Ẹbụ-ọma 18 - Ika

Isi Nke Mmẹsatọ

Defidi gi oku ndịnị bụnị Osolobuẹ ẹbụ ogẹn ahụn Osolobuẹ gi zụọpụhachanrịngụ a ẹka ndị-iṅẹnrẹn ẹ ile lẹ ẹka Sọlụ. Ọ sị:

¹ Ihiẹn i sụọ m asụọ, Osolobuẹ; ịyụ hụn wụ ikẹn m!

² Osolobuẹ wụ Okẹn-ọmụma e che m nche, ebe m'a gbaban lẹ onyẹ hụn a zụọpụhanị m! Chuku m wụ Okẹn-ọmụma m hụn m'a gbaban, akpaịn m lẹ mpịn a zụọpụhanị m. Ịya wụ ebe m nọ e nwọn nchedọn.

³ Kẹ m kpọku Osolobuẹ, onyẹ ahụn furu w'a ja mma, ọ zụọpụha m ẹka ndị-iṅẹnrẹn m.

⁴ Ọnwụn te kẹn m ẹgbụn, ntikpọ e rukpumẹ m lekẹ okẹn-mirin.

⁵ Alị-mmọn a kụhunmẹ m kẹ ẹgbụn, ọnwụn a kpọ m ihun.

⁶ A nọ m imẹ nsọngbu m kpọku Osolobuẹ; a hị m Chuku m n'o yeni m ẹka. Ọ nọ imẹ Ụlọ-NSỌ a nụ olu m; ẹkwan m e ru ebe ọ rị, ru ẹ ntịn.

⁷ Alị e zinzin, mẹhunmẹ; ugu ile nọ zinzinru alị wẹ ile e mẹhunmẹ makẹni iwe we Osolobuẹ!

⁸ Ẹnwụnrụn hụ a gha a oghoro imi a lọpụha; ọkụn hụn a dụnnị hụ a gha a ọnụ a pụha; ikeke-ọkụn hụ a gha a tụpụha.

⁹ Ọ nọ kewa igwere k'o hidanla; ọ hụ e gi ụkụ e kpọn orukpu kẹ uzunzun.

¹⁰ Chẹrobu k'o nyin, fehẹ, ufere buhẹ ẹ ozigbo-ozigbo lekẹ ẹka-nku.

¹¹ O gi ishi gbọnhunmẹ enwẹn ẹ, orukpu gitọnị e fihunmẹ ẹ.

¹² Amụma rị e beni rị a ibe ihun e bepụha ẹkwan-igwere lẹ ikeke-ọkụn; a wapu orukpu hụ.

¹³ Osolobuẹ nọ gha elu igwere gi akpabọ ku oku; olu Osolobuẹ, Onyẹ hụ Kachanrịnnị, nọ han.

¹⁴ Ọ nọ gba ụta a — gi ẹ chụzịza ndị-iṅẹnrẹn; o gi amụma rị e be ọda-ọda mẹri wẹ okẹn mmẹri.

¹⁵ Akpakalị ohimin nọ pụha ifọn; iyetọ ụwa nọ kpupụ — ogẹn hụ yụ wụ Osolobuẹ gi bigbọ, ogẹn ahụn i gi gi imi kun okẹn uzun ahụn kpu wẹ.

¹⁶ Osolobuẹ nọ gha elu tịnpụ ẹka, kwọndọn m — ọ dọpụha m imẹ mirin ahụn mini.

¹⁷ Ẹrịra k'o dọn gbapụha m ẹka ndị-iṅẹnrẹn hụ zeni lẹ ndị iwe m hụn te karị m ẹka.

¹⁸ Ebe m rị imẹ nsọngbu kẹ wẹ nọ maye m, kanị Osolobuẹ nọ yeni m ẹka.

¹⁹ O wepụha m, bu m che ebe ẹhụ nọ fu m; ọ zụọpụha m makẹni ihiẹn m sụọ a asụọ;

²⁰ ezi-omumẹ m haịn o gi mẹni m'ẹ; ẹka m rị ọchan haịn o gi mẹni m'ẹ.

²¹ Makẹni, m hụ e dọnmẹ Iwu Osolobuẹ; emẹni m njọ ghahanị ịlatọ Chuku m.

²² Iwu ẹ ile rị m ihun ogẹn ile — ẹnya m aghatuni iwu ẹ pụ.

²³ M hụ e bi obibi nwọnlẹni nkọrịanị ẹnya a, e dọnmẹ enwẹn m amamgbe m'e mẹ njọ.

²⁴ Osolobuẹ gi ẹ kụ m ụgwọ ezi-omumẹ m, makẹni ẹka m rị ọchan ẹnya a.

