Ẹbụ-ọma 109 - Ika

Isi Nke Itenẹi Kwasị Ọgụn-isẹn E Gigụọ Wẹ Njọ Kụ M Mma!

Ye onyẹ-ndu ẹbụ ẹbụnị. Ẹbụ Defidi rọ.

¹ Chuku hụn m'a ja mma, dodo, agbakwọlẹ nkịtịn!

² Makẹni, ndị ẹfọ-njọ lẹ ndị-ntụ e kujagụọ oku m, e buokingụọ wẹ m ọnụ.

³ Wẹ hụ e kuja oku m ụzọ ile makẹni iwe m rị e we wẹ; e bu wẹ nụmanị m bụ onwọnni ihiẹn m mẹ.

⁴ Ịma m ikpe kẹ wẹ gi a kụ m ụgwọ ihiẹn-ọsụsụọ, kanị ekpere kẹ m'e mẹ.

⁵ Wẹ hụ e gi njọ a kụ m mma, e gi iwe a kụ m ụgwọ ihiẹn-ọsụsụọ!

⁶ Bu oku onyẹni che ẹka eje-ịhịan; onyẹ k'e buokin ẹ ọnụ ya turuye ẹ ẹka-nni!

⁷ Ikpe wẹ k'e kin ẹ ya ma a; ekpere ẹ ya wụrụdẹ njọ!

⁸ Ya nwụnchu; onyẹ ọzọ ya weri ọkwa a!

⁹ Ụmụ a wẹ wụrụ ndị nwọnlẹni nẹdi; nwunyẹ a wụrụ okpoho di nwụnnahịn!

¹⁰ Ụmụ a wẹ wahunmẹmẹ ọwahunmẹ-ọwahunmẹ, rịọsọnmẹ ụrịọ; wẹ gha mkpọkọ ụlọ ahụn wẹ bi chọsọnmẹ ihiẹn w'e ri ebe teni!

¹¹ Ndị-ụgwọ wẹ shin'ẹ ọnyan kwarị ihiẹn ile o nwọn; ndị ọ marịnlẹni wẹ kpọnrin ihiẹn ẹ ile.

¹² W'a hụnlẹ onyẹ k'e mẹn'ẹ ọhụnma; w'a hụnlẹ onyẹ k'e mẹ omikẹn ụmụ ọ latọ.

¹³ Ụmụ a ile wẹ nwụnhụnchanrịn; ẹfan wẹ y'a gụ agbọ lalanị gini d'a pụha!

¹⁴ Osolobuẹ ya nyanhan njọ ndị nẹdi ẹ wẹ; ya agbagharịlẹ njọ nnẹ ẹ mẹ.

¹⁵ Osolobuẹ ya nyanhansọnmẹ njọ ndị ahụn ogẹn ile, kanị w'a nyanhanzịlẹ wẹ lẹ enwẹn wẹ elu-ụwa!

¹⁶ Makẹni onwọnni ogẹn ya wụ okẹnnyẹ gi nwọn ihiẹn-ọsụsụọ; ọchụchụ-ọchụchụ k'ọ chụsọnmẹ ndị ụya rị e ri lẹ ndị elu rị a fụ lẹ ndị ndụn gụ, kẹni o gbu wẹ.

¹⁷ Ọnụ-ọnụ k'ọ bụ; ya wụrụ onyẹ wẹ bụ ọnụ! Onwọnni ogẹn o gi sụọ a n'ọ rịnị ndị ọzọ mma; ihiẹn rị mma ya gban'a ọsọ!

¹⁸ Ịbụ-ọnụ k'o yi nọkẹ ẹwuru; ya dẹnban a ẹhụ rịkẹ mirin, dẹnbandẹ a ụmị ọkpụkpụ rịkẹ ofigbọn!

¹⁹ Ya kpumẹchanrịn a kẹ ẹkwa ịhịan gi fụrụ oyi! Ya rịsọnmẹ ẹ ukun kẹ akpụkpọ hụn ịhịan gi e kẹnmẹ ukun!

²⁰ Osolobuẹ ya gi wẹ ile kụ ndị rị e buokin m ọnụ ụgwọ, ndị rị e kuja oku m kẹni wẹ gbu m!

²¹ Kanị, Di-nwọnni-ẹnyi Osolobuẹ, dodo, gi ufiri ẹfan ị mẹyeni m, gi ufiri ihiẹn-ọsụsụọ ị rịgbu enwẹn ẹ mma gbapụha m.

²² Mmẹ nwẹn, m rị e ri ụya, elu rị a fụ m; e tiwagụọ wẹ m akpobi.

²³ M'e d'e fopụ kẹ onyinyọn ẹnyasị; e fechanpụgụọ wẹ m kẹ nwa otutu.

²⁴ Ụkụ rị nwan a ma m gẹgẹgẹ yeni ibu-ọnụ; e fiechanrịngụọ m ẹhụ.

²⁵ Wẹ rị nwan a mụ m ẹmụ; wẹ hụn m, e finfin wẹ isi!

²⁶ Dodo yeni m ẹka, Osolobuẹ wụ Chuku m! Gi ufiri ihiẹn-ọsụsụọ ị zụọpụha m,

²⁷ kẹni wẹ gi ẹ marịn nị ẹka ị rọ, nị ịyụ lẹ enwẹn i wụ Osolobuẹ mẹ ẹ.

²⁸ Wẹ bụma ọnụ k'ọ sụọ wẹ, ọgọzi k'i jẹnkọ d'a gọzi m! Wẹ buhụ nụmanị m mmaka, ifẹnrẹn k'e mẹgbu wẹ, kanị ọghọghọ kẹ odibo i k'a ghọghọ.

²⁹ Ifẹnrẹn ya kpumẹ ndị rị e buokin m ọnụ kpumẹ wẹ nọkẹ ẹkwa, ezigbo ifẹnrẹn ya kpumẹchanrịn wẹ rịkẹ ẹwuru tueru alị!

³⁰ M k'e gi ọnụ m kpanmịn Osolobuẹ ọhụnma-ọhụnma; m k'a nọ ozuzu ndị nke ẹ ja a mma,

³¹ makẹni ọ nọ ndị wẹ rị a bịangbu e ye azụụn, kẹni ọ zụọpụha wẹ ẹka ndị rị a ma wẹ ikpe ọnwụn.