Ẹbụ-ọma 119 - Ika

Isi Nke Mmitenẹi Kwasị Ọgụn Isẹn Iwu Osolobuẹ Wụ Ndụn Mbụ

¹ Ngọzi wụ nke ndị e bi obibi nwọnlẹni nkọrịanị, ndị gi iwu Osolobuẹ e bi.

² Ngọzi wụ nke ndị e dọnmẹ iwu Osolobuẹ gi shịanị enwẹn ẹ ẹri, e gi akpakalị obi wẹ e fe Osolobuẹ;

³ ndị ghalẹni e mẹ eje-ihiẹn; kama, w'a ghasọnmẹ ụzọ Osolobuẹ.

⁴ Y'a gwagụọ ẹnyi e dọnmẹ iwu i, e dọnmẹ wẹ ọhụnma-ọhụnma.

⁵ K'ọ rị m, m hụ e mẹ ọdịnalị i tumẹni ẹnyi, e mẹ wẹ ogẹn ile!

⁶ Ogẹn ahụn, ifẹnrẹn emẹkọ m m gha e gi iwu i e lele enwẹn m.

⁷ M k'e gi obi kụrụ ọtọ ja ị mma, ogẹn m'e gi mụnrụn uhi rị mma i yisọnmẹni ẹnyi.

⁸ M k'a gha e mẹ ọdịnalị i tumẹsọnmẹni ẹnyi; dodo, ajụtọkwọlẹ m!

Ẹbụọ

⁹ Nanị kẹ okoro a dọn bigha? Ghahanị i gi ihiẹn i ku e bi.

¹⁰ Obi m ile kẹ m gi e fe i, dodo, anịkwọlẹ m latọ ihiẹn ndị ị sị ẹnyi e mẹ.

¹¹ E bugụọ m ihiẹn i ku che obi m, amamgbe m'e mẹ i njọ.

¹² Ọjịja-mma ya rịn'ị, Osolobuẹ, dodo, kuzi m ọdịnalị i tumẹsọnmẹni ẹnyi.

¹³ M'e gi ọnụ m e kupụha uhi ile gha ọnụ ị pụha.

¹⁴ Imẹ hụn i ku a sụọ m ụsụọ nọkẹ onyẹ nwọn ẹregede akụ-lẹ-ụba!

¹⁵ M k'a gha e ro iwu i, bu ẹnya m che ụzọ ị.

¹⁶ Ọdịnalị i tumẹsọnmẹni ẹnyi k'a gha a sụọ m; azọkọ m ihiẹn i ku.

Ẹtọ

¹⁷ Dodo, mẹ n'ọ rịnị odibo i mma, kẹni m rị ndụn mẹ ihiẹn i ku.

¹⁸ Shịapụ m ẹnya, nị m hụn okẹn-ihiẹn rịsọnmẹ iwu i.

¹⁹ Abịamabịa kẹ m wụ elu-ụwa; dodo, ezuemẹlẹni m iwu i.

²⁰ Ẹgụn uhi i yisọnmẹni ẹnyi a gụn m ogẹn ile, a gụn m ọda-ọda.

²¹ Y'a jụgbọ ndị mpache ahụn wẹ bụ ọnụ, hụn a latọ iwu i.

²² Dodo, napụ m ifẹnrẹn lẹ mkpari wẹ rị a kpari m, makẹni m hụ e mẹ hụn i ku.

²³ Ọsụọn'a nị ndị-isi zuni m eje-umẹ, odibo i k'a rị e ro ọdịnalị i tumẹsọnmẹni ẹnyi.

²⁴ Hụn i ku wụ hụn a sụọnị m; uwẹ a dụn m ọdụn.

Ẹnọ

²⁵ M fiẹnrin nwan alị mọmọmọ; dodo, dọnmẹ m ndụn k'i dọn ku.