²⁵ Onyẹ kwọnkẹnmẹ nke i, y'a ghọsị a nị y'e mẹyeni onyẹ nke i; onyẹ nwọnlẹni nkọrịanị ẹnya ị, y'a ghọsị a nị yụ nwẹn e nwọn nkọrịanị;

²⁶ onyẹ shịapụchanrịnn'ị ẹfọ, y'a shịapụchanrịnn'a ẹfọ; kanị, onyẹ gi ẹro sọn i, y'e gi uche sọn ẹ.

²⁷ Y'a zụọpụha ndị e welụa enwẹn wẹ alị, kanị y'e wetu ndị weshi enwẹn wẹ elu.

²⁸ Osolobuẹ e mẹ ukpẹ m e nwunsọnmẹ — Chuku m gi ukpẹ a nọkinni m ẹnya ishi.

²⁹ Eyemẹka ị kẹ m'e gi s'ẹka maye igunrun ndị-agha; ikẹn Chuku m kẹ m'e gi s'ẹka fe mgbọn.

³⁰ O mẹ nke Osolobuẹ, ụzọ a zu oke! Ntụ arị oku Osolobuẹ! Osolobuẹ wụ akpaịn hụn e che ndị gbaburun'ẹ nche.

³¹ Eziẹ, onyẹ furuzi w'e fe wezụka Osolobuẹ? Onyẹ wụ Ọmụma wezụka Chuku ẹnyi?

³² Osolobuẹ wụ onyẹ e ye m ikẹn, e mẹ ụzọ m a rịchanrịn mma.

³³ O mẹ ụkụ m a nọ kẹ nke ele, e mẹ m a s'ẹka e jẹn ijẹn elu ugu.

³⁴ Ọ zụn m ọzụnzụn-agha, hụn ẹka m gi a s'ẹka dọdẹ ụta-igwe.

³⁵ Y'e yegụọ m akpaịn ị, gi ẹ zụọpụha m; y'e gi ẹka-nni i e dọnmẹ m, ẹka hụn i welụa e mẹgụọ m wụrụ okẹn-ịhịan.

³⁶ Y'e mẹ ụzọ a shịapụnị m m ghakọnị, amamgbe m'e kpori, dan.

³⁷ A chụ m ndị-iṅẹnrẹn m, chụkunrun wẹ — akụsịnị m d'e ru n'e gbuchanrịn m wẹ.

³⁸ A rụ m wẹ eje-ẹhụ, asazịnị wẹ ẹka lihi ọtọ; a dan wẹ, m nọ zọ wẹ ụkụ.

³⁹ Ịyụ ye m ikẹn m gi lụ agha ahụn; ịyụ mẹ ndị bunụmanị m gbuni m osekpu;

⁴⁰ ịyụ mẹ ndị-iṅẹnrẹn m gbamanị m ọsọ, we ndị iwe m ye m tọdọn ẹkpịrị, m nọ gbuchanrịn wẹ.

⁴¹ A kwan wẹ, a hụnnị wẹ onyẹ a zụọpụhanị wẹ; a hịdẹ wẹ Osolobuẹ, ọ zanị wẹ.

⁴² E gweriẹn m wẹ, e họnrin wẹ uzunzun ufere bukọ; e hupụ m wẹ kẹ ẹpẹtẹ.

⁴³ Y'a zụọpụhagụọ m ẹka alị ndị ahụn mayeni ẹnyi, mẹdẹ m wụrụ onyẹ-isi alị ichẹn-ichẹn — ndị m marịnlẹni hụdẹ e fe m.

⁴⁴ Wẹ nụhụ olu m, a gbaye wẹ m — ndị alị ọzọ hụ a manị m kpakpakpa.

⁴⁵ Ndụn a gụ wẹ, a ma wẹ piripiri gha ebe wẹ te gi dọn ẹnya pụha.

⁴⁶ Osolobuẹ rị ndụn! Ọjịja-mma ya rịnị Ọmụma m gbọnni! Ọghọ ya rịnị Chuku ahụn a zụọpụhanị m;

⁴⁷ Chukuni wụ onyẹ e mẹgwarịnịnị m, hụn we ndị alị ichẹn-ichẹn che okpuru m;

⁴⁸ hụn zụọpụha m ẹka ndị-iṅẹnrẹn m. O mẹgụọ m karị ndị-iṅẹnrẹn m ẹka, y'a gbapụhagụọ m ẹka onyẹ egbu-lẹ-egbu.

⁴⁹ M sikọ nwan d'a ja ị mma, Osolobuẹ — imẹ igunrun ndị alị ichẹn-ichẹn, m k'e gi ẹbụ ja ẹfan ị mma.

⁵⁰ Osolobuẹ e ye eze hụn o tumẹ mmẹri, e yekwasị; o mẹyesọnmẹni onyẹ o tumẹ, hụn wụ Defidi lẹ ebozo ẹ, jẹnrin ejẹn.