Ẹbụ-ọma 17 - Ika

Isi Nke Mmẹsa

Ekpere Defidi Mẹ

¹ Dodo Osolobuẹ, gọn ntịn arịrịọ onyẹ ezi-omumẹ; lee ẹkwan m rị a kwan; gọn ntịn ekpere m — nị ntụ arị m ọnụ!

² Gi ẹka ị ghọsị nị ẹka m rị ọchan; ẹnya ị ya hụnchanrịn ezioku.

³ Y'e lelegụọ obi m; y'e gigụọdẹ abalị bịa d'e kunrun m — y'e lelechanrịngụọ m nke-esi — onwọnni eje-ihiẹn ị hụn. A kwademẹgụọ m obi m n'e gikọ m ọnụ m mẹ njọ.

⁴ O mẹ nke eje-ihiẹn ịhịan e mẹ, e gigụọ m ihiẹn i ku jụ obibi ndị gi ịhịan e mẹ ihiẹn sụọnị wẹ.

⁵ Ụzọ ị sụọ kẹ m'a gha, ụkụ m aghanị imẹ ẹ pụ.

⁶ M rị a kpọku i, Chuku — makẹni i k'a za m; gọn nwan ntịn; nụ nwan ekpere m.

⁷ Ghọsị nwan okẹn ihiẹn-ọsụsụọ ị — ịyụ, hụn e gi ẹka-nni i a zụọpụha ndị hụn gbaburun'i ebe wẹ gbakọnị ndị-iṅẹnrẹn wẹ!

⁸ Chemẹ m rịkẹ nwa-ẹnya ị; bu m zuemẹ okpuru ẹka-nku i

⁹ makẹ ndị njọ hụn rị a mayeni m, ndị-iṅẹnrẹn ẹfọ jọgbu hụn fihunmẹni m!

¹⁰ A kpọkingụọ wẹ obi wẹ, e kukarị enwẹn wẹ.

¹¹ E kunrungụọ wẹ m; e fihunmẹgụọ wẹ m, a chọ ụzọ w'e gi titu m.

¹² Wẹ rịhụ kẹ ẹwọrọ rị a chọ anụ o k'e gburi; kẹ okoro-ẹwọrọ warị n'o gbu anụ!

¹³ Lihi nwan, Osolobuẹ! Maye wẹ; titu wẹ! Gi ọpịa-agha ị zụọpụha m ẹka ndị njọ!

¹⁴ Gi ikẹn i zụọpụha m ẹka ndị nọ ẹrịra, ẹka ndị-ụwa ụgwọ-ọrụn wẹ rị elu-ụwanị! Ịyụ hụn e yejun ndị i bu obi ẹfọ; ụmụ a hụn ri, a latọnị ụmụ-ụmụ!

¹⁵ Kanị mmẹ nwẹn, m jẹnkọ d'a hụn ihun i makẹni m rị ọchan; m tẹnhin, a hụn m ihun i, ẹfọ e jun m.