Ẹbụ-ọma 148 - Ika

Isi Nke Ẹsatọ Kwasị Ọgụn-ẹsa Ihiẹn Ile Chuku Ke, Ja Chuku Mma!

¹ Ja nị Osolobuẹ mma! Ja nị Osolobuẹ mma imẹ elu-igwere; ja n'a mma imẹ-elu.

² Ndị mmọn-ozi ẹ ile, ja n'a mma! Ihiẹn ile rị okpuru ẹ, ja n'a mma!

³ Ẹnyanwụn lẹ ifọn, ja n'a mma; kokisẹ ile rị e tini, ja n'a mma.

⁴ Igwere ka igwere, ja a mma; mirin ile rị imẹ-elu imẹ-elu igwere, ja a mma!

⁵ Wẹ ile jama ẹfan Osolobuẹ mma, makẹni oku-ọnụ a k'o gi ke wẹ.

⁶ Ịya dọn wẹ hụn w'e gi rị jẹnrin ejẹn; o tigụọnị wẹ iwu hụn k'a rị jẹnrin ejẹn.

⁷ Ja nị Osolobuẹ mma elu-ụwa, kẹ anụ uku ndị rị imẹ ohimin kẹ ohimin ile;

⁸ kẹ amụma kẹ ẹkwan-igwere kẹ mirin oyi ọchan wụ sno hụn a kpụkpụrụnị kẹ orukpu kẹ okẹn ufere hụn e mẹ ihiẹn Osolobuẹ ku.

⁹ Ugu lẹ òke ile, ja n'a mma, kẹ osisi ile a mị mkpụrụ kẹ okẹn-osisi sida ile;

¹⁰ anụ-ọfịa lẹ anụ-ụlọ ile, ihiẹn a rịnị lẹ nnụnụ e feni.

¹¹ Ndị-nze lẹ ndị alị ile, ja n'a mma; kẹ ndị-isi kẹ ndị-ọkịkị ile rị elu-ụwa;

¹² ikorọbịa lẹ ịgbagba, ndị ẹgẹdi lẹ ụmụ-ndu.

¹³ Wẹ ile jama ẹfan Osolobuẹ mma, makẹni ẹfan a kachanrịn nke ndị ọzọ; ikpẹn ẹ ka nke elu-ụwa lẹ elu-igwee.

¹⁴ O wepụhagụọnị ndị nke ẹ mpịn hụn a lụnị wẹ ọgụn, ihiẹn wẹ gi ye ndị e mẹ uche ẹ ọghọ, ndị Izrẹlụ, ndị ahụn nọkunmẹn'ẹ. Ja nị Osolobuẹ mma!