Ẹbụ-ọma 104 - Ika

Isi Nke Ẹnọ Kwasị Ọgụn-isẹn Chuku, Ihiẹn Ile I Ke Rị Mma!

¹ Obi m, ja Osolobuẹ mma! Osolobuẹ, Chuku m, y'e hikẹ ogbe; ọghọ lẹ ikpẹn wụ ẹwuru i!

² Ukpẹ k'i yi nọkẹ ẹwuru. Ịyụ shịshịapụ igwere rịkẹ okpukpu ụlọ;

³ gi mirin rị orukpu dụnmịn a; orukpu wụ ụgbọ-anyịnyan i gi e jẹn; ufere wụ nku hụn i gi e jẹn.

⁴ Y'e gi ufere e họnrin ndị-ozi i, e gi ọkụn rị e nwunni e họnrin ndị-ọrụn ị.

⁵ Osolobuẹ gbe ụwa ye elu iyetọ a, o mẹhunmẹkọ kaka jẹnrin ejẹn.

⁶ I gi mirin ohimin kpumẹ ẹ rịkẹ ẹkwa, mirin hụn kpumẹ ugu ile.

⁷ Ị nọ bigbọ, mirin ahụn a katapụ ọsọ; ọ gbapụ ogẹn akpara ị gi han;

⁸ o hushi elu ugu, ọ kpọtu ugu huye ọdanmgbugbu; o shi ebe i kwademẹtọn'a.

⁹ Ị nọ tumẹni mirin ohimin ebe o k'e ru, amamgbe o rukpumẹzi ụwa.

¹⁰ Y'e mẹ mirin a wapụha imẹ ọdanmgbugbu, e họnrinsọnmẹ iyi rị e hugha ẹgbata ugu.

¹¹ Mirin hụ kẹ anụ ọfịa ile a ra; uwẹ kẹ jaki-ọfịa gi e gbọn ẹgụn-mirin.

¹² Mkpẹnrẹn-mirin ndị hụ kẹ nnụnụ a kụye ẹkụ, a nọ agala osisi ndị ahụn a bụ ẹbụ.

¹³ Y'a gha ụlọ-elu i a gba elu ugu ichẹn-ichẹn mirin; ihiẹn hụn ị rụnpụha kẹ ụwa gi e rijun ẹfọ.

¹⁴ Y'e mẹ ẹfịfịa e sueni efin, e mẹ ihiẹn-akụnkụn e sue; kẹni ịhịan rụn ugbo hụn ihiẹn-oriri

¹⁵ kẹni ịhịan hụn manya ẹfọ gi a sụọ a ụsụọ kẹni ịhịan hụn udẹn-olivu a kwọ, ihun ẹ e dẹn, kẹni wẹ hụn ihiẹn wẹ e ri ndụn a ban wẹ.

¹⁶ Osisi Osolobuẹ kụn a hụnzịkwọ mirin a ra ọhụnma-ọhụnma okẹn-osisi sida alị Lẹbanọnụ hụn Osolobuẹ kụn.

¹⁷ Nnụnụ ichẹn-ichẹn a kụ ẹkụ e ye elu osisi ndị ahụn; nnụnụ wụ stọkụ a kụzị ẹkụ e ye elu osisi-fẹ ebẹhụ.

¹⁸ Ugu jẹn elu kẹ ewu ọfịa e bi; ebe mẹ ọmụma-ọmụma kẹ ẹlẹtu-ọmụma nkẹ e bi makẹ ihiẹn gha e mẹ ẹ.

¹⁹ Osolobuẹ ke ifọn ye ẹ ogẹn ẹ; ẹnyanwụn nkẹ a marịnzịghọ ogẹn o gi a wa.

²⁰ Y'e mẹ eki e gi e họnrin uhinhin, hụn anụ ile rị ọfịa gi a kpa:

²¹ ikoro ẹwọrọ e dẹnmẹ, a chọ anụ wẹ k'e gburi, a chọ ihiẹn-oriri ẹka Osolobuẹ.

²² Anwụn wama, a laban wẹ okporo wẹ d'e dinẹ,

²³ ịhịan nkẹ a pụha d'a rụnma ọrụn wẹ d'e ru ẹnyasị.

²⁴ Euu Osolobuẹ, ihiẹn i ke e bukẹkwọ ọda! Akọ-lẹ-uche k'i gi ke wẹ ile; ihiẹn i ke e jun elu-ụwa ile.

²⁵ Lee ohimin nkẹ ebeni k'ọ han ogbe lẹ k'ọ shịahan; ihiẹn rị ndụn wẹ ghalẹni a saẹka a gụn rị ebẹhụ, kẹ ndị uku kẹ ndị nta.

²⁶ Ebẹhụ kẹ ụgbọ-mirin uku a gba; ebẹhụ kẹ i ketọ Lẹvịatanị, anụ ahụn hi ogbe, n'ọ nọdị, e gu egu.

²⁷ Ịyụ kẹ ihiẹn ndịnị ile e lee ẹnya, kẹni i ye wẹ ihiẹn w'e ri ogẹn ẹ ru.

²⁸ I ye wẹ ya, a hụn wẹ kpọnrin; ị shịapụ ẹka, a hụn wẹ ihiẹn-oriri rijun ẹfọ!

²⁹ I bupụ wẹ ẹnya, obi e feri wẹ! Ị napụ wẹ uzun wẹ rị e kun, a nwụnhụn wẹ; a lashi wẹ ẹjan wẹ gha bịa.

³⁰ Ịyụ zihẹ Mmọn ị gi ke wẹ; ịyụ e mẹ ihiẹn e pupụhazị alị ogẹn ẹ ru.

³¹ Ọghọ Osolobuẹ ya rịsọnmẹ jẹnrin ejẹn! Ẹfọ ya sụọma Osolobuẹ ụsụọ yeni ihiẹn o ke.

³² Osolobuẹ lehụ ụwa ẹnya, ụwa e zinzinmẹ; o mẹtụhụ ugu ọwụlẹ ẹka, ẹnwụnrụn a lọpụhama!

³³ M k'a bụnị Osolobuẹ ẹbụ e we m nwụn; m k'a kụnị Chuku m egu e we m kwọnbepụ.

³⁴ Osolobuẹ ya dodo nị ihiẹnni m rị e ro sụọ a ụsụọ; Osolobuẹ kẹ mmẹ nwẹn gi a ghọghọ.

³⁵ Wẹ tikpọ ndị-njọ elu-ụwa! Ndị e mẹ eje-ihiẹn wẹ gụchanrịn! Obi m, ja Osolobuẹ mma! Ja nị Osolobuẹ mma!