Ẹbụ-ọma 102 - Ika

Isi Nke Ẹbụọ Kwasị Ọgụn-isẹn Ekpere Okoro Rị A Hụnjun Ẹnya

Ọnwan wụ ekpere onyẹ rị imẹ nsọngbu; ndụn arịzị a, ọ rị a gwaghọsị Osolobuẹ k'ọ rị a.

¹ Osolobuẹ dodo, nụ ekpere m; dodo, nụ ẹkwan m!

² Agbakịtọkwọlẹ m azụụn ogẹn nsọngbu; dodo, gọn m ntịn; m kpọku i hụ, dodo zakẹnrin m!

³ M hụ a la kẹ ebe ẹnwụnrụn rị a lọpụ; ọkpụkpụ hụ e nwun m ọkụn lekẹ sị wẹ fiye ẹ ọkụn.

⁴ Kaka akpụ ndụn ohu arịzị m obi, obi nọ m nwan kẹ ẹfịfịa shinwụnnị; ẹfọ a kpakingụọdẹ m.

⁵ Udẹn-udẹn m rị a sụn yeni uhue e mẹgụọ m wụrụ ọkpụkpụ-ọkpụkpụ.

⁶ M rịhụ kẹ ozuzu-ọfịa rị imẹ atụ, ozuzu-nta rị ebe mẹ mkpọkọ-mkpọkọ.

⁷ Ụran ara buru m; m rịhụ kẹ nnụnụ ya sụọ rị elu ụlọ.

⁸ Ndị-iṅẹnrẹn m hụ a kpari m uhinhin lẹ efinaị; ndị rị a mụ m ẹmụ hụ e gi ẹfan m a kpọ iyi.

⁹ Ntụn kẹ m rị nwan e ri nọkẹ ihiẹn-oriri; ẹnya-mirin m hụ a tanye ihiẹn m'a ra!

¹⁰ Makẹni y'e gigụọ iwe i lẹ ọnụma ị sọn m; makẹni y'a tụtụrụgụọ m matuhu.

¹¹ Ndụn m hụ a la kẹ onyinyọn ẹnyasị rịhụ a tịnpụnị; m rị e shinwụn nọkẹ ẹfịfịa.

¹² Kanị yụ wụ Osolobuẹ k'a rị jẹnrin ejẹn; wẹ k'a nụ ẹfan ị gha agbọ pụ agbọ.

¹³ I k'e lihi d'e mẹni Zayọnụ omikẹn, makẹni ogẹn y'e gi mẹn'ẹ ọhụnma e rugụọ; ogẹn hụn i kayen'ẹ e rugụọ nwan.

¹⁴ Makẹni Zayọnụ rịchanrịn ẹnyi ndị idibo i obi kẹ ọmụma kẹ ẹjan rịn'a e mẹtụzị ẹnyi obi!

¹⁵ Alị ile k'a gbaye ẹfan Osolobuẹ; ndị-nze ile rị elu ụwa k'a gbaye ị makẹ ọghọ ị.

¹⁶ Makẹni, Osolobuẹ k'a tụndọnzi Zayọnụ; o k'a ghọsị ọghọ a.

¹⁷ O k'a nụ ekpere ndị nwọnlẹni eyemẹka; o lelịakọ ekpere wẹ.

¹⁸ Wẹ detuni agbọ lalanị ihiẹnni Osolobuẹ mẹ, kẹni ndị wẹ kelẹni mụ, pụha, a ja wẹ Osolobuẹ mma,

¹⁹ makẹni Osolobuẹ a nọgụọ elu, ebẹhụ rị nsọ ọ rị, lee ụwa, Osolobuẹ a ghagụọ elu-igwee lee ẹnya elu-ụwa,

²⁰ kẹni ọ nụ udẹn ndị rị ngan rị a sụn; kẹni ọ gbapụha ndị wẹ ma ikpe-ọnwụn.

²¹ Osolobuẹ mẹ ẹ kẹni wẹ nụ ẹfan a imẹ Zayọnụ, kẹni wẹ ja a mma imẹ Jerusalẹm,

²² ogẹn hụ ndị alị ichẹn-ichẹn lẹ alị-eze ichẹn-ichẹn k'e gi bịagbama d'e fe Osolobuẹ ofufe.

²³ Osolobuẹ e mẹgụọ ndụn gụkẹnrin m; o mẹgụọ m ka ẹgẹdi ikẹn!

²⁴ M sị, “Chuku m dodo, egbuchukwọlẹ m! Ịyụ hụn rị ndụn gha agbọ pụ agbọ;

²⁵ ịyụ ke ụwa kete-kete; igwere wụzịkwọ ọrụn-ẹka ị.

²⁶ Wẹ k'a la iwi, kanị yụ nwẹn k'a rịsọnmẹ; wẹ k'a fapụ rịkẹ ẹkwa; i k'e gi ọzọ nọkin ẹnya wẹ rịkẹ ẹkwa, nke wẹ a gụ.

²⁷ Kanị yụ nwẹn wụkwọ onyẹ hụ ị wụ; ndụn ị enwọn ọgụgụ!

²⁸ Ụmụ idibo i k'e bi alị wẹ, ụmụ-ụmụ wẹ e birizikwọ udọn-lẹ-ndọnkwa makẹni ị hụ a.”