Ẹbụ-ọma 107 - Ika

Isi Nke Ẹsa Kwasị Ọgụn-isẹn Nkebe Nke Isẹn Kpanmịn Nị Osolobuẹ, N'ọ Mẹkẹ

¹ Kpanmịn nị Osolobuẹ, n'ọ rịka mma, o nwọnsọnmẹ ihiẹn-ọsụsụọ jẹnrin ejẹn!

² Ndị hụn Osolobuẹ gbapụha, wẹ ku ẹ, ndị ahụn ọ gbapụha ẹka eṅẹnrẹn;

³ ndị hụn ọ gha alị ndị-ọzọ wekinhẹn: kẹ ibe ọwụwa ẹnyanwụn kẹ ibe ọdịdan ẹnyanwụn kẹ alị ndị rị ẹbamịn-ugu kẹ ndị rị ibẹka Ohimin!

⁴ O nwọn ndị te rị a wahunmẹ imẹ atụ nwọnlẹni ihiẹn rịn'a, ahụnnị wẹ ụzọ ọwụlẹ pụ obodo ọwụlẹ w'e bi.

⁵ Ẹgụn ihiẹn-oriri lẹ ẹgụn-mirin hụ a gụn wẹ, e te sụọhịdẹ wẹ.

⁶ A kpọku wẹ Osolobuẹ imẹ nsọngbu hụ, ọ nọ zụọpụha wẹ imẹ eje-ọnọdị wẹ.

⁷ Ọ nọ duru wẹ ghashi ụzọ rị mma d'e ru obodo wẹ k'e biri.

⁸ Wẹ kpanmịn nwan Osolobuẹ makẹ ihiẹn-ọsụsụọ a, lẹ ọrụn-atụmẹnya ọ rụnsọnmẹni ịhịan.

⁹ O yejun ndị ẹgụn-mirin rị a gụn ẹfọ; o gizikwọ ihiẹn rị mma e yejun ndị ẹgụn ihiẹn-oriri rị a gụn ẹfọ!

¹⁰ O nwọnghọ ndị te rị imẹ ishi lẹ ụya, ndị rị imẹ afụnfụn lẹ ẹgan,

¹¹ makẹni a pagụọ wẹ oku Chuku, makẹni e lelịagụọ wẹ oku Onyẹ ahụn Kachanrịnnị gwa wẹ.

¹² O gi nsọngbu welụa wẹ alị, a dan wẹ, onwọnni onyẹ e yeni wẹ ẹka.

¹³ Ya wẹ nọ kpọku Osolobuẹ imẹ nsọngbu wẹ, ọ nọ zụọpụha wẹ imẹ nsọngbu wẹ;

¹⁴ ọ wepụha wẹ imẹ ishi lẹ ụya ahụn wẹ rị, tibepụchanrịn ẹgan wẹ.

¹⁵ Wẹ kpanmịn nwan Osolobuẹ makẹ ihiẹn-ọsụsụọ a, makẹ ọrụn-atụmẹnya ọ rụnsọnmẹni ịhịan.

¹⁶ O tikpọpụ ọnụ-mgbọn igwe-bronzu, kpagipụ igwe wẹ gi fidọnsọnmẹ wẹ!

¹⁷ Ụfọdụ e zuzu mẹ njọ, afụnfụn nọ bịanị wẹ;

¹⁸ ẹfọ nọ kpakinchanrịn wẹ, e ruchanrịn wẹ mgbọngbọn ili.

¹⁹ Ya wẹ nọ kpọku Osolobuẹ imẹ nsọngbu wẹ, ọ zụọpụha wẹ imẹ nsọngbu wẹ,

²⁰ o zi oku-ọnụ a, gi ẹ gwọ wẹ ọrịa, zụọpụha wẹ ẹka ọnwụn.

²¹ Wẹ kpanmịn nwan Osolobuẹ makẹ ihiẹn-ọsụsụọ a, makẹ ọrụn-atụmẹnya ọ rụnsọnmẹni ịhịan.

