzi wẹ kẹ wẹ dọn e sọn ụzọ a.

¹⁰ Ụzọ Osolobuẹ ile wụ ihiẹn-ọsụsụọ ihiẹn-ọsụsụọ lẹ ihiẹn wẹ gi e dọn ẹnya — ebe ndị e mẹ ihiẹn Iwu ẹ chọ rị.

¹¹ Euu Osolobuẹ, gi ufiri ẹfan ị gbagharị m njọ m, ọsụọn'a n'o hikẹ.

¹² Onyẹ wụ nwan onyẹ ahụn a tụ egun Osolobuẹ? Osolobuẹ k'e zin ẹ k'o dọn gha ụzọ ọ họtọn'a.

¹³ O k'a rịnị hụnyẹ mma ndụn a ile, ẹbozo ẹ k'e nwọnrin alị wẹ rị.

¹⁴ Ndị a tụ egun Osolobuẹ k'ọ gwa uche ẹ, o mẹ wẹ a ghọta Iwu ẹ.

¹⁵ Osolobuẹ kẹ m bu ẹnya zinmẹ ogẹn ile, makẹni ya sụọ k'e wepụha ụkụ m imẹ ọnyan.

¹⁶ Dodo lee m ẹnya n'i mẹni m omikẹn, makẹni wẹ rị e mẹkpa m ẹhụ bụ mmẹ sụọ rị.

¹⁷ Iroro rị m obi a wayegụọ; dodo, gbapụha m imẹ afụnfụn m.

¹⁸ Lee kẹ wẹ rị a bịangbu m lẹ afụnfụn m rị a ta, n'i wepụ njọ m ile.

¹⁹ Lee ihiẹn ndị-iṅẹnrẹn m barahị lẹzi kẹ iwe m rị e wehan wẹ.

²⁰ Dodo, che ndụn m nche, zụọpụha m; anịlẹ ifẹnrẹn mẹ m, makẹni yụ kẹ m gbọnni.

²¹ Ezioku lẹ obibi kụrụ ọtọ wẹ chemẹ m, makẹni yụ kẹ m gi dọn ẹnya.

²² Chuku dodo, gbapụha ndị Izrẹlụ imẹ nsọngbu wẹ ile!