²⁶ Mgbe m gi gwachanrịn ị ihiẹn ile, i nọ za m; dodo, kuzi m ọdịnalị i tumẹsọnmẹni ẹnyi.

²⁷ Dodo, mẹ m ghọta iwu i, kẹni m hụn ụzọ e ro ọrụn atụmẹnya ị.

²⁸ M'e d'a kwangbu enwẹn m yeni ụya; dodo, gba m umẹ k'i dọn ku.

²⁹ Dodo wezụkanị m obibi zinrinlẹni, y'e mẹ omikẹn kuzi m iwu i.

³⁰ A họrịgụọ m nị m k'e bi obibi wẹ gi e dọn ẹnya; e bugụọ m uhi i yisọnmẹni ẹnyi che ihun m.

³¹ Euu Osolobuẹ, hụn i ku kẹ m kwọnkẹnmẹ; dodo, egbekwọlẹ ifẹnrẹn ye m ihun!

³² M k'a gha e mẹkẹnrin ihiẹn ndị ị sị ẹnyi e mẹ, makẹni y'e mẹ m e nwọn nghọta e nwọncheni.

Isẹn

³³ Osolobuẹ, dodo kuzi m ọdịnalị i tumẹsọnmẹni ẹnyi, kẹni m mẹsọnmẹ wẹ d'e ru njẹndemẹ.

³⁴ Ye m nghọta, nị m hụn ụzọ e dọnmẹ iwu i, e gi obi m ile e dọnmẹ ẹ.

³⁵ A ghọsị m kẹ m'a dọn dọnmẹ iwu i, makẹni iwu i a sụọ m ụsụọ.

³⁶ Mẹ m bu obi che hụn i ku, ẹlẹ eje-erere!

³⁷ Wepụ ẹnya m ihiẹn nwọnlẹni isi; ka dọnmẹ m ndụn ebe m rị e sọn ụzọ ị.

³⁸ Mẹzuni odibo i nkwa i kwe kẹni wẹ gi ẹ gbaye i.

³⁹ Wepụnị m ụya m rị a tụ egun ẹ, makẹni uhi i ile rịchanrịn mma!

⁴⁰ Lee ẹ, ẹgụn nkuzi i a gụn m a gụn; gi ezi-omumẹ i ye m ndụn.

Isin

⁴¹ Osolobuẹ, dodo mẹ ihiẹn-ọsụsụọ ị ru m ẹka, ya lẹ nzụọpụha ị — nọkẹ kẹ i dọn kwe nkwa,

⁴² kẹni m hụn ihiẹn m'a shịarị onyẹ rị a mụ m ẹmụ; makẹni ihiẹn i ku kẹ m gi e dọn ẹnya.

⁴³ Dodo, ewepụkwọlẹ ezioku ọnụ m, makẹni uhi i kẹ m rị e lee ẹnya;

⁴⁴ ogẹn hụ e dọnmẹsọnmẹ m iwu i jẹnrin e jẹn,

⁴⁵ e mẹshịa ẹhụ, makẹni m hụ e sọnshi iwu i ikẹn.

⁴⁶ A gwama m ndị-nze oku hụn i ku, ifẹnrẹn emẹkọ m;

⁴⁷ a ghọghọ m ni m'e dọnmẹ iwu i, makẹni w'a sụọ m ụsụọ;

⁴⁸ e liyeni m iwu i ẹka, makẹni w'a sụọ m ụsụọ; e rosọnmẹ m iwu i tisọnmẹni ẹnyi.

Ẹsa

⁴⁹ Dodo, nyanhan oku i gwa odibo i hụn i gi nwan mẹ m nwọn olilẹnya.

⁵⁰ Ihiẹn obi gi e ru m alị imẹ nsọngbu m wụ ọnwan: nị nkwa ị e dọnmẹ m ndụn.

⁵¹ Ndị mpache a mụgbugụọ m, kanị alatọkwọnị m nwan iwu i.

