Ẹbụ-ọma 144 - Ika

Isi Nke Ẹnọ Kwasị Ọgụn-ẹsa Chuku Dodo Mẹ Ẹnyi Mẹri

Ẹbụ Defidi.

¹ Ịja-mma ya rịnị Osolobuẹ, Ọmụma hụn e che m nche, Onyẹ hụn a kuzi ẹka m agha, e ye mkpịnsịn-ẹka m ikẹn ọgbọ-agha.

² Onyẹ hụn nwọn ihiẹn-ọsụsụọ m; Ebe m'a gbaban lẹ Onyẹ m'e gbọnni; Onyẹ nzụọpụha m lẹ Akpaịn m. Ịya kẹ m gbọnni. Onyẹ hụn e bu ndị ichẹn-ichẹn e che okpuru m.

³ Euu Osolobuẹ, kị ịhịan wụdẹ nwan i gi e lee ẹ ẹnya ihun? Kị ịhịan mmaka wụdẹ nwan i gi a kpọ a ihiẹn?

⁴ Ịhịan nọhụ kẹ akpụ uzun ohu; K'ọ tọhanlẹ, ọ nọhụ kẹ onyinyọn hụn ghalẹni a tọ.

⁵ Osolobuẹ dodo nupụ igwere i hidan; mẹtụhụ ugu ẹka nị wẹ lọma ẹnwụnrụn.

⁶ Gi amụma chụzịza ndị-iṅẹnrẹn; gba ụtaa ị gi chụzịza wẹ.

⁷ Gha imẹ-elu tịnpụ ẹka ị zụọpụha m; sepụha m imẹ okẹn mirin; gbapụha m ẹka ndị alị ọzọ,

⁸ ndị oku-ọnụ wẹ wụ ntụ-ntụ, hụn a tụ ntụ a kịshini Osolobuẹ ẹka elu.

⁹ Euu Chuku, m k'a bụn'ị ẹbụ ọhụn; m k'e gi ụbọ eriri-iri kpọn'ị egu.

¹⁰ Ịyụ hụn e ye ndị-nze mmẹri, hụn a zụọpụha odibo i wụ Defidi ọnụ eje ọpịa-agha.

¹¹ Tọpụ m, zụọpụha m ẹka ndị alị ọzọ, ndị oku-ọnụ wẹ wụ ntụ-ntụ, hụn a tụ ntụ a kịshini Osolobuẹ ẹka elu.

¹² Zụọpụha ẹnyi, kẹni ụmụ ẹnyi ikẹnnyẹ suepụha, a nọ wẹ kẹ ihiẹn-akụnkụn suegụnị, ụmụ ẹnyi ikpoho a rị kẹ adansụn wẹ tụ ọhụnma hụn wẹ gi chọ obi-eze mma;

¹³ ọban ẹnyi e jun, e ye ẹnyi ihiẹn-oriri ichẹn-ichẹn; atụnrụn ẹnyi a mụ nnụ-uku nnụ-uku mụ nnụ-uku iri nnụ-uku iri mụjun ogige ẹnyi;

¹⁴ ihiẹn-ugbo e jun efin ẹnyi gi e bu ibu azụụn; ndị-iṅẹnrẹn etitukọ mgbọn ẹnyi; akpụnrụnkọ wẹ ndị nke ẹnyi shi alị ọzọ; akwankọ wẹ ụya ụwaya ẹnyi.

¹⁵ Alị ihiẹn rịnị mma ẹnịna e nwọngụọ ngọzi, alị hụn Osolobuẹ wụ Chuku wẹ e nwọngụọ ngọzi.