Ẹbụ-ọma 2 - Ika

Isi Nke Ẹbụọ Eze Hụn Osolobuẹ Tumẹ

¹ Kị ndị alị ichẹn-ichẹn rị e zuni eje-umẹ? Kị ndị alị ndịnị rị a tụnị iroro la iwi?

² Ndị-nze ụwa rị a kwademẹ, ndị ọkịkị wẹ rị e zu umẹ nị wẹ bunụmanị Osolobuẹ lẹ onyẹ o te udẹn, tumẹ!

³ Wẹ hụ a sị, “Nị ẹnyi tibepụ nị ẹgan wẹ rị ẹnyi olu; nị ẹnyi gbụpụ nị ẹgbụn wẹ rị ẹnyi olu!”

⁴ Kanị, ẹmụ kẹ Onyẹ hụn rị ukpo-eze elu-igwee a mụ — Di-nwọnni-ẹnyi hụ a mụ wẹ ẹmụ.

⁵ Ya kẹ ọ nọ gi iwe jụgbọ wẹ, gi olulu rọn wẹ egun, sị wẹ,

⁶ “E tumẹgụọ m eze m elu ugu Zayọnụ, Ugu nsọ m!!”

⁷ Eze nkẹ sị, “M k'e ku ihiẹn Osolobuẹ ku: Ọ sị m, ‘Ị wụ Nwa m, e họnringụọ m nẹdi i tannị;

⁸ Rịọ m, m k'e mẹ alị ile wụrụ ukuu i; mẹ ebe ile ụwa ru wụrụ nke i.

⁹ I k'e gi ẹka ze kẹ ọkpọ-igwe kị wẹ, tikpọ wẹ rịkẹ ite-ụrụa.’ ”

¹⁰ Ụnụ ndị-nze, nwọnrinkwọ nị nwan uche; ụnụ ndị ọkịkị rị elu-ụwa, a gwagụọkwọ wẹ ụnụ!

¹¹ Gi ni egun fe Osolobuẹ; e gi ni egun Osolobuẹ a ghọghọ.

¹² Gbuni ni nwa a osekpu, amamgbe iwe a bịa a, ụnụ a la ntikpọ ụzọ, makẹni o nwọnkwọ ikẹn bumẹ olulu idẹnmizi! Onyẹ hụn we enwẹn ẹ kwan'a kakwọ mma!