⁵² M hụ a nyanhan uhi i yisọnmẹ mbụ-mbụ, Osolobuẹ, e gi ẹ a kasị enwẹn m obi.

⁵³ Olulu ndị-njọ e bu m ọda-ọda, makẹni w'a ra dọnmẹ iwu i.

⁵⁴ Iwu i yesọnmẹ ẹnyi kẹ m gi a bụ ẹbụ ebe ọwụlẹ m bi.

⁵⁵ M hụ a nyanhan ẹfan ị imẹ uhinhin, Osolobuẹ, e dọnmẹ iwu i.

⁵⁶ Ihiẹnni kẹ m'e mẹ: m'e dọnmẹsọnmẹ iwu i.

Ẹsatọ

⁵⁷ Osolobuẹ kẹ m hanrịn; e kweọlẹ m nkwa nị m k'e mẹsọnmẹ ihiẹn i ku.

⁵⁸ Obi m ile kẹ m gi a rịọ ị, dodo, lee m ẹnya ihun k'i dọn ku!

⁵⁹ E lekpọgụọ m obibi m, e hutọgụọ m mẹmẹ hụn i ku.

⁶⁰ M'e mẹ ihiẹn ndị i ku ozigbo-ozigbo, m'a ra lọkpụn.

⁶¹ Ọsụọn'a nị ndị-njọ e gigụọ ụdọ kehunmẹ m, m'a ra zọ iwu i.

⁶² M'e lihi imẹ abalị a ja ị mma makẹ uhi rị mma i yisọnmẹni ẹnyi.

⁶³ M wụ ọwụ ndị ile a tụ egun i, ọwụ ndị ile e dọnmẹ iwu i.

⁶⁴ Ihiẹn-ọsụsụọ ị pụha ifọn elu-ụwa ile, Osolobuẹ, dodo kuzi m iwu i.

Itenẹi

⁶⁵ Y'e mẹkẹni odibo i, Osolobuẹ, rịkẹ k'i dọn ku.

⁶⁶ Ye m ezigbo uche lẹ amamihiẹn, makẹni m kweri iwu i.

⁶⁷ K'i kelẹni ye m afụnfụn, m te kpahukọ akpahukọ; kanị, m'e mẹ nwan ihiẹn i ku.

⁶⁸ Onyẹ rị mma hụn e mẹ mma k'ị wụ! Dodo, kuzi m iwu i.

⁶⁹ Ndị mpache hụ e buokin m ọnụ, kanị m hụkwọ e gi obi m ile e dọnmẹ iwu i.

⁷⁰ Obi wẹ kpọkin akpọkin lekẹ ihiẹn ụtọrọ gbakin, kanị iwu i a sụọ m ụsụọ.

⁷¹ Afụnfụn m ta hụghọ m mma kẹni m mụnrụn iwu i.

⁷² Iwu gha ị ọnụ pụha ka m mkpa karị egho, karị akpụrụ goru lẹ siliva nnụ bu ọda.

Iri

⁷³ Ịyụ ke m, buchesọnmẹ m ụkụ lẹ ẹka, dodo, ye m nghọta, kẹni m mụnrụn iwu i.

⁷⁴ Ndị hụn a tụ egun i k'a hụn m, ghọghọma, makẹni m hụ e gi oku i e dọn ẹnya.

⁷⁵ A marịnghọ m nị ezigbo eṅẹn kẹ y'a han, Osolobuẹ, nị y'e mẹgụọ kẹ onyẹ wẹ gi e dọn ẹnya ebe ị nọ ye m afụnfụn.

⁷⁶ Dodo, gi ihiẹn-ọsụsụọ ị kasị m obi, kẹ i dọn kwe odibo i nkwa.

⁷⁷ Mẹ omikẹn i ru m ẹka, kẹni m rị ndụn; makẹni iwu i a sụọ m asụọ.

