Ẹbụ-ọma 19 - Ika

Isi Nke Mmitenẹi Ihiẹn Chuku Ke Lẹ Iwu Chuku Rị A Ghọsị Ọghọ A Ihiẹn Chuku Ke

Ẹbụ-ọma Defidi Wẹ ye onyẹ-ndu ẹbụ ẹbụnị.

¹ Igwere rị a ghọsị ọghọ Osolobuẹ! Ihiẹn ile rị igwere rị a ghọsị ọrụn ẹka a!

² Efinaị ọwụlẹ wẹ hụ e ku oku ẹ; uhinhin ọwụlẹ wẹ hụ e mẹ wẹ a marịn a.

³ Asụsụ arịa; mkpụrụ-oku arịa; w'a ra nụ olu wẹ —

⁴ kanị ozi wẹ hụ a ghagbarị ụwa ile; w'a nụdẹ ihiẹn wẹ rị e ku ebe ụwa gha. Imẹ igwere kẹ Osolobuẹ rụn ụlọ tọnị ẹnyanwụn;

⁵ hụn nọ kẹ okẹnnyẹ rị a gba ẹkụkwọ — hụn gha ebe wẹ dọnmẹn'ẹ pụla d'a gba ẹkụkwọ, lekẹ ọgba-ọsọ hụn ọsọ rị a dụ.

⁶ Ọ nọ azụụn igwere ohu wa, ọ ghasọnmẹ ụzọ hụn ọ gha — ọ nọ azụụn hụn ẹbọ rọ. Onwọnni ihiẹn ọ ghalẹni a ma.

Iwu Osolobuẹ

⁷ Iwu Osolobuẹ ye ẹnyi zu oke, o bu ndụn e che ịhịan obi; ụmụ-iwu Osolobuẹ ti furuchanrịn wẹ gi e dọn ẹnya, o mẹ ogbori a marịn ihiẹn;

⁸ ihiẹn ndị Osolobuẹ sị ẹnyi mẹ rị mma, w'e mẹ obi a sụọ ịhịan ụsụọ; ihiẹn Osolobuẹ sị ẹnyi e mẹ we ẹnya, ọ shịapụ ịhịan ẹnya;

⁹ Ịtụ-egun Osolobuẹ rị mma, ọ rị jẹnrin ejẹn; ihiẹn Osolobuẹ sị ya ka mma furu wẹ gi e dọn ẹnya, wẹ ile rịchanrịn ọchan.

¹⁰ Uwẹ kadẹ goru mkpa a rị, kẹ ezigbo goru bu ọda; uwẹ kazị mirin-ẹnwụn a sụọ — kadẹ mirin-ẹnwụn wẹ buchelẹni ihiẹn ọzọ hụn rị a gha ọgba mirin-ẹnwụn a tantu.

¹¹ Uwẹ a kuzi odibo i; erere a rịka idọnmẹni wẹ.

¹² Onyẹ a marịnchanrịn mmẹfie ẹ? Gbagharị m mmẹfie m ndị m marịnlẹni!

¹³ Anịkwọlẹ odibo i e mẹ njọ ọ marịngụ, anịkwọlẹ wẹ kị m — kẹni m wụrụ onyẹ zu oke, ghalẹni e mẹ njọ ahụn jọgbu enwẹn ẹ.

¹⁴ Oku-ọnụ m lẹ iroro m wẹ wụrụ hụn y'a nabanhan, Osolobuẹ, Ọmụma m lẹ Onyẹ a gbapụhanị m!