Ẹbụ-ọma 105 - Ika

Isi Nke Isẹn Kwasị Ọgụn-isẹn Osolobuẹ Lẹ Ndị Nke Ẹ

¹ Ye ni Osolobuẹ ekele; kpọku n'ẹ; gwa nị alị ndị ọzọ ihiẹn o mẹ.

² Bụ nị n'a ẹbụ; kpọ nị n'a egu ịja-mma; ku ni oku ọrụn-atụmẹnya a.

³ E gini ẹfan a rị nsọ a nyan isi; obi ya sụọma ndị ile a chọ ihun Osolobuẹ ụsụọ.

⁴ A chọ nị Osolobuẹ lẹ ikẹn ẹ; a rịọn'a ogẹn ile.

⁵ Nyanhankwọ nị ọrụn-atụmẹnya ọ rụn, ihiẹn ile o gi ghọsị ikẹn ẹ lẹ eṅẹn ile o gi ọnụ a han,

⁶ ụnụ ụmụ Ebraham odibo ẹ, ụmụ Jekọpụ, onyẹ ahụn ọ họrị.

⁷ Ịya wụ Osolobuẹ, Chuku ẹnyi; elu-ụwa ile hụ a hụn ẹka a.

⁸ Ọ nyanhansọnmẹ nkwa o kwe jẹnrin ejẹn; ọ nyanhan oku ahụn gha a ọnụ pụha d'e rudẹ agbọ nnụ-uku:

⁹ ọ nyanhan nkwa hụ rị ẹgbata ya lẹ Ebraham, nkwa ohu hụ o kun enwẹn ẹ kwe Aziki.

¹⁰ O ru ẹka Jekọpụ, o kwedọnzi ẹ nkwa ahụn, gi ẹ họnrin iwu; o kwezi ndị Izrẹlụ ya, gi ẹ họnrin nkwerigbama itẹbitẹ.

¹¹ Ọ sị wẹ, “M k'e ye ụnụ alị Kenaanị, o k'a wụrụ ukuu ụnụ.”

¹² Ebuni wẹ ọda ogẹn ahụn, wẹ wụhụ itumunyẹ alị Kenanị hụ.

¹³ Ọkwahunmẹ kẹ w'a kwahunmẹ, a gha alị e shi alị, a gha alị-eze e shi alị-eze.

¹⁴ Kanị, onwọnni onyẹ Chuku nị bịangbu wẹ; o gidẹ ufiri wẹ a jụgbọ ndị-nze,

¹⁵ sị wẹ “Emẹtụkwọlẹ ni ndị m họrị ẹka! Emẹkwọlẹ ni ndị-amụma m ihiẹn ọwụlẹ!”

¹⁶ Ogẹn o gi sị ụnwụn mụma alị hụ ile, mẹ wẹ ahụnzịlẹ ihiẹn-oriri wẹ te gi dọn ẹnya,

¹⁷ o zi okẹnnyẹ ohu shi Ijiptu d'e buruni ndị nke ẹ ụzọ. Okẹnnyẹ hụ wụ Josẹfụ; orire wẹ re ẹ kẹ igbọn k'o gi jẹn.

¹⁸ Ụkụ a gbụrụ a yeni ẹgan wẹ kpọma a; wẹ kpọma a igwe olu.

¹⁹ Oku Osolobuẹ ku e lelesọnmẹ Josẹfụ d'e ru ogẹn oku Josẹfụ ku mbụ gi mẹzu.

²⁰ Eze Ijiptu nọ zi wẹ wepụha a ụlọ-ngan — eze ahụn kị alị ichẹn-ichẹn wepụha a.

²¹ O bu obi-eze ẹ ile che okpuru ẹ, o we ndị ile wụ nke ẹ ye ẹ kịma;

²² kẹni ọ gwama ndị-ọrụn a ihiẹn wẹ k'e mẹ, kuzimẹ ndị-isi ẹ kẹ w'e mẹ ihiẹn.