⁷⁸ Ifẹnrẹn ya mẹgbu ndị mpache ahụn, makẹni e gigụọ wẹ ẹro buokin m ọnụ; kanị mmẹ nwẹn k'a gha a e rokwọ iwu i.

⁷⁹ Ndị ile a tụ egun i wẹ bịa d'e kunrun m, ndị ile marịn ihiẹn i ku.

⁸⁰ Obi m y'a kụrụ ọtọ ebe idọnmẹ iwu i rị, amamgbe ifẹnrẹn e mẹ m.

Mmanaị

⁸¹ Ndụn a gụn m ebe m rị e che n'i zụọpụha m; ihiẹn i ku kẹ m gi e nwọn olilẹnya.

⁸² Ẹnya hụ a tụrụ m m gi e lee ẹnya ihiẹn i kwe nkwa a, m hụ a sị, “Elee mgbe kẹ y'e gi rọkọ m obi?”

⁸³ M rị nwan kẹ akpụkpọ-anụ wẹ kọnmẹ ẹnya-ọkụn; kanị azọkwọnị m iwu i.

⁸⁴ Nanị kẹ odibo i k'e dinhanzị? Elee mgbe y'e gi ye ndị rị e kpokponi m afụnfụn?

⁸⁵ Ndị mpache e gutọsọnmẹgụọnị m olu; w'a ra dọnmẹ iwu i.

⁸⁶ Ihiẹn ile ị sị ẹnyi e mẹ furu w'e mẹ; ndị iwe rị e kpokpo m bụ onwọnni ihiẹn m mẹ; dodo, yeni m ẹka!

⁸⁷ W'e d'e gbupụdẹ m elu-ụwa, kanị, alatọkwọnị m iwu i.

⁸⁸ Dodo gi ihiẹn-ọsụsụọ ị dọnmẹ m ndụn, kẹni m hụn ụzọ e mẹ hụn gha ọnụ ị pụha.

Mmẹbụọ

⁸⁹ Euu Osolobuẹ, ihiẹn i ku k'a bụn imẹ elu-igwee jẹnrin ejẹn.

⁹⁰ Onyẹ wẹ gi e dọn ẹnya k'ị wụ gha agbọ pụ agbọ; y'e bugụọ elu-ụwa che ebe ọ rị, o turuhụkwọ nwan.

⁹¹ Uhi i ile rịkwọ nwan d'e ru tannị, makẹni ihiẹn ile rị okpuru i.

⁹² Omẹni ẹlẹ hụn iwu i a sụọ m, nkẹ m'a nwụntọgụọ imẹ nsọngbu m.

⁹³ Onwọnni ogẹn m'e gi zọ iwu i, makẹni y'e gigụọ wẹ ye m ndụn.

⁹⁴ M wụ nke i; dodo, zụọpụha m, nị m hụ a lịlịma e dọnmẹ iwu i.

⁹⁵ Ndị-njọ warị e che ni wẹ gbu m, kanị hụn i ku kẹ mmẹ nwẹn e ro.

⁹⁶ A hụngụọ m'a nị ihiẹn ile nwọn ebe wẹ zuru oke, kanị iwu i zuchanrịn oke.

Mmẹtọ

⁹⁷ Euu, Iwu i a sụọka m! Ịya kẹ m'e ro kẹ ụhụọhịn han.

⁹⁸ Iwu i kẹ m gi e nwọnkarị ndị-iṅẹnrẹn m akọ-lẹ-uche makẹni ịya kẹ ẹnya m rị ogẹn ile.

⁹⁹ Mmẹ ka ndị nkuzi m ile ihiẹn a marịn, makẹni m'e ro hụn i ku.

¹⁰⁰ Mmẹ ka ndị isi-ẹwọ ihiẹn a marịn makẹni m'e dọnmẹ iwu i.

¹⁰¹ M'a ra budẹ ụkụ che ụzọ rịlẹni mma, kẹni m hụn ụzọ e mẹ ihiẹn i ku.

