Ẹbụ-ọma 108 - Ika

Isi Nke Ẹsatọ Kwasị Ọgụn-isẹn Nị Ẹnyi Mẹrighọ Ghahanị Ikẹn Osolobuẹ!

Ẹbụ Defidi

¹ Euu Chuku, a kwademẹgụọ m obi m! M k'e gi obi m ile bụ ẹbụ, kpọ egu!

² Ụbọ mmaka lẹ ụbọ-layẹ, tẹnhin ni! M k'a kpọtiẹndẹ ụtụntụn!

³ Osolobuẹ, m k'a kpanmịn ị imẹ alị ndị ọzọ; m k'a kpọn'ị egu imẹ alị ndị ọzọ.

⁴ Makẹni ihiẹn-ọsụsụọ ị kadẹ igwere elu ejẹn; k'i mẹhan onyẹ wẹ gi e dọn ẹnya ka orukpu rị igwere elu e jẹn.

⁵ Chuku dodo, mẹ ọghọ ị pụha ifọn imẹ elu-igwere; ọghọ ị ya pụhazịkwọ ifọn elu-ụwa ile,

⁶ kẹni ẹnyi ndị i bu obi hụn ụzọ wanahịn; dodo, za m oku gi ẹka-nni i zụọpụha m.

⁷ Chuku e kwegụọ nkwa nọkẹ onyẹ rị nsọ, sị, “M k'e mẹri wẹ ile: m k'e keni ụnụ alị Shẹkẹm, e kezikwọnị m ụnụ ọdanmgbugbu Sukọtụ.

⁸ Ẹgbẹrẹ Gilẹdị wụ nke m; alị ebọn Manasẹ wụzịkwọ nke m; ndị Ifrem wụ okpu-agha m, ndị Juda wụ ọkpọ-eze rị m ẹka.

⁹ Kanị, alị Mụabụ wụhụ afẹrẹ m gi a kwọ ẹka; Ẹdọm kẹ m'a tụye akpụkụ m; m k'e mẹri ndị Filistia, yi oro mmẹri!”

¹⁰ Onyẹ k'e wejẹn m d'e mẹri obodo hụ wẹ tụnhunmẹ mgbọn? Onyẹ wejẹnkọ m d'e mẹri Ẹdọm?

¹¹ Chuku, y'a jụtọgụọnị ẹnyi? Y'a ra sọnzi ndị-agha ẹnyi jẹn agha!

¹² Dodo, yeni ẹnyi ẹka makẹ ndị-iṅẹnrẹn, nị eyemẹka ịhịan enwọn ihiẹn o k'e mẹni ẹnyi.

¹³ Ebe Osolobuẹ nọyeni ẹnyi, ẹnyi k'a kpa ikẹn, mẹri. O k'a zọgbu ndị-iṅẹnrẹn ẹnyi.