²³ Izrẹlụ wụ Jekọpụ nọ bịa alị Ijiptu; Jekọpụ nọ bịa d'e biri alị Ham nọkẹ otumunyẹ.

²⁴ Osolobuẹ nọ mẹ ndị nke ẹ mụba ọda-ọda, mẹ wẹ karị ndị-iṅẹnrẹn wẹ ọda;

²⁵ o mẹ ize ndị nke ẹ ban ndị-iṅẹnrẹn hụ, nke wụnị e gi wẹ ẹro sọn idibo ẹ.

²⁶ Osolobuẹ nọ zi odibo ẹ wụ Mozizi, ya lẹ Ẹrọnụ hụn Osolobuẹ họrị.

²⁷ Wẹ nọ rụnsọnmẹ ihiẹn ọ gwa wẹ, ihiẹn o gisọnmẹ ghọsị ẹka a; a rụnsọnmẹ wẹ ọrụn-atụmẹnya imẹ alị ụmụ Ham hụ:

²⁸ O zi ishi d'a gbagbarị alị ahụn; Mozizi lẹ Ẹrọnụ apanị oku ẹ;

²⁹ o mẹ mirin wẹ họnrin ẹdeke, mẹ azụn wẹ nwụnhụn;

³⁰ o mẹ ẹwọ jun alị wẹ, jundẹ mmughẹ eze wẹ;

³¹ o ku oku, nzinzin lẹ ẹnwụn-nta e jun alị wẹ ahụn ile;

³² o mẹ mirin-ozuzue wẹ họnrin ẹkwan-igwere, amụma e begbarị alị wẹ nọkẹ ọkụn rị e nwunni;

³³ o wiwipụchanrịn osisi vaịnị lẹ figi wẹ, gungwọnpụ osisi ndị rị alị wẹ wụ Ijiptu;

³⁴ o ku oku, igurube nọ bịa, igurube wụ igurube, hụn wẹ ghalẹni a saẹka a gụn —

³⁵ igurube e ripụ ihiẹn ile rị e sue alị ahụn, ripụ ihiẹn ile rị ugbo wẹ.

³⁶ Ya kẹ Osolobuẹ nọ nwan gbuchanrịn ikẹnnyẹ-ibuzọ rị alị wẹ, ụmụ ile wẹ gi obi-ụtụntụn mụ!

³⁷ Ọ nọ wepụha ndị Izrẹlụ wẹ lẹ siliva lẹ goru; onwọnni onyẹ ọwụlẹ ẹhụ rịlẹni ikẹn imẹ ebọn wẹ ile.

³⁸ Ndị Ijiptu nọ ghọghọma nị ndị Izrẹlụ a pụgụọ, makẹni egun wẹ e te tụmagụọ ndị Ijiptu.

³⁹ Osolobuẹ nọ gi orukpu kpumẹ ndị nke ẹ rịkẹ ịhara, ye wẹ ọkụn rị e nwunni w'e gi e legha ụzọ imẹ uhinhin.

⁴⁰ A rịọ w'a, o zihẹni wẹ nnụnụ wụ kwẹlụ, yezi wẹ brẹdi gha elu-igwee bịa mmagi-mmagi.

⁴¹ Ọ gbawa ọmụma, mirin e hupụha, mirin e huru imẹ alị ọkpọ-nkụn.

⁴² Makẹni ọ nyanhan nkwa a ahụn rị nsọ, nkwa hụ o kwe odibo ẹ wụ Ebraham.

⁴³ O wepụha ndị nke ẹ ebẹhụ, e gi wẹ ịghọghọ pụha; ndị ahụn ọ kpọ nke ẹ nọ gi oro ịghọghọ pụha.

⁴⁴ O we alị ndị alị ọzọ rị ichẹn-ichẹn ye wẹ, e weri wẹ ihiẹn ndị alị ahụn rụn.

⁴⁵ O mẹ ẹ kẹni ndị nke ẹ e dọnmẹ uhi ẹ, e dọnmẹ iwu ẹ. Ja nị Osolobuẹ mma!