¹⁰² M'a ra latọ uhi i, makẹni y'a kuziọlẹ m.

¹⁰³ Ihiẹn i ku a sụọka m ụsụọ ọnụ, sụọkarịdẹ mirin-ẹnwụn!

¹⁰⁴ Iwu i kẹ m gi e nwọn nghọta, ịya haịn ize eje-obibi ile gi e ze m.

Mmẹnọ

¹⁰⁵ Oku i wụ ukpẹ-ẹka m gi a zọye ụkụ lẹ ukpẹ m gi e legha ụzọ.

¹⁰⁶ E kungụọ m ẹfan ị, kunshi ẹ ikẹn, nị m k'a gha e dọnmẹ ezigbo uhi i yisọnmẹni ẹnyi.

¹⁰⁷ A hụnjungụọ m ẹnya; dodo Osolobuẹ, dọnmẹ m ndụn kẹ i dọn ku.

¹⁰⁸ Dodo Osolobuẹ, narịn oyiye ịja-mma gha m ọnụ pụha; y'a kuzi m uhi i.

¹⁰⁹ Ogẹn ile kẹ m gi e bu ndụn m e che ọb'ẹka, kanị m'a ra zọ iwu i.

¹¹⁰ Ndị-njọ e shitọgụọnị m ọnyan, kanị alatọkwọnị m iwu i.

¹¹¹ Oku-ọnụ ị wụ ukuu m jẹnrin ejẹn; uwẹ e mẹ obi a sụọ m ụsụọ.

¹¹² E wepụhagụọ m obi m nị m dọnmẹsọnmẹ iwu i jẹnrin ejẹn.

Mmisẹn

¹¹³ Ndị gi obi-ẹbụọ e sọn i e ze m ize, kanị iwu i a sụọ m asụọ.

¹¹⁴ Ịyụ wụ ebe m'a warị lẹ akpaịn m gi e che ẹhụ, ihiẹn i ku kẹ m gi rị dọn ẹnya.

¹¹⁵ Pụ nị nị m, ụnụ ndị-njọ nị m hụn ụzọ e mẹ ihiẹn Chuku sị ẹnyi e mẹ!

¹¹⁶ Dodo, dọnmẹ m kẹ i dọn kwe nkwa; kẹni m rị ndụn; anịkwọl'a kpuye m.

¹¹⁷ Dọnmẹ m, makẹ eje-ihiẹn gha e mẹ m, kẹni m hụn ụzọ a gbaye iwu i ogẹn ile.

¹¹⁸ Y'a jụ ndị ile latọ iwu i; ẹro wẹ ile a wụrụ ihiẹn la iwi.

¹¹⁹ Y'e kpọnpụ ndị-njọ ile nọkẹ unyin; ịya haịn hụn i ku gi a sụọ m.

¹²⁰ Ẹhụ hụ a ma m nni yeni egun i; uhi i hụ a tụ m egun.

Mmisin

¹²¹ E mẹgụọ m ihiẹn rị mma lẹ ihiẹn furuni; dodo, ajụkwọlẹ m tọnị ndị rị a bịangbuni m.

¹²² Dodo, biye ẹka kẹn'ọ rịnị odibo i mma; anịkwọlẹ ndị nhọnrọn bịangbu m!

¹²³ Ẹnya e mẹ m bii m gi e lee ẹnya nzụọpụha ị, m gi e lee ẹnya n'i mẹzu nkwa hụ wẹ gi e dọn ẹnya hụn i kwe.

¹²⁴ Dodo gi ihiẹn-ọsụsụọ ị sọn odibo i, y'a kuzi m iwu i.

¹²⁵ Odibo i kẹ m wụ, dodo ye m nghọta kẹni m marịn ihiẹn i ku ru alị.

¹²⁶ Osolobuẹ, dodo mẹhunmẹ nwan, n'e tikpọgụọ wẹ iwu i!

