Ẹbụ-ọma 141 - Ika

Isi Nke Ohu Kwasị Ọgụn-ẹsa Nị M Mẹsọnmẹ Mma, E Lee Osolobuẹ

Ẹbụ-ọma Defidi

¹ Dodo Osolobuẹ, m rị a kpọku i; bịakẹnrin d'e yeni m ẹka; dodo, m kpọ ị oku, y'a za m!

² Narịn ekpere m nọkẹ ẹjan nsẹnsi, y'a narịn ẹka m kịshi elu nọkẹ ẹjan-ẹnyasị.

³ Osolobuẹ dodo, butọ onyẹ-nche ọnụ m; e che ụgb'ọnụ m nche amamgbe m'e kufie.

⁴ Anịlẹ eje-ihiẹn la m ẹnya hụn m'e gi sọn ndị-ejẹ mẹmẹ ihiẹn wẹ e mẹ. Anịlẹ m sọn wẹ ri ezigbo ihiẹn-oriri ndị hụ w'e ri.

⁵ Onyẹ ezi-omumẹ ya fịan m ihiẹn, ẹfọma rọ; ya jụgbọ m, udẹn k'ọ wụ m isi. Isi m ajụkọ udẹn-ọma nọ ẹrịra! Kanị ọgụn ọgụn kẹ m'a lụsọn eje-ihiẹn ndị eje-omumẹ e mẹ imẹ ekpere m;

⁶ wẹ k'a gha elu-ugu tụtu ndị-ndu wẹ; ogẹn ahụn, ndị-ejẹ e kweri nị ihiẹn m ku hụghọ mma.

⁷ Wẹ k'a sị, “A kụkpụkpọgụọ wẹ ọkpụkpụ ẹnyi kẹ w'a dụkpọ ẹjan zeni alị-ugbo, tọ mgbọngbọn ili.”

⁸ Kanị Osolobuẹ-nwọnni-ẹnyi, ịyụ kẹ m rị e lee; ịyụ kẹ m gbọnni; alakwọlẹ m tọnị ọnwụn.

⁹ Anịlẹ m dan ọnyan wẹ shitọnị m, ọnyan ndị-ejẹ shitọsọnmẹ.

¹⁰ Ndị njọ wẹ danye ọga ndị ahụn wẹ gi shi ọnyan, mmẹ nwẹn, nị m ghafe pẹrẹ.