Ẹbụ-ọma 132 - Ika

Isi Nke Mmẹbụọ Kwasị Ọgụn-isin Onyẹ Ikpụlọ Defidi K'a Kị

Ẹbụ Wẹ Gi E Jẹn Ụlọ-nsọ

¹ Osolobuẹ, dodo nyanhankwọ Defidi lẹ afụnfụn ile ọ ta;

² nyanhan k'o dọn kun Osolobuẹ, kwe ẹ nkwa, k'o dọn kwe Dikẹn ebọn Jekọpụ nkwa,

³ sị, “Abankọ m imẹ ụlọ m; edinẹkọ m bẹdi m;

⁴ aranhịnkọ m ụran; anịkọ m ụran buru m

⁵ d'e ru n'a hụn m ebe Osolobuẹ jẹnkọ d'a nọdị, ebe Dikẹn ebọn Jekọpụ sikọ d'e bi.”

⁶ Ẹfrata kẹ ẹnyi nọ nụ ukwere Ẹkpẹti Osolobuẹ, ẹnyi nọ hụn a ugbo rị obodo Jaarị:

⁷ “Nị ẹnyi jẹn ni nwan ụlọ Osolobuẹ; nị ẹnyi kụ nị isi alị ebahụn ọ tụkwasị ụkụ a.”

⁸ Lihi nwan ọtọ, Osolobuẹ, n'i shi ebe y'a nọ zu ikẹn, ịyụ lẹ ẹkpẹti i gi a ghọsị ikẹn i.

⁹ Ndị nchụn-ẹjan i wẹ yiri ezi-omumẹ rịkẹ ẹwuru; ndị nsọ ị wẹ yi oro ịghọghọ.

¹⁰ Makẹ ufiri odibo i wụ Defidi, dodo ajụlẹ onyẹ hụn i tumẹ.

¹¹ Osolobuẹ kunni Defidi enwẹn ẹ, kwe ẹ nkwa wụ ezioku; o kuhutọkọ ọnụ; ọ sị: “Nwa ẹfọ ị kẹ m jẹnkọ d'e ye ukpo-eze i.

¹² Omẹni ụmụ ị e kwọnkẹnmẹghọ nkwerigbama m lẹ iwu m, hụn m sikọ d'a kuzi wẹ, ụmụ wẹ k'a nọzịkwọ ukpo i kị jẹnrin ejẹn.”

¹³ Osolobuẹ a họrịgụọ Zayọnụ; ịya k'ọ chọ n'ọ wụrụ ebe obibi ẹ: ọ sị,

¹⁴ “Ebeni kẹ m'a nọ zu ikẹn jẹnrin-ejẹn; ebeni kẹ m k'e bi, makẹni ya kẹ m chọ.

¹⁵ M k'e ye ẹ ihiẹn rị a mkpa, ye ẹ ya mmagi-mmagi; m k'e ye ndị igbẹnnyẹ rịn'a ihiẹn-oriri yejun wẹ ẹfọ.

¹⁶ M k'e ye ndị nchụn-ẹjan a nzụọpụha yimẹ wẹ ya nọkẹ ẹwuru; ndị nsọ a k'e yi oro ịghọghọ.

¹⁷ M k'e wepụhanị Defidi eze imẹ Zayọnụ nọkẹ mpịn; e bugụọ m ukpẹ tọnị onyẹ hụn m hukpu udẹn tumẹ.

¹⁸ M k'e yimẹ ndị-iṅẹnrẹn ẹ ifẹnrẹn nọkẹ ẹwuru, kanị okpu-eze rị ya nwẹn isi k'a gha e gbuke.”