¹²⁷ Eziẹ, iwu i ka m a sụọ karị goru, karịdẹ goru rịgbu enwẹn ẹ mma.

¹²⁸ Ya wụnị iwu i ile rịchanrịn mma ẹnya m, eje-obibi ile e ze m ize.

Mmẹsa

¹²⁹ Hụn i ku a rịka mma, ịya haịn m gi e gi obi m ile e mẹ wẹ.

¹³⁰ Wẹ kọwa oku i, ukpẹ a bịa, o mẹ ogbori a marịn ihiẹn.

¹³¹ M'a shịapụ ọnụ kẹ anụ ẹgụn-mirin rị a gụn makẹni iwu i rị a gụn m.

¹³² Dodo, lee m, n'i mẹni m omikẹn kẹ i dọn e mẹni ndị ile ẹfan ị a sụọ ụsụọ.

¹³³ Dodo, a ghọsị m ebe m'a zọye ụkụ, kẹ i dọn kwe nkwa; anịkwọlẹ njọ ọwụlẹ kị m!

¹³⁴ Gbapụha m ẹka ndị a bịangbu ịhịan kẹni m'e dọnmẹ iwu i.

¹³⁵ Gi ẹnya rị mma lee odibo i, y'a kuzi m iwu i.

¹³⁶ Ẹnya-mirin m hụ e hu nọkẹ iyi, makẹni a rị wẹ e dọnmẹ iwu i.

Mmẹsatọ

¹³⁷ Onyẹ ezi-omumẹ k'ị wụ, Osolobuẹ, uhi i ile kụrụ ọtọ.

¹³⁸ Hụn i ku wụ ihiẹn furuni, wẹ ile wụchanrịn oku onyẹ wẹ gi e dọn ẹnya.

¹³⁹ Iwe e wegbugụọ m, makẹni ndị-iṅẹnrẹn m a latọgụọ ihiẹn i ku.

¹⁴⁰ Ihiẹn i ku a ghọsịgụọ ọda-ọda n'ọ wụ ezioku; ọ sụọ mmẹ wụ odibo i ụsụọ!

¹⁴¹ Onwọnni ihiẹn m wụ, wẹ legberi m elegberi; kanị m'a ra zọ iwu i.

¹⁴² Ezi-omumẹ i wụ ezi-omumẹ hụn k'a rị jẹnrin ejẹn; iwu i wụ ezioku.

¹⁴³ M rị imẹ nsọngbu lẹ ihiẹn-ụfụ, iwu i kẹ ẹfọ gi a sụọ m ụsụọ.

¹⁴⁴ Hụn i ku rị mma jẹnrin ejẹn; dodo, ye m nghọta kẹni m rị ndụn.

Mmitenẹi

¹⁴⁵ Obi m ile kẹ m gi a kpọku i; dodo, za m, Osolobuẹ! M k'e dọnmẹ iwu i.

¹⁴⁶ M rị a kpọku i; dodo, zụọpụha m nị m hụn ụzọ e mẹ hụn i ku.

¹⁴⁷ M'a zọtẹnhin a kpọku i n'i yeni m ẹka; ihiẹn i ku kẹ m gi e dọn ẹnya.

¹⁴⁸ M'a mụ ẹnya eki e we fọn, e ro ihiẹn i ku.

¹⁴⁹ Gi ufiri ihiẹn-ọsụsụọ ị nụ ẹkwan m! Osolobuẹ, dodo dọnmẹ m ndụn kẹ uhi i dọn ku!

¹⁵⁰ Ndị rị a chọ eje-ihiẹn w'e mẹ a nọzụnhangụọ; enwọndẹ wẹ efe iwu i.

¹⁵¹ Ị rị nsue, Osolobuẹ, ihiẹn ile ị sị ẹnyi e mẹ wụchanrịn ezioku.

¹⁵² O tekẹ m gi ihiẹn i ku ghọta nị i ku wẹ nị wẹ rị jẹnrin ejẹn.

