Ẹbụ-ọma 103 - Ika

Isi Nke Ẹtọ Kwasị Ọgụn-isẹn Ihiẹn-ọsụsụọ Osolobuẹ

Nke Defidi

¹ Obi m, jama Osolobuẹ mma! Ihiẹn ile rị imẹ m jama ẹfan nsọ a mma!

² Obi m, jama Osolobuẹ mma! Azọkwọlẹ ihiẹn ile o mẹn'i:

³ ọ gbagharị ị njọ ị ile; ọ gwọ ị ọrịa ị ile,

⁴ ọ nịnị ọnwụn weri i; ọ ghọsị ị ihiẹn-ọsụsụọ lẹ omikẹn ọda-ọda.

⁵ O gi ihiẹn rị mma e yejun i ẹfọ, hụn ndụn gi a rịsọnmẹ ị nọkẹ ugọn.

⁶ Osolobuẹ a tụnị ndị wẹ rị a bịangbu ụya, e kinni wẹ ọnụ wẹ.

⁷ Ọ ghọsị Mozizi k'o dọn e mẹ ihiẹn ẹ, ghọsị ndị Izrẹlụ ọrụn-atụmẹnya a.

⁸ Osolobuẹ e mẹ omikẹn, o mẹyeni ịhịan; ara bukẹnrin olulu, o mẹni ndị nke ẹ omikẹn.

⁹ O kpebe, ọ gbagharị; ara we iwe jẹnrin ejẹn.

¹⁰ Onwọnni ogẹn o gi mẹ ẹnyi ihiẹn hankẹ njọ ẹnyi, mọbụ mẹgwarị ẹnyi kẹ njọ ẹnyi han.

¹¹ Kẹ igwere tehan ebe ndị rị elu-ụwa rị, ẹrịra k'o nwọnhan ihiẹn-ọsụsụọ ndị a gbayen'ẹ.

¹² Kẹ ọwụwa ẹnyanwụn tehan ebe ọdịdan ẹnyanwụn rị, ẹrịra k'o wetehan njọ ẹnyi.

¹³ Kẹ nẹdi dọn e mẹni ụmụ a omikẹn, ẹrịra kẹ Osolobuẹ dọn e mẹ omikẹn ndị a gbayen'ẹ.

¹⁴ Makẹni ọ marịnghọ nị ẹnyi ezeni; ọ nyanhanghọ nị ẹnyi wụhụ ẹjan.

¹⁵ Ndụn ịhịan nọhụ kẹ ẹfịfịa; o suehụ kẹ obobo ọfịa:

¹⁶ ufere fe ẹ hụ, ọ la, amarịnkọdẹ wẹ n'o te rị ebẹhụ!

¹⁷ Kanị ihiẹn-ọsụsụọ Osolobuẹ e sọn ndị a gbayen'ẹ gha alị lala, o sọn wẹ jẹnrin ejẹn; o mẹsọnmẹni wẹ ihiẹn furuni d'e rudẹ ẹka ụmụ lẹ ụmụ-ụmụ wẹ,

¹⁸ ya k'o mẹni ndị e dọnmẹ nkwerigbama a lẹ ndị hụn a nyanhan e mẹ ihiẹn o ku.

¹⁹ Osolobuẹ e tumẹgụọ ukpo-eze ẹ imẹ elu-igwee; alị-eze ẹ rị a kị ihiẹn ile.

²⁰ Ja nị Osolobuẹ mma, ụnụ ndị mmọn-ozi ẹ wụ ndị dikẹn, hụn e mẹ ihiẹn ọwụlẹ o ku, ihiẹn ọwụlẹ wẹ nụ ọnụ a.

²¹ Ja nị Osolobuẹ mma, ụnụ ndị-agha a ile, ụnụ ndị-idibo ẹ hụn e mẹ uche ẹ!

²² Ja nị Osolobuẹ mma, ihiẹn ile o ke hụn rị ebe ile ọ rị a kị. Obi m, ja Osolobuẹ mma!