Ditrọnọmi 9 - Ika

Isi Nke Itenẹi Ẹlẹ Ufiri Ezi-omumẹ Izrẹlụ

¹ Izrẹlụ, gọn ni ntịn! Ụnụ e d'e fetu nwan Iyi Jọdanị d'a narịn ndị ọzọ ka ụnụ ọda, ka ụnụ ikẹn, alị wẹ hụn nwọnsọnmẹ obodo shịagbu enwẹn wẹ, wẹ tụnhunmẹ mgbọn sụntụsọnmẹ elu-igwere.

² Ndị ahụn ka-ẹhụ, sue usue; ndị Anakị adụn-aran rọ! Ụnụ a nụgụọ ukwere wẹ, nụ kẹ w'e ku oku wẹ, sị, “Onyẹ k'a s'ẹka che ndị Anakị ọgụn?”

³ Ka marịn nị nwan nị Osolobuẹ wụ Chuku ụnụ wụ onyẹ k'e buruni ụnụ ụzọ nọkẹ ọkụn rị a dụnnị. O k'e tikpọ wẹ; o k'e mẹrini ụnụ wẹ, ụnụ a chụpụ wẹ, gbupụ wẹ ozigbo, nọkẹ kẹ Osolobuẹ dọn kwe ụnụ nkwa.

⁴ Osolobuẹ wụ Chuku ụnụ chụpụgụn'ị wẹ, asịkwọlẹ enwẹn i, “M wụ onyẹ ezi-omumẹ haịn Osolobuẹ gi wẹhẹ m ebeni d'e weri alịnị.” Ẹlẹkwọ ya! Njọ ndị alị ndịnị haịn Osolobuẹ gi a chụpụnị ụnụ wẹ.

⁵ Ẹlẹ nị ụnụ wụ ndị ezi-omumẹ mọbụ nị ụnụ kụrụ ọtọ kẹ ụnụ gi bankọ d'e weri alị wẹ: kama, ufiri njọ ndị alị ndịnị wẹ kẹ Osolobuẹ wụ Chuku ụnụ k'e gi chụpụ wẹ, kẹn'o mẹzu ihiẹn ahụn o gi ufiri ẹ kun enwẹn ẹ kwe ndị nẹdi ụnụ kanị wụ Ebraham, Aziki lẹ Jekọpụ nkwa.

⁶ Ghọta nị nwan nị ẹlẹ nị ụnụ wụ ndị ezi-omumẹ kẹ Osolobuẹ wụ Chuku ụnụ gi rị e ye ụnụ alị ọmanị weri — kaka, ndị isi-ikẹn kẹ ụnụ wụ.

Isi-ikẹn Ndị Izrẹlụ Nwa-efin Ahụn Wẹ Kpụrụ Femẹ

⁷ Nyanhan nị, azọkwọlẹ ni, kẹ ụnụ dọn kpasu Osolobuẹ wụ Chuku ụnụ iwe imẹ atụ. Gha ụhụọhịn ụnụ gha Ijiptu pụha d'e ru hụnnị ụnụ ru ebeni, isi-isi kẹ ụnụ rị e nupụnị Osolobuẹ.

⁸ Ụnụ kpasu Osolobuẹ iwe imẹ Horẹbụ hụn olulu gi bu ẹ nke wụ nị o te chọ n'o gbupụ ụnụ.

⁹ Ogẹn m gi nyinrin elu ugu ahụn d'e wẹhẹ ibe ọmụma ndị ahụn, ibe ọmụma ndị ahụn Osolobuẹ deye nkwerigbama hụn o gi kwọngbama ụnụ lẹ ya, m nọ elu ugu hụ akp'ọhịn ọgụnnaị, uhinhin lẹ efinaị, erini m ihiẹn-oriri, aranị m mirin.

¹⁰ Osolobuẹ nọ ye m ibe ọmụma ẹbụọ o gi ẹka ya lẹ enwẹn ẹ wụ Chuku deye ihiẹn. Iwu ahụn ile ọ gha imẹ ọkụn ahụn rị elu ugu ye ụnụ ụhụọhịn ụnụ zu ukun ugu ahụn k'o deye ibe-ọmụma ndị ahụn.

¹¹ Akp'ọhịn ọgụnnaị ahụn a ghagụ, Osolobuẹ nọ ye m ibe ọmụma ẹbụọ ahụn, ibe ọmụma nkwerigbama.

¹² Osolobuẹ nọ sị m, “Hidan ozigbo, nị ndị nke i hụn i gha Ijiptu wepụha a rụọlẹ. Ọ kẹrẹọlẹni wẹ latọ ihiẹn m sị wẹ mẹ, kpụrụ mmọn.”