Ọgụn

¹⁵³ Dodo, lee afụnfụn m rị imẹ ẹ, n'ị zụọpụha m, makẹni azọnị m iwu i.

¹⁵⁴ Dodo kuni m ọnụ m n'ị gbapụha m; dọnmẹ m ndụn kẹ i dọn kwe nkwa!

¹⁵⁵ Nzụọpụha erukọ ndị-njọ ẹka makẹni w'a ra dọnmẹ iwu i.

¹⁵⁶ Osolobuẹ y'e mẹkẹ omikẹn; dodo, dọnmẹ m ndụn kẹ uhi i dọn ku!

¹⁵⁷ Ndị rị e kpokponi m lẹ ndị-iṅẹnrẹn m bu ọda, kanị alatọkwọnị m hụn i ku.

¹⁵⁸ M lee ndị ghalẹni e gi oku Osolobuẹ e dọn, ize hụ e ze m, makẹni w'a ra dọnmẹ iwu i.

¹⁵⁹ Ledẹ kẹ iwu i dọn a sụọ m, Osolobuẹ dodo, gi ufiri ihiẹn-ọsụsụọ ị dọnmẹ m ndụn!

¹⁶⁰ Ihiẹn ile i ku wụ ezioku, uhi ndị ahụn ile rị mma i yi k'a rị jẹnrin ejẹn.

Ohu Kwasị Ọgụn

¹⁶¹ Ndị okẹn ịhịan rị e kpokpo m, bụ onwọnni ihiẹn m mẹ; kanị egun ihiẹn i ku rịkwọ m obi.

¹⁶² Ihiẹn i ku e mẹ m a ghọghọ nọkẹ onyẹ hụn okẹn akụ-lẹ-ụba o k'a kwarị.

¹⁶³ Ntụ e ze m ize, m'a ra gidẹ ẹnya hụn a! Kanị, iwu i a sụọ m ụsụọ.

¹⁶⁴ Mgbe ẹsa kẹ m'a ja ị mma ụhụọhịn yeni uhi rị mma i yisọnmẹni ẹnyi.

¹⁶⁵ Ndị iwu i a sụọ kẹ obi e ruchanrịn alị; onwọnni ihiẹn a saẹka e mẹ wẹ a kpọgburu.

¹⁶⁶ M hụ e che i n'ị zụọpụha m, Osolobuẹ; m hụ e dọnmẹ iwu i.

¹⁶⁷ M hụ e gi obi m ile e mẹ hụn i ku, m'a ra gi ẹ gu egu.

¹⁶⁸ M hụ e dọnmẹ iwu i lẹ oku gha ị ọnụ pụha; y'a marịnchanrịngụọ kẹ m'e bi.

Ẹbụọ Kwasị Ọgụn

¹⁶⁹ Osolobuẹ dodo, nụ ẹkwan m rị a kwan! Dodo ye m nghọta k'i dọn ku.

¹⁷⁰ Dodo, nụ ihiẹn m rị a rịọ ị; zụọpụha m kẹ ị dọn kwe nkwa!

¹⁷¹ Ẹbụ k'e jun m ọnụ, makẹni ị hụ a kuzi m iwu i.

¹⁷² Ire m ya gi ihiẹn i ku bụsọnmẹ ẹbụ, makẹni ihiẹn ile ị sị ẹnyi e mẹ furu w'e mẹ.

¹⁷³ Dodo, tịnpụ ẹka ị yeni m ẹka makẹni iwu i kẹ m hanrịn.

¹⁷⁴ M rị e che i n'ị zụọpụha m, Osolobuẹ, iwu i a sụọ m ụsụọ.

¹⁷⁵ Nị m rị ndụn, kẹni m ja ị mma; iwu i ya yezikwọnị m ẹka.

¹⁷⁶ A kpahugụọ m nọkẹ atụnrụn tuhuni; dodo chọha odibo i, nị azọnị m iwu i.