Ẹbụ-ọma 21 - Ika

Isi Nke Ohu Kwasị Ọgụn Osolobuẹ A Za Eze O Tumẹ A Za

Ye onyẹ-ndu ẹbụ ẹbụnị. Ẹbụ Defidi rọ.

¹ Euu Osolobuẹ, eze rị a ghọghọ nị i ye ẹ ikẹn; ọ rị a ghọghọ ọda-ọda makẹni y'e yeọlẹ ẹ mmẹri.

² Y'e yegụọ a ihiẹn obi ẹ chọ — onwọnni ihiẹn ọ rịọ i yelẹn'ẹ! Sẹla

³ Y'e gigụọ ngọzi sị a “alụa”, bu okpu-eze wụchanrịn goru che ẹ isi.

⁴ Ọ rịọ ị dọnmẹ ẹ ndụn, ị nọ dọnmẹ ẹ ndụn — ye ẹ isi-nka, kẹni o rị jẹnrin-ejẹn.

⁵ Mmẹri hụn i yesọnmẹ ẹ e yegụọ a ọghọ ọda-ọda; y'e yegụọ a ọghọ lẹ ikpẹn.

⁶ Y'a gọzigụọ a ngọzi k'a rị jẹnrin ejẹn, mẹ ẹ a ghọghọ ọghọghọ onyẹ hụn ị nọyeni.

⁷ Eze gi Osolobuẹ dọn ẹnya haịn; makẹni Onyẹ hụn Kachanrịnnị nwọn ihiẹn-ọsụsụọ ndị nke ẹ, onwọnni ogẹn eze e gi mẹhunmẹ.

⁸ Ẹka yụ wụ eze k'e kwọndọn ndị-iṅẹnrẹn i ile, ẹka-nni i k'a nwụndọn ndị iwe i.

⁹ Ị pụha, y'e mẹ wẹ ihiẹn okẹn ọkụn e mẹ ihiẹn. Osolobuẹ k'e gi olulu luepụ wẹ; ọkụn a k'e bu wẹ ri.

¹⁰ I k'e gbupụ ụmụ wẹ elu-ụwa, agbọ wẹ ahọdụkọzị.

¹¹ Ọsụọn'a nị wẹ romẹn'i eje-ihiẹn, mama eje-ihiẹn, ọ ghakọ.

¹² Makẹni ị k'a chụkin wẹ azụụn, ogẹn y'e gi bu ụta ị zinmẹ wẹ.

¹³ Osolobuẹ dodo, lihi nwan kpa ikẹn i! Ẹnyi k'e gi ẹbụ ja ikẹn i mma!