²² Wẹ chụnyesọnmẹn'ẹ ẹjan w'e gi a kpanmịn a; wẹ yimẹ oro ịghọghọ e ku ihiẹn ndị ọ rụn!

²³ Nke ndị hụn gi ụgbọ-mirin a gba elu ohimin, a zụ afịa wẹ elu mirin migbu enwẹn ẹ,

²⁴ wẹ nwẹn a hụnzịghọ ihiẹn Osolobuẹ rụn ebẹhụ, ọrụn atụmẹnya ọ rụn elu Ohimin migbu enwẹn ẹ:

²⁵ k'o dọnmẹ gi oku-ọnụ mẹ okẹn ẹbi kpọma Ohimin, mirin Ohimin e bulimẹ elu.

²⁶ Mirin hụ e bushi ụgbọ ndị ahụn imẹ-elu imẹ-elu, e butuchanrịn wẹ imẹ-imẹ ohimin; obi a nahịnchanrịn wẹ yeni eje-ọnọdị wẹ;

²⁷ wẹ hụ e ruehunmẹ, a danhunmẹ, rịkẹ ndị manya rị a tụ, onwọnzini ihiẹn wẹ marịn wẹ k'e mẹ.

²⁸ Ya wẹ nọ kpọku Osolobuẹ imẹ nsọngbu wẹ, ọ nọ wepụha wẹ imẹ eje-ọnọdị wẹ:

²⁹ ọ kụsị ẹbi ahụn rị a kpọnị, ẹbiri ohimin ahụn e mẹ jụụ.

³⁰ A ghọghọ wẹ nị mirin e mẹ jụụ; o du wẹ ru ebẹhụ wẹ shikọ.

³¹ Wẹ kpanmịn nwan Osolobuẹ makẹ ihiẹn-ọsụsụọ a, makẹ ọrụn atụmẹnya ọ rụnsọnmẹni ịhịan.

³² Wẹ ja a mma imẹ ozuzu ndị nke ẹ; wẹ ja a mma imẹ ọgwa ndị-isi!

³³ O mẹ iyi a tahịchanrịn e họnrin atụ, e gi isi-mirin e họnrin alị-ọkpọnkụn;

³⁴ O wiwi alị te e mẹ ihiẹn ọhụnma, o họnrin alị-nnu e gbu ihiẹn-ugbo, ufiri eje-obibi ndị bin'ẹ.

³⁵ Kanị, o mẹzikwọ atụ e họnrin ọgbọ-mirin, e mẹ alị-ọkpọnkụn a wụrụ isi-mirin,

³⁶ o bu ndị ẹgụn che ebẹhụ biri, a tụn w'a biri;

³⁷ a rụn w'a ugbo, kụn alị vaịnị; gi ẹ rụnpụha ihiẹn ugbo.

³⁸ Ọ gọzi wẹ, a mụba wẹ; ọ nịnị igwe efin wẹ belụa.

³⁹ Kẹ wẹ gbubelụa wẹ, welụa wẹ alị, ghahanị ọbịangbu lẹ nsọngbu lẹ ụya ichẹn-ichẹn,

⁴⁰ Osolobuẹ nọ welụa ndị-ọkịkị bịangbuni wẹ alị, mẹ wẹ wahunmẹmẹ imẹ atụ ụzọ rịlẹni;

⁴¹ kanị ọ gbapụha ndị ụya rị e ri imẹ eje-ọnọdị, mẹ ikpụlọ wẹ ba ụba rịkẹ ihiẹn-uriri.

⁴² Ndị ezi-omumẹ hụn ihiẹnni, ẹfọ a sụọma wẹ ụsụọ, ndị-mmẹgbu ile e kpumẹ ọnụ!

⁴³ Ndị marịn ihiẹn wẹ rokpọ ihiẹn ndịnị wẹ, wẹ lekpọ ihiẹn-ọsụsụọ Osolobuẹ.