Ẹbụ-ọma 139 - Ika

Isi Nke Ohu-arịa Ọgụn-ẹsa Onwọnni Ihiẹn W'e Zuemẹni Osolobuẹ

Ye onyẹ-ndu ẹbụ ẹbụnị. Ẹbụ-ọma Defidi rọ.

¹ Euu Osolobuẹ, y'e lekpọgụọ m, marịn m ru alị.

² Kẹ m nọdị alị-o kẹ m wuzo ọtọ-o, y'a marịnghọ; y'a gha ebe teni a ghọta ihiẹn m rị e ro.

³ Kẹ m pụkọ apụkọ kẹ dinẹ edinẹ, y'a marịnghọ; y'a marịnghọ ihiẹn ile m'e mẹ.

⁴ M gini d'e kudẹ oku, Osolobuẹ, y'a marịngụọlẹ ihiẹn m jẹnkọ d'e ku.

⁵ Y'e kehunmẹgụọ m ihun lẹ azụụn, y'a tụgụọdẹ ẹka ye m ukun.

⁶ Ọmarịnnị ị marịn m e mikẹ, karị m ẹka; ọ nịnị m ghọta kaka!

⁷ Elebe kẹ m gbakọnị Mmọn ị? Elebe kẹ m gbakọn'ị?

⁸ M shi igwere, ị hụ ebẹhụ; m shi alị-mmọn d'e dinẹ, ị hụzị ebẹhụ.

⁹ M zọ ụzọ shi ẹbamịn ọwụwa-ẹnyanwụn mọbụ fetu Ohimin shi ẹbamịn ọdịdan-ẹnyanwụn,

¹⁰ ẹka ị k'a rịzị ebẹhụ e duhunmẹ m, ẹka-nni i gi a kpa ikẹn k'e kwọndọn m.

¹¹ M sị enwẹn m, “Ẹhẹn, ishi k'e zuemẹ m nwan; uhinhin sikọ nwan d'a nọkin ukpẹ, fihunmẹ m,”

¹² ishi enwọndẹ ihiẹn o kpumẹ ẹnya ị, uhinhin nọhụ kẹ efinaị ẹnya ị!!

¹³ Ịyụ kedẹ akụnrụn rị imẹ-imẹ m; ịyụ nyangbama m imẹ ẹfọ-nnẹ m.

¹⁴ A kpanmịn m'ị, makẹni y'e kekẹ m ọhụnma, makẹni i ke m ichẹn; ọrụn-ẹka ị ile wụ ihiẹn a tụ ẹnya, ọhụn we m ẹnya ọhụnma-ọhụnma.

¹⁵ Kẹ ọkpụkpụ m ezueridẹni ẹnya ị kẹ ị rị e mẹmẹ m imẹ ebẹhụ zuerini, kẹ ị rị a kpa m imẹ-imẹ alị ahụn.

¹⁶ Y'a hụnchanrịngụọlẹ ẹhụ m n'i d'a kpụma a; ahụa ole m k'a tọru a rịgụọlẹ ẹkụkwọ ị kẹ m kelẹni bidẹ akpụ-ohu imẹ wẹ.

¹⁷ Euu Chuku, iroro i a rịka m mkpa; e bukẹkwọ wẹ ọda!

¹⁸ M sị nị m gụnma wẹ, wẹ k'a ka ẹjan ọda! M tẹnhin, m hụkwọ ebe ị rị a hụn m!

¹⁹ Euu Chuku, k'ọ rị m, y'e gbupụ ndị njọ! Ndị izighẹni, pụnị nị m!

²⁰ W'e kuja oku i, Osolobuẹ; ndị-iṅẹnrẹn i gi ẹfan ị e mẹ eje-ihiẹn.

²¹ Euu Osolobuẹ, ẹlẹ m'e ze ize ndị hụn e ze ize i? Ẹlẹ m'e legberi ndị hụn e fen'i isi?

²² Ẹghẹẹ, ize wẹ e zeru m alị! M'e weri wẹ kẹ ndị-iṅẹnrẹn m.

²³ Chuku dodo nyọnchan m, kẹn'i marịn obi m; lele m, kẹn'i marịn ihiẹn m rị e ro,

²⁴ n'ị hụn k'o nwọnghọ eje-ihiẹn rị imẹ m, y'e we m gha ụzọ ẹdẹi ahụn.