Ẹbụ-ọma 143 - Ika

Isi Nke Ẹtọ Kwasị Ọgụn-ẹsa Dodo Osolobuẹ, Za M Ekpere!

Ẹbụ-ọma Defidi

¹ Dodo Osolobuẹ, nụ ekpere m; gọn ntịn ihiẹn m rị a rịọ ị, makẹni ị wụ onyẹ wẹ gi e dọn ẹnya lẹ onyẹ ezi-omumẹ, dodo za m.

² Dodo, akpọlẹ mmẹ wụ odibo i kpe, makẹni onwọnni onyẹ rị ndụn hụn rị ọchan ẹnya ị,

³ Eṅẹnrẹn m rị a chụ m; ọ zọkpụkpọgụọ ndụn m tọ alị; o mẹ m e bi ebe gba ishi nọkẹ ndị nwụnhụngụ kete-kete.

⁴ Ya haịn ndụn gi rị a gụ m; obi hụ a nahịn m.

⁵ M hụ a nyanhan mbụ-mbụ; m hụ e ro ihiẹn ile i rụn, e ro ihiẹn ẹka ị rụn.

⁶ M kishi nwan ẹka elu a rịọ ị, e gi obi m ile a chọ ị, nọkẹ alị-ọkpọnkụn rị a chọ mirin. Sẹla

⁷ Osolobuẹ dodo zakẹnrin m, nị ndụn a gụgụọ m. Efepụkwọlẹ m ẹnya, amamgbe m'a laburu ndị rị imẹ ili.

⁸ Eki fọn ụtụntụn y'e mẹ m nụ ukwere ihiẹn-ọsụsụọ ị, makẹni ịyụ kẹ m gi dọn ẹnya. Ghọsị m ụzọ m k'a gha, makẹni e wegụọ m enwẹn m kwan'ị.

⁹ Osolobuẹ dodo zụọpụha m ẹka ndị-iṅẹnrẹn m, n'e gbọngụọnị m'ị.

¹⁰ Kuzi m kẹ wẹ dọn e mẹ uche i, makẹni ịyụ wụ Chuku m; Mmọn ị rị mma ya we m a gha ebe riẹnni.

¹¹ Osolobuẹ dodo, gi ufiri ẹfan ị dọnmẹ m ndụn, gi ezi-omumẹ i wepụha m imẹ nsọngbu.

¹² Gi ufiri ihiẹn-ọsụsụọ ị gbupụ ndị-iṅẹnrẹn m, y'e tikpọ ndị ile chọkọ m isi, nị odibo i kẹ m wụ.