¹³ Osolobuẹ nọzị sị m, “A hụngụọ m ndịnị, wẹ wụ ndị isi-ikẹn nke-esi!

¹⁴ Ha m ye nị m gbupụ wẹ, finchanpụ ẹfan wẹ elu-ụwa — e gi m'i họnrin okẹn alị ka-ẹhụ hụn k'a ka wẹ ọda!”

¹⁵ Ya m nọ gbehutọ, gha elu ugu ahụn rị e nwụn ọkụn hidan; ibe-ọmụma ẹbụbụọ ahụn wẹ deye nkwerigbama ahụn hụ m ẹka.

¹⁶ Ogẹn m gi lee ẹnya, a hụn m'a nị ụnụ e mẹọlẹ Osolobuẹ wụ Chuku ụnụ njọ — kpụrụ nwa-efin femẹ, nị ọ kẹrẹọlẹ ụnụ latọ ihiẹn Osolobuẹ gwa ụnụ,

¹⁷ ya m nọ tụ ibe ọmụma ẹbụọ ahụn m gi ẹka ye alị, wẹ nọ gungwọnpụ idẹnya ụnụ.

¹⁸ Ya m nọzị tụha enwẹn m ye alị, we ihun kpumẹ alị idẹnya Osolobuẹ akp'ọhịn ọgụnnaị, uhinhin lẹ efinaị; erini m ihiẹn-oriri, a ranị m mirin, makẹ njọ ile ụnụ mẹ ụnụ gi mẹ ihiẹn rịlẹni mma ẹnya Osolobuẹ, gi ẹ kpasu ẹ iwe.

¹⁹ Egun iwe-lẹ-ọnụma Osolobuẹ tụ m a tụ, makẹni ize ụnụ te ze ẹ hụn o te gi chọ n'o gbupụ ụnụ. Kanị, ọ nọ gọnzi m ntịn, gharị.

²⁰ Ize Ẹrọnụ kpụn'a zezi Osolobuẹ hụn o te k'e gi gbu ẹ, kanị m nọ rịọdọnzin'ẹ ogẹn ahụn.

²¹ M nọzị weri eje-ihiẹn ụnụ ahụn, nwa-efin hụ ụnụ kpụ, dụn a ọkụn. M nọ kụkpọ a, gweriẹn ẹ, o riẹn kẹ ntụn, m nọ bụọ a ye imẹ mirin ohu gha elu ugu ahụn e hutu.

²² Ụnụ a kpasuzighọ Osolobuẹ iwe imẹ Tabera lẹ Masa lẹ Kibrọtụ-Hatava.

²³ Ẹrịrazịkwọ, ogẹn Osolobuẹ gi nọ Kadẹshi-Bania zi ụnụ ozi, sị, “Shi ni alị ndịnị rị ugu d'e weri alị m ye ụnụ,” ụnụ nọ nupụnị Osolobuẹ wụ Chuku ụnụ isi. Ụnụ egin'ẹ dọn ẹnya, ụnụ emẹni ihiẹn ọ sị ụnụ mẹ.

²⁴ Isi-isi kẹ ụnụ e nupụnị Osolobuẹ kete m'a marịnlẹ ụnụ.

²⁵ M dinẹ we ihun kpumẹ alị ọrọgbọ akp'ọhịn ọgụnnaị ahụn — makẹni Osolobuẹ e kugụọ n'o k'e tikpọpụ ụnụ.

²⁶ M nọ rịọ Osolobuẹ, sị, “Osolobuẹ ihiẹn ile rị okpuru ẹ, dodo, etikpọlẹ ndị nke i, ukuu i hụn i gi ikẹn hi-ogbe gbarị, hụn ị kpa ikẹn gha alị Ijiptu wepụha.

²⁷ Nyanhan idibo i wụ Ebraham, Aziki lẹ Jekọpụ. Fepụ ẹnya isi-ikẹn ndịnị lẹ eje-obibi wẹ lẹ njọ wẹ mẹ.

²⁸ Amamgbe ndị alị ị gha wepụha ẹnyi a sị, ‘Makẹni Osolobuẹ asanị ẹka we wẹ ru alị ahụn o kwe wẹ nkwa lẹ makẹni iwe wẹ rị a obi k'o gi wepụha wẹ d'e gbu imẹ atụ.’

²⁹ Ndị nke i kẹ wẹ wụ, ukuu i hụn i gi ikẹn i hi-ogbe lẹ ikẹn i kpa wepụha.”