Ẹbụ-ọma 22 - Ika

Isi Nke Ẹbụọ Kwasị Ọgụn Ẹkwan Onyẹ Rị A Ta Afụnfụn

Wẹ Ye onyẹ-ndu ẹbụ ẹbụnị; wẹ gi olu “Ele ụtụntụn” bụ a. Ẹbụ Defidi rọ.

¹ Chuku m! Chuku m! Kị haịn i gi la m tọ? Kị haịn i gilẹni rị nsue n'ị zụọpụha m?! Kị haịn i gilẹni rị nsue n'ị nụ udẹn m rị a sụn?!

² Euu Chuku m, a kpọku m'i efinaị, y'a zanị; a kpọkuzịkwọ m'ị uhinhin, ẹhụ emẹni m jụụ.

³ Kanị ịyụ wụ Eze, Onyẹ hụn rị nsọ! Ịyụ kẹ ndị Izrẹlụ rị a ja mma;

⁴ ịyụ kẹ ndị nẹdi ẹnyi kanị gi dọn ẹnya — e gi wẹ i dọn ẹnya, ị nọ zụọpụha wẹ!

⁵ A kpọku wẹ i, wẹ nọ hụn isi wanahịn; wẹ gi i dọn ẹnya, o kpuyeni wẹ.

⁶ Kanị m wụhụ ndidọn, ẹlẹzidẹ ịhịan — ịhịan hụ a kpari m, ndị alị hụ e lelịa m!

⁷ Ndị ile hụnnị m hụ a mụ m ẹmụ, a kpari m, e finfinni m isi, a sị,

⁸ “Ọ tụkwasị Osolobuẹ obi! Osolobuẹ ya zụọpụha a nwan! Ya zụọpụha a nwan — ebe o mẹni ihiẹn ẹ asụọka Osolobuẹ!”

⁹ Bụ ịyụ gha ẹfọ nnẹ m wepụha m pẹrẹ; ịyụ mẹ obi ru m alị kẹ m rịdẹ a ra ẹran nnẹ m.

¹⁰ Ịyụ rị e lepụ m ẹnya kẹ m rịdẹ ẹfọ nnẹ m; kete nnẹ m mụlẹ m, ịyụ wụ Chuku m.

¹¹ Dodo, anọtelẹ nwan ebe m rị, makẹni nsọngbu rị nsue, bụ onwọnni onyẹ k'e yeni m ẹka.

¹² Ndị-iṅẹnrẹn e fihunmẹgụọ m kẹ okẹn-efin, okẹn-efin alị Bashanị zeni e fihunmẹgụọ m.

¹³ Wẹ hụ a shịapụnị m ọnụ, rịkẹ ẹwọrọ rị e ri, e dẹn.

¹⁴ Ndụn hụ a gụ m, rịkẹ ebe wẹ rị e hupụ mirin. Ọkpụkpụ m ile e kwọnpụchanrịngụọ. Obi rị m hụ kẹ udẹn, o dẹnhinchanrịngụọ.

¹⁵ Ndụn a gụgụọ m kẹ ite-ụrụa kpọgụ nkụn, ire a nyanrịn m okpo! Y'e bugụọ m che imẹ ẹjan kẹ ndị nwụnnị.

¹⁶ Ndị-iṅẹnrẹn e kehunmẹgụọ m kẹ nkitẹ; itu ndị-ejẹ e kehunmẹgụọ m, dọyịya m ụkụ lẹ ẹka kẹ ẹwọrọ e mẹ.

¹⁷ Nị m saghọdẹ ẹka gụnmarịn ọkpụkpụ m ile; wẹ hụ a gba m ilee, a mụ m.

¹⁸ E keri wẹ ẹwuru ndị m yi — a tụ wẹ mkpọ keri ẹwuru ndị m yi.

¹⁹ Euu Osolobuẹ, yụ nwẹn anọtelẹ ebe m rị; euu Ikẹn m, bịakẹnrin d'e yeni m ẹka!

²⁰ Zụọpụha m, amamgbe w'e gi ọpịa-agha gbu m; zụọpụha ndụn m ẹka nkitẹ ndịnị.

²¹ Zụọpụha m ọnụ ẹwọrọ! Zụọpụha m, amamgbe okẹn-efin ẹra ndịnị e gi mpịn sụngbu m!

²² M k'a gwa umunẹ m ihiẹn i mẹ; m k'a nọ igunrun ndị nke i ja ị mma.

²³ Ụnụ ndị a tụ egun Osolobuẹ, ja nị Osolobuẹ mma! Ụnụ ile Jekọpụ mụ, gbaye n'ẹ! Tụ nị egun ẹ, ụmụ Izrẹlụ ile,

²⁴ makẹni o legberini mọbụ lelịa afụnfụn onyẹ wẹ rị a bịangbu rị a ta; o bupụn'a ihun — ọ zaghọ a k'ọ kwan ẹkwan eyemẹka!

²⁵ M k'e gi ihiẹnni i mẹni m ja ị mma imẹ ozuzu-uku ndị nke i, m k'a nọ idẹnya ndị hụn e fen'i mẹzu nkwa m kwe i.

²⁶ Ndị igbẹnnyẹ k'e ri, rijun ẹfọ; ndị ile e fe Osolobuẹ k'a ja a mma. Obi ụnụ ya rị ndụn jẹnrin ejẹn!

²⁷ Ndị rị ebe ile rị elu-ụwa jẹnkọ d'a nyanhan, femẹ Osolobuẹ; ndị alị ile rị ichẹn-ichẹn k'e fe ẹ.

²⁸ Makẹni, ọkịkị rị ẹka Osolobuẹ; ịya rị a kị alị ile.

²⁹ Wẹ k'e rigụ, hulụan'a isi — kẹ ndị uku ile rị elu-ụwa; ndị ile a nwụnnị k'a kụn'a isi-alị, ndị ile ghalẹni a s'ẹka e dọnmẹ enwẹn wẹ ndụn.

³⁰ Agbọ ndị rị ihun k'e fe Osolobuẹ; agbọ ndị rị ihun k'a nụ banyeni Osolobuẹ.

³¹ O ru, wẹ sikọ d'a gwazị ndị wẹ kelẹni mụ kikẹnni kẹ Osolobuẹ dọn tụnị ndị nke ẹ ụya, nị o mẹgụọ a.