Ẹbụ-ọma 135 - Ika

Isi Nke Mmisẹn Kwasị Ọgụn-isin Onwọnni Mmọn Nọ Kẹ Osolobuẹ

¹ Ja nị Osolobuẹ mma, ja nị ẹfan Osolobuẹ mma!! Idibo Osolobuẹ, Ja n'a mma!!

² Ụnụ ndị turu ụlọ Osolobuẹ, ndị turu ezi-ọgwa Chuku ẹnyi.

³ Ja nị Osolobuẹ mma, makẹni Osolobuẹ arịka mma; gi ni ẹbụ ja ẹfan a mma, makẹni ihiẹn rị mma rọ.

⁴ Makẹni Osolobuẹ a họrịgụọ Jekọpụ n'ọ wụrụ nke ẹ; ọ họrịgụọ Izrẹlụ n'ọ wụrụ ihiẹn ẹ pụ-ichẹn.

⁵ A marịnghọ m nị Osolobuẹ e hikẹ ogbe, nị Di-nwọnni-ẹnyi ka mmọn ile.

⁶ Ihiẹn ọwụlẹ Osolobuẹ chọ k'o mẹ, kẹ imẹ elu-igwee kẹ elu ụwa kẹ imẹ ohimin ile kẹ imẹ-imẹ alị.

⁷ Ịya e gi orukpu rịkwọrị ebe ụwa ru e buhẹ mirin-ozuzue; ịya e mẹ amụma e be ebe mirin rị e zue, a gha ebe o butọ ihiẹn e wepụha ufere.

⁸ Ịya gbu ụmụ-ibuzọ ile rị alị Ijiptu: kẹ nwa-ibuzọ ịhịan kẹ nke anụ.

⁹ Ọ rụnghọ ihiẹn-nghọsị imẹ alị Ijiptu, ya lẹ ọrụn-atụmẹnya ndị ọ rụn, gi wẹ mẹshi eze Ijiptu wụ Fẹro lẹ ihu ẹ ikẹn.

¹⁰ Ọ nọ tikpọ alị bu ọda, gbu ndị-nze wẹ te a kpa ikẹn:

¹¹ Sihọnụ eze Amọ lẹ Ọgụ eze Bashanị, lẹzi alị-eze ile wẹ lẹ wẹ rị Kenaanị.

¹² Ọ nọ we alị wẹ ye ndị nke ẹ weri, ndị nke ẹ wụ Izrẹlụ.

¹³ Osolobuẹ, ẹfan ị k'a rị jẹnrin ejẹn, agbọ ile k'a nụ ẹfan ị,

¹⁴ makẹni Osolobuẹ k'a tụnị ndị nke ẹ ụya, o k'e mẹ omikẹn idibo ẹ.

¹⁵ Mmọn alị ndị ọzọ e fe wụsọnmẹ siliva lẹ goru, ọrụn-ẹka ịhịan mmaka.

¹⁶ Wẹ nwọn ọnụ bụ w'a ra ku oku; wẹ nwọn ẹnya bụ w'a ra legha ụzọ.

¹⁷ Wẹ nwọn ntịn bụ w'a ra nụ ihiẹn; w'a ra kwọn.

¹⁸ Ndị hụ kpụnị wẹ sikọ d'a nọ kẹ wẹ; ẹrịra kẹ ndị ile gi wẹ dọn ẹnya k'a nọ.

¹⁹ Ikpụlọ Izrẹlụ, ja nị Osolobuẹ mma! Ikpụlọ Ẹrọnụ, ja nị Osolobuẹ mma!

²⁰ Ikpụlọ Livaị, ja nị Osolobuẹ mma! Ụnụ ndị a tụ egun Osolobuẹ, ja nị Osolobuẹ mma!

²¹ Gha nị obodo Zayọnụ ja Osolobuẹ mma, ja nị Onyẹ hụ bi Jerusalẹm mma. Ja nị Osolobuẹ mma!