Ẹbụ-ọma 145 - Ika

Isi Nke Isẹn Kwasị Ọgụn-ẹsa Chuku Arịka Mma

Ẹbụ Ịja-mma. Ẹbụ Defidi

¹ M k'a ja ị mma, Chuku m hụn wụ Eze; m k'a ja ẹfan ị mma jẹnrin ejẹn.

² M k'a gha a ja ị mma ụhụọhịn ile, a ja ẹfan ị mma jẹnrin ejẹn.

³ Osolobuẹ e hikẹ ogbe; o furu w'a ja mma ọhụnma-ọhụnma! Osolobuẹ wụ Okẹn-ịhịan, w'a ra saẹka ghọta a?

⁴ Agbọ ọwụlẹ k'a gwa hụn lalanị nị y'a rụnka, e ku oku okẹn ihiẹn ị rụnsọnmẹ.

⁵ M k'a gha e ro okẹn ọghọ ị lẹ ikpẹn i lẹ ọrụn-atụmẹnya ị.

⁶ Wẹ k'a gha e ku oku ihiẹn hi-ogbe ị rụnsọnmẹ; m k'a gha e ku ẹ nị y'e hikẹ ogbe.

⁷ Wẹ k'a e ku oku ọhụnma ile bu ọda hụn i mẹ, e gi ezi-omumẹ i a bụshi ẹbụ elu.

⁸ Osolobuẹ e mẹyekẹni ịhịan; o mẹ omikẹn; ara bukẹnrin olulu; o nwọnkẹ ihiẹn-ọsụsụọ.

⁹ Osolobuẹ e mẹni onyẹ ọwụlẹ ihiẹn rị mma; o mẹni ihiẹn ile o ke omikẹn.

¹⁰ Euu Osolobuẹ, ihiẹn ile i ke k'a ja ị mma; ndị e mẹ uche i k'a ja ị mma!

¹¹ Wẹ k'e ku oku ọghọ alị-eze i, ku oku ikẹn i,

¹² kẹni ịhịan ile marịn okẹn ihiẹn ị rụnsọnmẹ lẹ ọghọ alị-eze i.

¹³ Alị-eze i agụkọ; ọkịkị ị k'a tọ gha agbọ pụ agbọ. Osolobuẹ e mẹzuchanrịn nkwa a ile; o nwọn ihiẹn-ọsụsụọ ihiẹn ile o ke.

¹⁴ Osolobuẹ e yeni ndị rị a dannị ẹka; o weli ndị rị imẹ nsọngbu.

¹⁵ Ịyụ kẹ ịhịan ile rị e lee; y'e ye wẹ ihiẹn-oriri o ru ogẹn ẹ.

¹⁶ Ịyụ a shịapụ ẹka e ye ihiẹn ile rị ndụn ihiẹn a gụnnị wẹ, e yejun wẹ ẹfọ.

¹⁷ Osolobuẹ e mẹ ihiẹn ile ọhụnma; o mẹ ihiẹn ile k'o furu.

¹⁸ Osolobuẹ a nọkunmẹ ndị ile a kpọkun'ẹ, ndị ile gi ezioku a kpọku ẹ.

¹⁹ O ye ndị hụn a gbayen'ẹ ihiẹn a gụnnị wẹ; ọ nụ ẹkwan wẹ, a zụọpụha wẹ.

²⁰ Osolobuẹ e che ndị ile ihiẹn ẹ a sụọ nche, kanị, o k'e tikpọ ndị-njọ ile.

²¹ Ọnụ m sikọ d'a ja Osolobuẹ mma; ihiẹn ile rị ndụn wẹ jama ẹfan nsọ a mma jẹnrin ejẹn.